Esdras 5 - DIOSPA QHELQACHISQAN DEUTEROCANONICAL

Judiokuna Templota watejmanta ruwanku

¹ Chaypacha Diosmanta sut'inchajkuna Hageo, chantá Iddojpa churin Zacariaswan ima willarqanku Israelpa Diosnin imatachus nisqanta Judapi, jinallataj Jerusalenpi tiyakojkunaman.

² Chayrayku Salatielpa churin Zorobabel, Josadacpa churin Josué ima watejmanta Jerusalenpi Diospa Templonta ruwayta qallarerqanku. Diosmanta sut'inchajkunataj paykunata yanaparqanku.

³ Chaywanpis Éufrates mayu chimpapi kamachej Tatenay, chantá Setar Bosnaywan, kamachej masinkunawan ima rispa, judiokunata tapumorqanku: Pitaj kamachisunkichej kay Templota watejmanta ruwanaykichejtari, chantá, kay perqatapis sayarichinaykichejtari?

⁴ Imataj sutinku, kay wasita watejmanta ruwachishanku, chaykunajtari? nispa.

⁵ Chaywanpis judiokunaj kurajninkutaqa Dios waqaychasharqa. Chayrayku mana jark'arqankuchu Templo ruwanankuta, kuraj kamachej Darioman cartata apachejtinku kutichimunankama.

⁶ Kuraj kamachej Darioman kay cartata apacherqanku, Éufrates mayu chimpapi kamachej Tatenay, Setar Bosnaywan, chantá kamachej masinkuna ima.

⁷ Chay cartapitaj nerqanku: Kuraj kamachej Darío, qanta napaykamuyku, walejlla kanaykita munaspa.

⁸ Kayta willamuyku qanman: Judá jap'iyta watumuspa, atiyniyoj Diospa Templonta rikorqayku. Chay wasita watejmanta ruwashanku jatuchaj sumaj ch'eqosqa rumiwan. Kunantaj perqaman tablakunata churaykushankuña. May usqhayllata ruwashanku.

⁹ Jinapi judiokunaj kurajninkuta tapurerqayku: Pitaj kamachisunkichej watejmanta Templota ruwanaykichejta, kay perqatapis sayarichinaykichejtari? nispa.

¹⁰ Chantapis tapurillarqaykutaj ima sutiyojchus kasqankuta chay ruwachejkuna, sutinkuta qhelqaspa, qan kuraj kamachejniykuman apachimunaykupaj.

¹¹ Paykunatajrí niwarqayku: Noqaykoqa janaj pachapi jinallataj kay pachapipis kashan, chay Diospa kamachinkuna kayku. Watejmanta kay Templota ruwashayku, mayqentachus Israelpa ujnin kuraj kamachejnin ruwachisqa tukuchinankama, chayta.

¹² Qhepamantajrí ñawpa tataykukunaqa janaj pachapi kaj Diosta phiñachisqanku. Chayrayku paykunata Diosqa Babiloniamanta kuraj kamachej Nabucodonosorman jaywaykusqa. Payqa Caldea llajtayoj karqa. Chay Templota urmachiytawantaj, israelitakunata Babiloniaman presota apachisqa.

¹³ Chay qhepatarí kuraj kamachej Ciroqa uj wataña Babiloniapi kamachishaspa, Diospa Templon watejmanta ruwakunanta kamachisqa.

¹⁴ Nillawarqaykutaj: Kuraj kamachej Nabucodonosorqa Jerusalenpi kaj Diospa Templonmanta qorimanta ruwasqa imakunata, qolqe metalmanta ruwasqa imakunatawan orqhospa, Babiloniapi kaj templonman churachisqa. Chay qhepatataj kuraj kamachej Ciroqa chay qori imakunata, qolqe metalmanta imakunatawan Babiloniapi kaj templomanta orqhochimuspa, jaywasqa Sesbasar sutiyoj kamachejman.

¹⁵ Paytataj nisqa: Kay qorimanta ruwasqa imakunata, qolqe metalmanta ruwasqa imakunatawan Jerusalenpi Temploman apay. Diospa Templontataj, maypichus ñawpajta karqa, chay kikinpi watejmanta sayachiy, nispa.

¹⁶ Ajinamantataj Sesbasar chayamuspa, Jerusalenpi Diospa Templonta ruwayta qallaricherqa. Chaymantapachataj Templota watejmanta ruwashanku, manataj tukuchasqarajchu kashan.

¹⁷ Kunan kuraj kamachejniyku, sichus allin rijch'asunkiman chayqa, mañakuyku Babiloniapi kuraj kamachejkunaj ñawpa ruwasqankumanta willaj qhelqapi mask'achinaykita jinapunichus manachus kuraj kamachej Ciroqa kamachisqanta Jerusalenpi Diospa Templon watejmanta ruwakunanta. Chantá willamuwayku qan kamachejniyku chaymanta imatachus ninki, nispa.