Génesis 30 - DIOSPA QHELQACHISQAN DEUTEROCANONICAL

¹ Raquelqa Jacobpaj mana wawayoj kayta atispa, ñañan Leawan jap'inakorqa. Chantá qosan Jacobta nerqa: Wawallichiway, manachayqa wañusaj, nispa.

² Jacobtajrí phiñakuspa, payta nerqa: Noqaqa mana Dioschu kani. Pay wawayoj kanaykita mana munanchu, nispa.

³ Chantá Raquel Jacobta nerqa: Uyariway, kay kamachiy Bilawan puñuykuy. Pay wawayoj kanqa chayqa, noqapis wawayoj kashayman jina kanqa, nispa.

⁴ Ajinata Raquelqa qosan Jacobman kamachin Bilata ujnin warmin kananpaj qorqa. Jacobtaj paywan puñuykorqa.

⁵ Jinataj Bilaqa Jacobpaj wawayoj karqa.

⁶ Chantá Raquel nerqa: Kay wawaj sutenqa “Dan” kanqa, imajtinchus Tata Dios mañakusqayta uyarispa, uj wawata qowan. Ajinata ruwaspa, justiciata ruwawan, nispa.

⁷ Chay qhepata Bilaqa ujtawan Jacobpaj wawayoj kallarqataj.

⁸ Chantá Raquel nerqa: Ñañaywan sinch'ita jap'inakuni, atipanitaj. Chayrayku kay wawaj sutenqa “Neftalí” kanqa, nispa.

⁹ Leapis manaña wawayoj kayta atispa, kamachin Zilpata ujnin warmin kananpaj Jacobman qorqa.

¹⁰ Leaj kamachin Zilpataj Jacobpaj wawayoj karqa.

¹¹ Chayrayku Lea nerqa: Kusiy kayqa. Chayrayku wawaj sutin “Gad” kanqa, nispa.

¹² Chay qhepata Leaj kamachin Zilpaqa Jacobpaj ujtawan wawayoj kallarqataj.

¹³ Chantá Lea nerqa: Kusikunaypaj kayqa. Kunanqa warmikuna niwanqanku kusisqa kasqayta. Chayrayku wawaj sutenqa “Aser” kanqa, nispa.

¹⁴ Uj kuti Leaj kuraj kaj churin Rubenqa trigo oqhariy tiempota qallpaman rerqa. Chantá chaypi mandragoraj poqoyninta tarispa, maman Leaman aparqa. Raqueltajrí chay poqoyta rikuspa, Leata nerqa: Ama jinachu kay, wawaykej apamusqanmanta wakinta qoriway ari, nispa.

¹⁵ Leatajrí kuticherqa: Qosayta qhechuwankiña, kunantaj wawaypa apamusqan mandragoratawanchu qhechuwayta munashanki? nispa. Raqueltaj nerqa: Sichus wawaykej apamusqan mandragorata qowanki chayqa, Jacob kunan ch'isi qanwan puñonqa, nispa.

¹⁶ Inti yaykuyta jina campomanta Jacob kutimushajtin, Lea payta taripaj rerqa. Chantá nerqa: Kunan ch'isi noqawan puñusun, imaraykuchus wawaypa apampuwasqan mandragorata Raquelman pagani, nispa. Chay ch'isitaj Jacobqa Leawan puñorqa.

¹⁷ Diostaj Leaj mañakusqanta uyarerqa. Onqoj rikhurispataj, uj qhari wawata paqarichikorqa. Chaywanqa Lea qosan Jacobpaj phishqa wawayoj karqa.

¹⁸ Chantá Lea nerqa: Dios kay t'inkata qowan, imaraykuchus qosayman kamachiyta ujnin warmin kananpaj qorqani. Chayrayku kay wawaj sutenqa “Isacar” kanqa, nispa.

¹⁹ Chay qhepata Lea ujtawan wawayoj kallarqataj. Chaywanqa Jacobpaj sojta wawayojña karqa.

²⁰ Chantá Lea nerqa: Dios sumaj t'inkata qowan. Kunanqa qosay noqata astawan munakuwanqa, imaraykuchus payman sojta wawataña rejsichini. Chayrayku kay wawaj sutenqa “Zabulón” kanqa, nispa.

²¹ Chaymanta qhepata Leaqa uj warmi wawatañataj paqarichikorqa, chay wawatataj “Dina” nispa suticharqa.

²² Chantá Diosqa Raquelmanta yuyarikorqa, mañakusqanta uyarispataj, nerqa wawayoj kananta.

²³ Ña wawayojña kaspa, Raquel nerqa: Mana wawa rejsisqaymanta p'enqachisqa kasqayta Tata Dios chinkachin.

²⁴ Pay munachun ari ujtawan wawayoj kanayta, nispa. Chayrayku Raquel wawanta “José” sutiwan suticharqa.

Labanwan Jacobwan mana allintachu kawsanku

²⁵ Raquel wawan Joseta paqarichikusqanmanta qhepaman, Jacob Labanta nerqa: Kachapuway, llajtayman ripuyta munani.

²⁶ Warmiykunata, wawaykunatawan qopuwaspa kachapuway, imaraykuchus paykunarayku unayta qanpaj llank'arqani. Imaynatachus llank'asqayta qan yachanki, nispa.

²⁷ Labantajrí kuticherqa: Ama ripuychu ari, kakullay. Noqa yachani qanrayku Tata Dios saminchaspa yanapawasqanta.

²⁸ Niway kunanmanta qhepaman mashkhatachus ganayta munasqaykita, noqataj chayta pagapusqayki, nispa.

²⁹ Chantá Jacob nerqa: Qan allinta yachanki imaynatachus sinch'ita llank'asqayta, jinataj uywaykikunata qhawapususqayta.

³⁰ Manaraj kayman chayamushajteyqa, uywayki pisilla karqa. Kunantajrí ashkhaña tiyapusunki. Chayamusqaymantapacha Tata Dios ashkhata qosunki. Kunantajrí aylluypajñataj llank'arikuyta munani ari, nispa.

³¹ Labantaj nerqa: Mashkhatapunitaj pagasunayta munankiri? nispa. Chantá Jacob nerqa: Ama imatapis pagawaychu. Imatachus nisusqay allin rijch'asunki chayqa, ovejaykikunata michipullasqaykipuni.

³² Kunan rispa, tukuy ovejaykikunamanta, cabraykikunamanta ima ch'ejchikunata, yanakunata, alqakunata ima t'aqasaj. Chaylla uywaykita michipususqaymanta pagoy kanqa.

³³ Ajinaqa q'aya pagoyta qhawaj jamuspa, cheqanta ruwasqayta rikunki. Sichus uyway ukhupi kanqanku mana ch'ejchi kaj, mana yana kaj, mana sani kaj chayqa, suwasusqayta yachanki, nispa.

³⁴ Labantaj nerqa: Walejpacha, qanpa nisqaykiman jina kachun, nispa.

³⁵ Chaywanpis Labanqa chay p'unchaypacha t'aqararqa cabrakunamanta, chantá ovejakunamanta ima tukuy ch'ejchi kajta, alqakunata, yanakunata, sanikunata ima. Chaykunatataj churinkunawan michicherqa.

³⁶ Chantá Labán chay uywakunata kinsa p'unchay puriyta jina qhaterqa, maypichus Jacob kasharqa, chaymanta. Chaykamataj Jacobqa Labanpa chay waj uywankunata michisharqa.

³⁷ Jacobtajrí álamo sach'amanta, almendromanta, chantá castañamanta ima k'aspita p'akispa, qaranta sinkharqa, yurajnin yachakunanpaj.

³⁸ Chantá sinkharasqa k'aspikunata, maypichus uywakuna yakuta ujyaj kanku, chaynejman churararqa ajinamanta uywakuna yakuta ujyaj jamuspa, sinkhasqa k'aspikunata rikunankupaj. Ajinaqa q'oñirisqa ovejakuna, cabrakuna ima yakuta ujyaj jamuspa,

³⁹ muchukoj kanku sinkharasqa k'aspikunaj ñawpaqenpi. Chayrayku chichuyaspa, ch'ejchita, yanata, sanita ima wachararqanku.

⁴⁰ Chantá Jacobqa borregokunata t'aqarqa. Jinallataj Labanpa tropanmanta ch'ejchikunata, chantá yanakunata ima t'aqaspa tropanman churarqa. Ajinata Jacobqa tropanta ashkhayacherqa, manañataj Labanpa tropantawan tantarqachu.

⁴¹ Sapa kuti sumaj kaj uywakuna q'oñirejtinku, Jacobqa sinkhasqan k'aspikunata ñawpaqenkuman churaj. Ajinamanta muchukushaspa, uywakunaqa sinkhasqa k'aspikunata rikusharqanku.

⁴² Mana allin kaj uywa muchukushajtinrí, k'aspikunata mana churajchu. Chayrayku mana allinnin kaj uywakunaqa Labanpaj karqa, sumajnin kajkunatajrí Jacobpaj karqa.

⁴³ Ajinata Jacob maytapuni qhapajyaykorqa. Tiyaporqa may chhika ovejakuna, wata runakuna, camellokuna chantá burrokuna ima.