Esdras 6 - DIOSPA QHELQACHISQAN DEUTEROCANONICAL

¹ Chantá kuraj kamachej Darioqa kamacherqa chayta Babiloniapi mask'anankuta, maypichus qhelqakunata waqaychaj kanku, chaypi.

² Chantá Media jap'iypi, Acmeta llajtapi, kamachina wasipi uj qhelqata tarerqanku, chaypitaj kay jina qhelqasqa kasqa:

³ Persiamanta kuraj kamachej Ciroqa uj watataña kamachishaspa, kay jinata kamacherqa: Jerusalenpi Diospa Templonqa watejmanta ruwasqa kachun, chaypi uywata ñak'aspa Diosman jaywanapaj. Jinaqa cimiento churakuchun. Chay waseqa sayayninman iskay chunka qanchisniyoj metro kachun, anchonmantaj iskay chunka qanchisniyoj metro kachun.

⁴ Perqanqa kinsa sinru jatuchaj ch'eqosqa rumimanta kachun, ujnin sinrutaj mosoj kurkumanta kachun. Chay ruwakunanpajqa kuraj kamachejqa paganqa.

⁵ Kuraj kamachej Nabucodonosorqa qorimanta, qolqe metalmanta ruwasqa imakunata Jerusalenpi Diospa Templonmanta orqhospa, Babiloniaman apachisqa. Kunantajrí chay tukuy ima Jerusalenman kutichisqa kachun, Diospa Templonpi maypichus kananku, chay kikinman churasqa kanankupaj, nispa. Ajinata kuraj kamachej Ciroqa kamachisqa.

⁶ Chayta ñawiriytawan, kuraj kamachej Darío kay jinata kamacherqa: Éufrates mayu chimpapi kamachej Tatenay, chantá Setar Bosnay, kamachej masiykichejkunawan ima,

⁷ qankuna Jerusalenmanta llojsiychej. Chantá saqeychej judiokunata, kamachejninkuta, kurajkunata ima Diospa Templonta maypichus kananpi ruwajta.

⁸ Jinallataj kamachiykichej qankunaqa judiokunaj kurajninkuta yanapanaykichejta, Diospa Templonta watejmanta ruwachinankupaj. Éufrates mayu chimpamanta noqapaj impuesto qolqeta paganku, chay qolqemanta orqhospa, ruwajkunaman pagankichejpuni ajinamanta Templo ruwanaqa ama sayananpaj.

⁹ Amallataj qonqaychejchu sapa p'unchay kay imakunata jaywayta Jerusalenpi sacerdotekunaj nisqankuman jina: Torillokunatachus, carnerokunatachus, chayrí corderokunatachus, janaj pachapi kaj Diosman jaywaspa q'olachinankupaj. Paykunaman qollankichejtaj trigota, kachita, vinota, aceitetawan ima.

¹⁰ Ajinamanta chay imakunata ima munay q'apashajta jaywanqanku janaj pachapi kaj Diosman, chantapis noqapaj, wawaykunapajpis Diosmanta mañaripuwasqayku.

¹¹ Kamachillanitaj, pillapis kay kamachisqayta mana kasojtaqa paypa wasillanmantataj uj k'aspita sik'ispa, chaypi t'ojsisqata chakatachunku. Chaymantataj wasinta thuñispa, chay cheqataqa q'opa wijch'unaman tukuchichunku.

¹² Sichus mayqen kuraj kamachejpis, chayrí llajtapis, Jerusalenpi kashan, chay Temploj contranpi mana allinta ruwayta munanqa chayqa, pichus sutin yupaychasqa kananpaj Jerusalenta ajllakoj Diosmin paytaqa chinkarparichichun. Noqa Darío kaytaqa kamachini, kay nisqaytaj kikinpuni junt'akuchun, nispa.

Templota ruwayta tukuychanku

¹³ Chaypacha, Éufrates mayu chimpapi kamachej Tatenay, chantá Setar Bosnaywan, kamachej masinkunawan ima kuraj kamachej Daríoj kamachisqantaqa kikintapuni junt'arqanku.

¹⁴ Ajinamanta judiokunata kamachejkuna watejmanta Templota ruwallarqankupuni, Diosmanta sut'inchaj Hageoj nisqanman jina, chantá, Iddojpa wawan Zacarías Diosmanta sut'inchajpa nisqanman jina. Chantá Templota ruwayta tukuycharqanku, imaynatachus Israelpa Diosnin kamachisqanman jina, chantapis Persiamanta kuraj kamachejkuna Ciro, Darío, Artajerjes ima kamachisqankuman jinataj.

¹⁵ Chay Temploqa tukuychasqa karqa, Adar nisqa killamanta kinsa p'unchay kashajtin, Persiapi kuraj kamachej Darío sojta watataña kamachishajtin.

¹⁶ Chaypachaqa israelitakuna, sacerdotekuna, levitakuna, chantá wajkunawantaj, Babiloniaman apasqa kasqankumanta kutimpusqanku, chaykunaqa manchay kusisqa chay Templota Diosman jaywaporqanku.

¹⁷ Chaypacha Diosman jaywarqanku 100 torillokunata, 200 carnerokunata, 400 corderokunatataj. Chantapis chunka iskayniyoj chivokunatapis jaywallarqankutaj tukuynin israelitakunaj juchankumanta, mashkha jatun aylluchus kasqankuman jina.

¹⁸ Chaymantataj sacerdotekunataqa mit'ankuman churarqanku, jinallataj levitakunatapis churallarqankutaj sapa ujta ruwananman, Jerusalenpi Diosta yupaychanankupaj, Moisespa qhelqasqaman jina.

¹⁹ Chantá Babiloniaman apasqa kajkunamanta kutimpojkunaqa Pascua raymita ruwarqanku, ñawpaj kaj killamanta chunka tawayoj p'unchaypi.

²⁰ Sacerdotekuna, chantá, levitakuna imaqa mayllakusqankurayku tukuyninku Diospa ñawpaqenpi llimphupaj qhawasqaña karqanku. Chaymanta Pascua raymipi jaywana kajta jaywarqanku, waj suyuman apasqa kasqankumanta kutimpusqanku, chay tukuyninkurayku, sacerdotekunarayku, jinallataj paykuna kikinkuraykupis.

²¹ Tukuynin israelitakuna, pikunachus Babiloniamanta kutimpojkunaqa Pascua raymipi wakichisqa mikhuyta mikhorqanku. Jinallataj chay jallp'api tiyakojkunamanta, pikunachus Israelpa Tata Diosninta yupaychayta munaspa, millay kawsayninkumanta t'aqakusqanku, chaykunapis Pascua mikhuyta mikhorqanku.

²² Qanchis p'unchay junt'ata Mana Levadurayoj T'anta raymita manchay kusiywan ruwarqanku, imaraykuchus Tata Diosqa Asiriamanta kaj kuraj kamachejpa sonqonta llamp'uyachisqa, Israelpa Diosninpa Templonta ruwayta yanapananpaj.