Génesis 25 - DIOSPA QHELQACHISQAN DEUTEROCANONICAL

Abraham Ceturawan casaran

¹ Abraham ujtawan casarallarqataj, warminpa sutintaj Cetura karqa.

² Abrahampata qhepa warmin Ceturapi churinkuna karqanku: Zimram, Jocsán, Medán, Madián, Isbac, Súaj ima.

³ Jocsanpa churinkuna karqanku: Sebawan, Dedanwan ima. Dedanpa miraynintaj karqanku: Asurim, Letusim, Leumimwan ima.

⁴ Madianpa churinkunataj karqanku: Efa, Efer, Janoc, Abidá, Eldá ima. Chay tukuy Ceturaj miraynin karqanku.

⁵ Abrahamqa churin Isaacman tukuy kapuyninta qoporqa.

⁶ Chay ujnin warminkunapi wawankunamanrí ashkhata waqerqa. Jinataj Abraham manaraj wañupushaspa, waj warminkunapi churinkunata Isaacmanta karuncharqa, inti llojsimuynejman kachapuspa.

Abraham wañupun

⁷ Abrahamqa kawsarqa 175 watata.

⁸ Pay unayta kawsaspa allin machuña wañuporqa. Jinataj wañupuspa ñawpa tatankunaman riporqa.

⁹ Chantá churinkuna Isaacwan, Ismaelwan ima tatankoj ayanta Macpelapi chhanka jusk'uman p'amparqanku. Chayqa Mamremanta inti llojsimuynejpi kashan, jitita Sojarpa churin Efronpa jallp'anpi.

¹⁰ Chay jallp'ata jititakunamanta Abraham rantikusqa. Abrahamta warmin Sara p'ampasqa kasharqa, chayllamantaj p'amparqanku.

¹¹ Abraham wañupusqanmanta qhepata Diosqa churin Isaacta samincharqa. Isaactaj “Rikuwaj kawsaj Diospa pujyun” nisqaj qayllanpi tiyakorqa.

Ismaelpa miraynin

¹² Kaykuna Ismaelpa churinkuna kanku. Payqa Abrahampata chantá Agarpatawan churin karqa. Agarqa Egipto llajtayoj kaspa Saraj kamachin karqa.

¹³ Ismaelpa churinkuna paqarisqankuman jina, kuraj kajmanta qallarispa, ajina sutiyoj karqanku: Kuraj kajpa sutin Nebayot karqa, chantá Cedar, Adbel, Mibsán,

¹⁴ Misma, Duma, Massa

¹⁵ Hadar, Tema, Jetur, Nafís, Quedemá ima.

¹⁶ Chaykuna Ismaelpa chunka iskayniyoj churinkunajta sutinku karqa. Jap'iyninku, jarakunanku toldonkunapis sutillankuwantaj rejsisqa karqa. Sapa ujninku ayllunkupi kamachejkuna karqanku.

¹⁷ Ismaelqa 137 watayoj wañupuspa, ñawpa tatankunaman riporqa.

¹⁸ Mirayninmanta kajkunataj Javilawan Shurwan tinkuypi tiyakorqanku. Chayqa Egiptoj chimpanpi, Asiriaman rina ñanpi kashan. Paykunaqa wawqenkuna mana munashajtinkupis chaypi tiyakorqanku.

Jacobwan Esauwan paqarinku

¹⁹ Kaymin Abrahampata churin Isaacpa kawsayninmanta willay.

²⁰ Isaacqa Rebecawan casararqa, chaypacha tawa chunka watayoj karqa. Rebecaqa Betuelpa ususin karqa, Labanpa panantaj. Paykunaqa Padán Aram nisqa llajtayoj karqanku.

²¹ Rebeca mana wawayoj kayta atisqanrayku, Isaacqa warminrayku Tata Diosmanta mañaporqa. Tata Diostaj mañakusqanta uyarerqa. Jinamanta Rebecaqa onqoj rikhurerqa.

²² Chaywanpis wawakunaqa mamankoj wijsallanpiraj kashaspa maqanakoj kanku. Chayrayku Rebeca nerqa: Imajtintaj kay jinari? nispa. Chantá Tata Diosta tapurikoj rerqa.

²³ Tata Diostaj nerqa: Wijsaykipi kaj wawakunaqa iskay suyuta jatarichenqanku. Wijsallaykipiraj iskay ayllu t'aqanasqa kashanku. Ujnin kajqa ujninmanta aswan atiyniyoj kanqa, kuraj kajtaj sullk'anpa kamachin kanqa, nispa.

²⁴ Rebecaj onqokunan p'unchay chayamojtin, payqa iskayta qhepan qhepanta paqarichikorqa.

²⁵ Ñawpajta paqarejqa p'aqo, tukuy ukhuntaj thapulla karqa. Chayrayku “Esaú”, nispa suticharqanku.

²⁶ Chaymantataj qhepanpachata sullk'anñataj paqarerqa, Esaujpa chaki talonninta ujnin makinwan jap'irisqa. Chayrayku “Jacob” sutiwan suticharqanku. Isaac sojta chunka watayoj kashajtin, warmin Rebeca paypaj wawayoj karqa.

Esaú imatachus jap'inanta chhalarparin

²⁷ Chay iskay wawakuna wiñarqanku. Esauqa campo sonqo runa kaspa, k'ita animalkunata sumajta jap'iyta yacharqa. Jacobtajrí kakullaj kasqanrayku, wasillapi kakuyta munaj karqa.

²⁸ Isaacqa Esauta astawan munakorqa, k'ita animalta jap'isqanmanta mikhuchisqanrayku. Rebecatajrí Jacobta munakorqa.

²⁹ Uj kuti Jacob chuwimanta uchuta wayk'ushajtin, Esauqa monteta risqanmanta sayk'usqa chayamorqa.

³⁰ Chantá Jacobta nerqa: Ama jina kaspa, chuwi uchuta wayk'usqaykimanta uj chhikata qoriway ari. Yarqhaywan wañushaniña, nispa. Chayrayku payta “Edom”, nispa suticharqanku.

³¹ Jacobtaj nerqa: Ñawpajta kuraj kaj jina jap'inayki chayaqetaraj vendepuway, nispa.

³² Esautaj nerqa: Yarqhaywan wañushaniña. Wañusaj chayqa, kuraj kaj jina jap'inay, ima allintaj kanqa noqapaj? nispa.

³³ Jacobtajrí kutin kutinta nerqa: Kunanpacha tiluy qopunawaykita, nispa. Esautaj yarqhaywan mana kayta atispa, kuraj churi kaspa jap'inanta Jacobman vendepunanta tilorqa.

³⁴ Chantá Jacobqa t'antata, chuwi uchutawan Esauman jaywarqa. Esautaj mikhuspa, ujyaytawan ima riporqa. Ajinata Esauqa kuraj churi jina imatachus jap'inanta pisipaj qhawarqa.