Génesis 31 - DIOSPA QHELQACHISQAN DEUTEROCANONICAL

Jacobqa Labanmanta ayqen

¹ Aswan qhepanejman Jacobqa Labanpa churinkuna paypaj rimashasqankumanta yachakorqa: Jacobqa tatanchejpa tukuy kapuyninta jap'ikapuspa, qhapajyaykushan, nispa.

² Chantá Jacob reparallarqataj Labanqa payta manaña ñawpajta jinachu parlapayasqanta.

³ Jinallataj Tata Dios Jacobta nerqa: Kutipuy tataykej llajtanman, maypichus aylluyki kashan, chayman. Noqataj qanwan kasaj, nispa.

⁴ Chantá Jacobqa Raquelta, Leatawan ima wajyacherqa, maypichus ovejakunata michisharqa, chayman rinankuta.

⁵ Chayajtinkutaj, nerqa: Reparani tataykichejqa manaña ñawpajta jinachu qhawawasqanta. Chaywanpis tataypa Diosnenqa noqata yanapashawan.

⁶ Qankuna yachankichej kallpayta mana mich'akuspa tataykichejpaj llank'asqayta.

⁷ Payrí sapa kutilla q'otiyawaspa, chunka kutikama pagoyta cambiarqa. Chaywanpis Diosneyqa tataykichej sajra kajwan paganawanta mana munarqachu.

⁸ Tataykichej niwarqa: Sani ovejakunawan pagasqayki, nispa. Ovejakunataj sanillatapuni uñacharqanku. Tukuy alqa kajkunata pagasqayki, niwajtintaj, ovejakunaqa alqallatapuni uñacharqanku.

⁹ Ajinata Diosqa uywankunamanta qhechuspa, noqaman qowarqa.

¹⁰ Uj kuti, uywakuna q'oñirinanku tiempopi mosqokuspa, rikorqani chinakunawan tinkoj muchukunaqa ch'ejchi, sani, chantá alqa kasqankuta.

¹¹ Mosqokushajtiy, Diospa angelnin sutiymanta wajyawarqa, noqataj kuticherqani: Imata ninki? nispa.

¹² Chantá niwarqa: Allinta qhaway, rikunki chinakunawan tinkoj muchukunaqa alqakuna, sanikuna, ch'ejchikuna kasqankuta, imaraykuchus Labán imatachus ruwasusqanta noqa yachani.

¹³ Noqa kani, pichus Betelpi rikhurisorqa, chay Diosmin. Chaypi qanqa rumiman aceite jich'aspa chaynejta noqapaj t'aqarqanki, chantá noqapaj imatachus ruwanaykita niwarqanki. Kunanqa puririy, kay llajtamanta llojsispa, maypichus paqarerqanki, chay llajtaman kutipuy, nispa.

¹⁴ Chantá Raquelwan, Leawan nerqanku: Noqaykoqa tataykumanta chayaqeta jap'inaykoqa manaña kanchu.

¹⁵ Noqaykutapis wajpis kaykuman jinallaña qhawawayku. Chantá vendewaykutaj. Qan tataykuman noqaykuwan casaranaykipaj pagasqaykitapis pay mikhuykakapun.

¹⁶ Diosniykumanta tukuy kapuyninta qhechusqanqa noqanchejpata, wawanchejkunajtawan ima. Jina kajtenqa, Dios imatachus nisusqanta ruway ari, nispa.

¹⁷ Chantá Jacob ripunanpaj oqharikuspa, wawankunata, warminkunata ima camellokunaman lloq'aykucherqa.

¹⁸ Jinaspataj, Padán Arampi tukuy tarisqan uywakunata, chantá tukuy imata tarisqantawan apariykukuspa, Canaanman purirerqa, maypichus tatan Isaacqa tiyakusharqa, chayman.

¹⁹ Chaywanpis Labán ovejankunaj millmanta ruthuchej rinankama, Raquelqa tatanpa lantinkunata suwarqa.

²⁰ Ajinata Jacobqa Aram llajtayoj Labanta q'otiyaspa, ch'inllamanta riporqa, mana imatapis nispalla.

²¹ Tukuy imanta apariykukuspa, ayqerqa. Éufrates mayuta chimpaspataj, Galaad orqonejman rerqa.

Labán Jacobta qhatiykun

²² Kinsa p'unchayninman jina, Labán yacharqa Jacob ayqesqanta.

²³ Jinaqa tukuy ayllunta pusariykukuspa, Jacobpa qhepanta kachaykukorqa. Labán qanchis p'unchay puriyta rispataj, Galaadpi orqorara cheqanejpi Jacobta tariparqa.

²⁴ Chaywanpis chay ch'isi Diosqa mosqoypi jina Aram llajtayoj Labanman nerqa: Uyariway, Jacobta ama imatapis ninkichu, nispa.

²⁵ Q'ayantenqa Labán Jacobta tariparqa, Galaad orqonejpi jarasqa kashajtin. Labanpis chaynejllapitaj pusakusqan ayllunwan jarakorqa.

²⁶ Chantá Labán Jacobta nerqa: Imatataj kayta ruwankiri? Imaraykutaj jinata q'otiyawankiri? Wawaykunata maqanakupipis jap'iwaj karqa jinata apakampunki.

²⁷ Imaraykutaj ch'inllamanta ayqemunkiri? Ripunaykita yachaspaqa kusisqa, takiykunawan, tamborawan, arpawan ima kacharpayaykiman karqa.

²⁸ Ususiykunata, allchhiykunatapis mana much'aykurichiwarqankichu. Kayta ruwaspaqa, wampu jina ruwanki.

²⁹ Noqaqa qankunata imatapis ruwayta atiyman. Chayqa makillaypi kashan. Chaywanpis tataykejpa Diosnin ch'isi niwan: Sumajta qhawakuy, Jacobta ama imatapis ninkichu, nispa.

³⁰ Qanqa tataykej wasinman kutipuyta may jinatapuni munasqaykita yachani. Chaywanpis, imaraykutaj lantiykunata suwawankiri? nispa.

³¹ Chantá Jacob Labanpa nisqanman kuticherqa: Manchachikorqayki. Yuyarqani wapuchakuspa, ususiykikunata qhechunawaykita.

³² Chaywanpis sichus noqaykumanta pipis diosniykikunata jap'ishan chayqa, wañuchisqa kachun. Ayllunchej qhawashajtin, qanpata kajta rejsikapuspa apakapuy, nispa. Jacob ajinata nerqa, imaraykuchus mana yacharqachu warmin Raquel tatanpa lantinkunata suwasqanta.

³³ Chantá Labanqa lantinkunata mask'aj Jacobpa toldonman yaykorqa, chaymantataj Leajmanñataj yaykorqa. Chantá warmi kamachikunaj toldonman yaykullarqataj, manataj tarikaporqachu. Chaymanta llojsispataj, Raquelpamanñataj yaykorqa.

³⁴ Raqueltajrí lantikunata camello montura uraman sat'iykorqa, jinaspataj, patanman tiyaykorqa. Labán toldopi tukuynejta mask'arqa, manataj tarerqachu.

³⁵ Chantá Raquel tatanta nerqa: Tatáy, ama phiñakuychu, mana sayariyta atiymanchu, imaraykuchus killa onqoyniywan kashani, nispa. Labanrí lantinkunata tarikapuyta munaspa, tukuynejta mask'arqa, manataj tarikaporqachu.

³⁶ Chantá Jacob phiñakuspa, Labanta k'amerqa: Imatataj mana allinta ruwanichuri? Imataj juchay, chay jinatapuni qhatiykachanawaykipajri?

³⁷ Tukuy imaytaña mask'anki. Imaykitataj tarikapunkiri? Tarikapusqaykita churay aylluykej ñawpaqenman, aylluy rikushajtin, paykuna nichunku pichus juchayoj kasqanchejta.

³⁸ Iskay chunka watata qanwan kashajtiy, ni jayk'aj ovejaykikuna, nitaj cabraykikunapis sullorqankuchu. Nitaj jayk'ajpis uj carnerollaykitapis mikhuykorqanichu.

³⁹ Ovejata atojpis, leonpis jap'ej chaypis, pagapoj kayki. Sichus ch'isin, chayrí p'unchaynin suwaj kanku chayqa, chaymantapis mañakapuwaj kanki.

⁴⁰ Noqaqa p'unchaypi ruphaypa tuntisqan karqani, tutantaj chiriwan pasachikuspa, mana puñuspa ima.

⁴¹ Iskay chunka watata qanwan kaspa, iskaynin ususiykirayku chunka tawayoj watata llank'aporqayki, uywaykiraykutaj sojta watata. Sapa kutitaj pagoyta cambiaj kanki.

⁴² Jinaqa, sichus Abrahampata Diosnin, tatay Isaacpa yupaychasqan Diosnin mana noqawanchu kanman karqa chayqa, mana imayojta kachapuwankiman karqa. Chaywanpis Diosmin ñak'arisqayta, qanrayku tukuy ruwasqayta ima rikorqa. Chayraykumin ch'isi k'amerqasunki, nispa.

Jacobwan Labanwan tratota ruwanku

⁴³ Chaymanta Labanqa Jacobta nerqa: Kay warmikuna wawaykuna kanku, wawankukunataj allchhiykuna. Kay ovejakuna, tukuy imaykipis noqajtamin kanku. Chaywanpis wawaykunata, wawankukunatapis mana ni imatapis ruwaymanchu.

⁴⁴ Chayrayku qanwan noqawan uj tratota ruwanachej, iskayninchej junt'ananchejpaj, nispa.

⁴⁵ Jinata nejtintaj, Jacobqa uj rumita oqharispa, sayacherqa.

⁴⁶ Chantá ayllunkunata nerqa: Rumita tantaychej, nispa. Paykunataj rumita tantaspa, tawqarqanku. Jinaspataj, tawqasqa rumi patapi mikhorqanku.

⁴⁷ Labanqa chay mikhusqanku cheqata arameo rimaypi suticharqa: “Yegar Sadutá”, nispa. Jacobtaj hebreo rimaypi suticharqa “Galaad”, nispa.

⁴⁸ Chaymanta Labán nerqa: Kunan kay tawqasqa rumeqa tratota ruwasqanchejmanta yuyarichinawanchejpaj kanqa, nispa. Chayrayku chay cheqaqa “Galaad”, nispa sutichasqa karqa.

⁴⁹ Sutichallarqankutaj “Mispá” sutiwan, imaraykuchus Labán nerqa: Qantawan, noqatawan Tata Dios qhawachun, karupi kasqanchejrayku manaña rikunakojtinchej.

⁵⁰ Ichapis wawaykunata k'umuykachachiwaj, chayrí wawaykuna jawa waj warmikunata oqharikuwaj. Mana pi rikoj kajtinpis, yuyarikuy Diosllamin testigo kananta, nispa.

⁵¹ Chaymanta Labanqa Jacobta nillarqapuni: Qhaway, kay tawqasqa rumi, chantá kay sayachisqa rumiwan noqanchej ukhupi uj señal kanqa,

⁵² tratota ruwasqanchejmanta yuyarichinawanchejpaj. Ni qan, nitaj noqa pasanakusunchejchu mana allinta ruwanakunanchejpaj.

⁵³ Jatun tatayki Abrahampata Diosnin, jatun tatayki Najorpatawan Diosnin justiciata ruwawasunchej, nispa. Chaymanta Jacobqa, tatan Isaac pi Diostachus yupaycharqa, chay Diospa sutinpi tilorqa.

⁵⁴ Chaymanta Jacobqa orqopi uj uywata ñak'aspa, Diosman q'olacherqa. Jinaspataj, tukuy ayllunta mikhunankupaj wajyarqa. Ajinata tukuyninku mikhorqanku, chay orqopitaj sut'iyanankama karqanku.

⁵⁵ 55 (32.1) Labantaj q'ayantin tutamanta jatarispa, wawankunata, allchhinkunatawan much'aykuspa, saminchaykuspa ima, wasinman kutiporqa.