Eclesiastés 3 - DIOSPA QHELQACHISQAN DEUTEROCANONICAL

Tukuy imapis tiempoyojlla

¹ Kay pachapeqa tukuy imapajpis tiempo tiyan. Kay jallp'a patapi tukuy imata ruwanapajpis phani tiyan.

² Uj tiempoqa paqarinapaj tiyan, uj tiempotaj wañunapaj. Uj tiempoqa mallkinapaj tiyan, uj tiempotaj poqosqanta oqharinapaj.

³ Uj tiempoqa wañuchinapaj tiyan, uj tiempotaj jampinapaj. Uj tiempoqa thuñinapaj tiyan, uj tiempotaj wasichanapaj.

⁴ Uj tiempoqa waqanapaj tiyan, uj tiempotaj asinapaj. Uj tiempoqa llakikunapaj tiyan, uj tiempotaj kusikunapaj.

⁵ Uj tiempoqa rumita choqanapaj tiyan, uj tiempotaj rumita tantanapaj. Uj tiempoqa ojllanapaj tiyan, uj tiempotaj karunchakunapaj.

⁶ Uj tiempoqa mask'anapaj tiyan, uj tiempotaj chinkachinapaj. Uj tiempoqa waqaychanapaj tiyan, uj tiempotaj wijch'unapaj.

⁷ Uj tiempoqa llik'inapaj tiyan, uj tiempotaj siranapaj. Uj tiempoqa ch'inyanapaj tiyan, uj tiempotaj parlanapaj.

⁸ Uj tiempoqa munakunapaj tiyan, uj tiempotaj chejnikunapaj. Uj tiempoqa maqanakunapaj tiyan, uj tiempotaj sonqo tiyaykusqa kawsakunapaj.

⁹ Runa ima allintataj tarin chay jinatapuni llank'asqanmantari?

¹⁰ Noqa reparani, kay sinch'i ruwanata Dios runaman qosqanta, chaywan k'umuykuchinanpaj.

¹¹ Diosqa tukuy imata ruwarqa maychus tiemponpi k'achitu kananpaj. Payllataj runaj sonqonman wiñay kasqanpi yuyanata churarqa. Chaywanpis runaqa imatachus Dios qallariymantapacha ruwasqanta kunankama, manapuni yachayta atinchu.

¹² Noqa imachus runapaj astawan allin kasqanta yachani: Payqa kusikunan, kawsanankamataj allin kajta ruwanan.

¹³ Ajinallatataj yachani Diosqa tukuy runaman llank'aspa tarisqankumanta kawsanankupaj qosqanta, mikhunankupaj, ujyanankupaj ima.

¹⁴ Chantá yachallanitaj Diospa tukuy ima ruwasqanqa wiñaypajpuni kananta. Chay imatachus ruwasqanmanqa mana pipis yapaykuyta nitaj pisiyachiyta atinchu. Diosqa ajinata ruwarqa, tukuy runakuna payta may jatun respetowan qhawananchejpaj.

¹⁵ Imachus kunan kajqa ñawpajta karqaña. Imachus qhepaman kanqa, chaypis ñawpajta kallarqataj. Imachus ñawpajta karqaña, chayta Dios watej kutichimonqa.

Kawsaypi mana allin kajkuna

¹⁶ Kay pachapi rikullarqanitaj justicia kananmantaqa millay ruwaylla kasqanta, imapis cheqan kananmantaqa mana allin kajlla kasqanta.

¹⁷ Chaypacha sonqoypi nerqani: Cheqan runatawan, millayta ruwaj runatawanqa Dioslla juzganqa, imaraykuchus tukuy ima ruwanapajpis tiempo kanqa, nispa.

¹⁸ Runaj kawsayninmanta sonqoypi unancharispa nillarqanitaj: Diosqa imaymanata runaj kawsayninkupi ruwaspa, pay yachanankuta munan uywakuna jinalla kasqankuta.

¹⁹ Runawan, uywakunawan imaqa tukukapuyniyojlla kanku: Uywakunaqa wañunku, runakunapis wañullankutaj. Jinallataj samayninkupis iskayninkojta ujlla. Runakunaqa uywakunamanta mana astawan sumajchu kanku. Chay tukuy ima qhasi manakajlla kasqanta repararqani.

²⁰ Tukuyninku uj cheqallaman rinku. Jallp'amanta ruwasqa karqanku, jallp'allamantaj tukuponqanku.

²¹ Ajinamanta sonqoypi chaymanta unancharqani: Pitaj yachanman runaj espíritun janaj pachaman ripusqanta, uywakunajtataj ukhu pachaman yaykusqantari? nispa.

²² Chaynejta noqa repararqani runapajqa astawan allin llank'aspa tarisqanwan kusikunan, imaraykuchus chaypuni runapaj churasqa kashan. Mana pipis payman rikuchenqachu wañupusqan qhepata imachus kananta.