Génesis 29 - DIOSPA QHELQACHISQAN DEUTEROCANONICAL

Jacob Aramman chayan

¹ Chaymanta Jacobqa inti llojsimuynejpi tiyakojkunaj jallp'ankuman rillarqapuni.

² Chaynejman chayaspataj, uj pujyuta rikorqa. Chay qayllapitaj kinsa tropa ovejata puñurashajta rikullarqataj, imaraykuchus chaymanta tukuy uywakunata yakuta ujyachej karqanku. Chay pujyoj siminrí jatun rumiwan kirpasqa kasharqa.

³ Tukuy uywakunata tantaspa, michejkunaqa pujyupi rumita kirparaj kanku, uywaman yakuta ujyachinankupaj. Ujyachiytawantaj, kirpaykapullajtaj kanku.

⁴ Chantá Jacob pujyuman qayllaykuspa, michejkunata taporqa: Wawqeykuna, maymantataj kankichejri? nispa. Paykunataj kuticherqanku: Jaranmanta kayku, nispa.

⁵ Chantá Jacob tapullarqataj: Rejsinkichejchu Najorpa churin Labanta? nispa. Paykunataj nerqanku: Arí, rejsiyku, nispa.

⁶ Chantá ujtawan Jacob tapullarqataj: Walejllachu kakushan? nispa. Paykunataj kuticherqanku: Arí, walejlla kashan. Qhaway má, ususin Raquel ovejankunata qhatimushan, nispa.

⁷ Chantá Jacob nerqa: Inteqa patapiraj kashan, manaraj uywa wisq'ana phanirajchu. Manachu yakuta ujyachiytawan, ovejakunata michimuwajchejraj? nispa.

⁸ Paykunatajrí nerqanku: Mana atiykumanchu. Noqaykoqa tukuynejmanta uywata tantamunankuta suyanayku tiyan. Chaymantaraj tukuyniyku pujyuta kicharispa, ovejakunaman yakuta ujyachiyku, nispa.

⁹ Jacob paykunawan parlanankama, Raquel chayamorqa tatanpa ovejankunata qhatispa, imaraykuchus paymin ovejata michej karqa.

¹⁰ Chantá Jacobqa tion Labanpa ovejankunawan Raquel jamusqanta yachaspa, pujyuman qayllaykorqa. Jinaspataj, pujyoj siminmanta rumita tanqaspa, ovejakunaman yakuta ujyaracherqa.

¹¹ Chaymanta Jacobqa Raquelta uyanpi much'aykuspa napaykorqa, chantá mayta waqayta qallarerqa.

¹² Chaymantataj Jacobqa Raquelman willarqa pay Rebecaj wawan kasqanta, jinataj Labanpa sobrinon kasqanta. Raqueltaj chayta uyariytawan, phawarispa tatanman willaj rerqa.

¹³ Jinataj Labanqa pananpa churin jamusqanta yachaspa, usqhay usqhayta Jacobta taripaj rerqa. Chantá Labán Jacobta taripaytawan, ojllaykuspa much'aykorqa, chaymantataj wasinman pusarqa. Chaypitaj Jacob paywan imachus kasqanta Labanman willarqa.

¹⁴ Labantaj nerqa: Cheqapuni qanqa aylluy kanki, nispa. Jacob uj killata Labanwan tiyakorqa.

Jacob Leawan Raquelwan ima warmichakun

¹⁵ Chantá Labán Jacobta nerqa: Qan aylluy kasqaykirayku mana qhasillamanta imatapis ruwapuwankimanchu. Niway mashkhatachus pagasunayta, nispa.

¹⁶ Labán iskay ususiyoj karqa. Kuraj kajpata Lea sutin karqa, sullk'ajtataj Raquel karqa.

¹⁷ Leaqa ch'aska ñawisituyoj karqa, Raqueltajrí manchay k'achita karqa.

¹⁸ Jacobrí Raquelta munakorqa, chayrayku Labanta nerqa: Noqa sullk'a kaj ususiyki Raquelwan casaranayrayku qanchis watata llank'apusqayki, nispa.

¹⁹ Labantaj kuticherqa: Walej kanman payta qanwan casarachinayqa waj qhariwan casarachinaymanta nisqaqa. Ajinaqa, noqawan qhepakuy ari, nispa.

²⁰ Ajinata Jacobqa Raquelrayku qanchis watata Labanpaj llank'arqa. Chaywanpis Raquelta maytapuni munakusqanrayku, Jacob qanchis wata mana unaychu kasqanta qhawarqa.

²¹ Qanchis wata junt'akojtintaj, Jacobqa Labanta nerqa: Ususiykita qopuway paywan warmichakunaypaj, imajtinchus parlasqanchejta junt'aniña, nispa.

²² Chantá Labanqa tukuy llajta masinkunata casarakuman wajyarqa.

²³ Ch'isintaj Labán Raquelta Jacobman pusanantaqa kuraj kaj ususin Leallata pusaykorqa. Jacobtaj paywan puñorqa.

²⁴ Chay jawa Labanqa Zilpa sutiyoj kamachita Leaman qorqa, paypa kamachin kananpaj.

²⁵ Chantá q'ayantin paqarin Jacobqa Leallawan puñusqanta yacharqa. Chayrayku Labanta nerqa: Imatataj kayta ruwawankiri? Manachu Raquelwan casaranayrayku qanchis watata llank'aporqayki? Imaraykutaj kay jinata q'otiyawankiri? nispa.

²⁶ Labantajrí kuticherqa: Llajtaykupi usoqa kurajtaraj ñawpajta casarachinayku, chaymantaraj sullk'ataqa.

²⁷ Leawan casarasqayki raymi tukukunantaraj suyay, chaymanta Raquelwanpis casarachillasqaykitaj. Chaywanpis payrayku uj qanchis watatawan llank'apunawayki tiyan, nispa.

²⁸ Jacobtaj ajinata ruwarqa. Casaraku raymi junt'akojtin, Labanqa Jacobta Raquelwanñataj casaracherqa.

²⁹ Chantá Labanqa Bilá sutiyoj kamachita Raquelman qollarqataj, paypa kamachin kananpaj.

³⁰ Ajinamanta Jacobqa Raquelwanpis puñuykullarqataj, paytataj Leamanta nisqa astawan munakorqa. Chaywanpis qanchis watatawanraj Labanpaj llank'aporqa.

Jacobpa churinkuna

³¹ Tata Dios rikorqa Lea pisipaj qhawasqa kasqanta. Chayrayku pay nerqa Lea wawayoj kananta. Raquel wawata rejsinantarí Tata Dios mana munarqachu.

³² Ajinaqa Lea Jacobpaj onqoj rikhurerqa, paqarichikuspataj, wawanta “Rubén” sutiwan suticharqa. Pay nerqa: Tata Dios llakisqa kasqayta rikuwan. Chayrayku qosay munakuwanqa paypaj wawata rejsisqayrayku, nispa.

³³ Chaymanta qhepata Leaqa ujtawan wawayoj kallarqataj. Chay wawata “Simeón” sutiwan sutichaspataj, nerqa: Tata Dios chejnisqa kasqayta yachasqanrayku, uj wawatawan qowan, nispa.

³⁴ Chay qhepata Leaqa ujtawan wawayoj kallarqataj, chay wawatataj “Leví” sutiwan suticharqa. Pay nerqa: Kunan qosayqa noqaman astawan k'askamuwanqa, paypaj kinsa wawataña rejsisqayrayku, nispa.

³⁵ Aswan qhepamantaj Leaqa ujtawan onqoj rikhurispa, wawayoj kallarqataj. Chantá chay wawata “Judá” sutiwan sutichaspa, nerqa: Kunanqa Tata Diosta yupaychasaj, nispa. Chaymantataj Lea manaña wawayojchu karqa.