Génesis 46 - DIOSPA QHELQACHISQAN DEUTEROCANONICAL

Jacobwan ayllunwan ima Egiptoman ripunku

¹ Jinamanta Jacobqa tukuy imanta apariykukuspa, purirerqa. Bersebaman chayaspataj, uywa ñak'asqata q'olacherqa tatan Isaacpa Diosninman jaywananpaj.

² Chantá chay ch'isi Dios mosqoypi jina sutinmanta wajyaspa, Israelwan parlarqa: Jacob, Jacob, nispa. Paytaj kuticherqa: Kaypi kashani, nispa.

³ Chantá Dios payta nerqa: Noqa Dios kani, tataykej Diosnin. Egiptoman riyta ama manchachikuychu. Chaypi mirayniykita mirachispa, noqa ashkha runayoj jatun suyuman tukuchisqayki.

⁴ Noqamin qanwan Egiptoman risaj, noqallataj mirayniykita orqhospa, paykunata kayman kutichimusaj. Chantá Egiptopi wañupojtiyki, Joseqa qayllaykipi kanqa ñawiykita wisq'ananpaj, nispa.

⁵ Chaymanta Jacobqa Bersebamanta purirerqa. Paypa churinkuna tatankuta, wawankukunata, warminkukunata ima faraonpa apachimusqan carretakunaman wicharicherqanku, paykunata Egiptoman pusakapunankupaj.

⁶ Ajinata Jacob, chantá tukuy ayllunwan Egiptoman riporqanku. Jinallataj wakankukunata, ovejankukunata, Canaanpi kashajtinku imankuchá tiyaporqa, chaykunatawan apakaporqanku.

⁷ Jinallataj tukuy churinkukuna, ususinkukuna, tukuy allchhinkukuna ima paywan Egiptoman riporqanku.

⁸ Israelpa churinkuna Egiptoman ripojkunamanta kaykuna karqanku: Jacobpa kuraj kaj churin Rubén,

⁹ Rubenpa churinkunataj karqanku: Janoc, Falú, Jesrón, Carmi ima.

¹⁰ Simeonpa churinkuna karqanku: Jemuel, Jamín, Oad, Jaquín, Sojar, Saúl ima. Saultajrí Canaán llajtayoj warmej churin karqa.

¹¹ Levijpata churinkuna karqanku: Gersón, Coat, Merari ima.

¹² Judáj churinkunataj karqanku: Er, Onán, Sela, Fares, Seraj ima. Erwan, Onanwanqa Canaanpi wañorqanku. Farespa churinkunatajrí karqanku: Jesrón, Jamul ima.

¹³ Isacarpa churinkuna karqanku: Tola, Fuvá, Job, Simerón ima.

¹⁴ Zabulonpa churinkunataj karqanku: Sered, Elón, Yajelel ima.

¹⁵ Chaykuna karqanku Padán Arampi kashaspa, Jacobqa warmin Leawan rejsisqan churinkuna, Dina ususinwan ima. Tukuyninpi kinsa chunka kinsayoj qharikuna, chantá warmikuna ima karqanku.

¹⁶ Gadpa churinkuna karqanku: Zefón, Jaguí, Ezbón, Suni, Eri, Arodi, Areli ima.

¹⁷ Aserpa churinkunataj karqanku: Imna, Isúa, Isúi, Beria ima, chaykunaj panankutaj Seraj karqa. Beriaj churinkunarí karqanku: Jéber, Malquiel ima.

¹⁸ Chaykuna Zilpaj wawankuna Jacobpaj karqanku. Zilpaqa Leajta warmi kamachin karqa. Labanqa Zilpata ususin Leaman qosqa. Tukuyninpi chunka sojtayoj karqanku.

¹⁹ Jacobpa warmin Raquelpi churinkuna iskaylla karqanku: Josewan, Benjaminwan ima.

²⁰ Josejta warmin Asenatpi rejsisqan churinkuna iskayllataj karqanku: Manaseswan, Efrainwan ima. Paykuna Egiptopi paqarerqanku. Joséj warmin Asenatqa Onmanta sacerdote Potiferaj ususin karqa.

²¹ Benjaminpa churinkunarí karqanku: Bela, Bequer, Asbel, Gera, Namán, Ehí, Ros, Mupín, Jupín, Ard ima.

²² Chaykuna Jacobpa warmin Raquelpa churinkunamanta mirajkuna karqanku. Tukuyninpi chunka tawayoj karqanku.

²³ Danpa churenqa Jusín karqa.

²⁴ Neftalijpata churinkunataj karqanku: Yajesel, Guni, Yézer, Silén ima.

²⁵ Chaykuna Bilajta Jacobpaj rejsisqan wawankuna karqanku. Bilaqa Raquelpa kamachin karqa, payta tatan Labán kamachin kananpaj qosqanrayku. Tukuyninkupi qanchis karqanku.

²⁶ Jacobwan Egipto suyuman rejkuna sojta chunka sojtayoj karqanku, chay karqa churinkunaj warminkuta mana yupaspa.

²⁷ Josejpa churinkuna Egiptopi paqarejkunataj iskay karqanku. Ajinamanta Jacobpa ayllun Egiptoman yaykojkuna tukuyninpi qanchis chunka karqanku.

²⁸ Ñanllapiraj kashajtinku, Jacobqa churin Judata ñawpacherqa Joseman willamunanpaj Gosén chaynejman taripaj jamunanpaj. Gosén chaynejman chayajtinkutaj,

²⁹ Joseqa Gosenman tatanta taripaj rinanpaj carretanta wakichipunankuta kamacherqa. Chantá José tatanwan tinkuspa, ojllaykorqa, tatan ojllarisqataj unayta waqarqa.

³⁰ Chantá Israelqa Joseta nerqa: Kikin ñawiywan rikukapuyki, kawsashajtataj tarikapuyki. Kunanqa sonqo junt'asqa wañupuyta atini, nispa.

³¹ Chaymanta José wawqenkunata, chantá tatanpa ayllunta ima nerqa: Faraonman rispa, willamusaj: Canaanmanta wawqeykuna, tataypa ayllun ima noqawan tiyakoj jamunku.

³² Paykunataj wakankuta, ovejankuta, tukuy imankutawan apamunku, imaraykuchus uywata uywaspa kawsaj kanku, nispa.

³³ Maypachachus faraón wajyaspa, tapusonqachej: Imatataj ruwayta yachankichejri? nispa, chaypacha

³⁴ qankuna ninkichej: Noqaykoqa ñawpa tataykukuna jina uywata uywaspa kawsayku, nispa. Ajinamanta qankuna Gosenpi tiyakunkichej, imaraykuchus Egipto llajtayojkunaqa ovejata michejkunata chejnikunku.