Daniel (hebreo) 8 - DIOSPA QHELQACHISQAN DEUTEROCANONICAL

Daniel carnerota chivotawan mosqoypi jina rikun

¹ Kuraj kamachej Belsasar kinsa watataña kamachishajtin, noqa, Daniel ñawpaj mosqoypi jina rikusqaymanta qhepata ujtawan mosqoypi jina ujta rikullarqanitaj.

² Mosqoypi jina rikusqaypi noqa Susa llajtapi, Elam jap'iypi, Ulay nisqa mayu kantupi kashasqani.

³ Chantá qhawaspa, mayu kantupi uj carnerota rikorqani. Chay carnero iskay jatuchaj wajrayoj kasqa. Ujnin wajra qhepataña wiñasqa chaypis, chay ujninmanta aswan jatun kasqa. Chay astawan jatun kaj qhepataña wiñasqa.

⁴ Chay carneroqa tukuy imata wajrasqa inti yaykuynejman, wichaynejman, uraynejmantaj. Mana ima uywapis ñawpaqenpi sayaykuyta atisqachu nitaj atiyninmanta kacharichikuyta atisqachu. Imatapis munasqanta ruwasqa, jinataj astawan astawan kallpayojman tukusqa.

⁵ Imatachus rikusqaypi unanchashajtillayraj, inti yaykuynejmanta uj chivo rikhurimusqa. Phawarispa jamushasqanrayku, chakin mana pampamanpis sarusqachu. Chay chivoj iskaynin ñawin chawpinejpi uj k'ata jatun wajran kasqa.

⁶ Chantá mayu kantupi rikusqay iskay jatuchaj wajrayoj carneroman phawaykuspa, chay chivoqa tukuy kallpanwan carnerota t'eqeykusqa,

⁷ jinaspataj iskaynin wajranta p'akirparisqa. Chayrayku carneroqa manaña kutichikuyta atisqachu. Chantá chivoqa carnerota pampaman urmachispa, sarusqa, nitaj pipis carnerota chivomanta kacharichej kasqachu.

⁸ Jinapi chivoqa manchay atiyniyojman tukusqa. Chaywanpis kallpanpi kashajtin, jatun wajran p'akikusqa, chantá p'akikusqan wajramanta tawa wajrakuna p'utumusqanku. Chay wajrakunataj tawantin ladoman qhawashaj wiñasqanku.

⁹ Chantá ujnin wajranmanta uj juch'uy wajra wiñasqa, chaytaj manchayta wiñasqa uraynejman, inti llojsimuynejman, sumaj jallp'anejman ima.

¹⁰ Chantá janaj pacha ch'askakunaman chayanankama wiñasqa. Jinataj chay ch'askakunamanta wakinta pampaman urmachimuspa, sarurasqa.

¹¹ Chaymantataj ch'askakunata kamachejpa contranpi sayaykusqa, Diosman sapa p'unchay jaywanatapis sayachisqa, Diosta yupaychana cheqatataj manakajman tukuchisqa.

¹² Sajra sonqowan, maypichus Diosman jaywanata q'olachej kanku, chayman soldadonkunata jaraykuchisqa, cheqa kaj kamachisqakunatataj manakajpaj qhawasqa. Tukuy imatapis munasqanta ruwasqa, tukuy imapitaj allin risqa.

¹³ Chay qhepata uj angelqa waj angelta tapurishajta uyarerqani: Mayk'ajtaj tukukonqa imachus sapa p'unchay jaywana altarpi rikukushan, chayri? Mayk'ajkamataj Templopi millayta juchallispa kanqankuri? Mayk'ajkamataj Diosta qhatejkunata saronqankuri? nispa.

¹⁴ Chay uj angeltaj kuticherqa: Iskay waranqa kinsa pachajniyoj p'unchaykuna pasanankama, chaymantaraj Diospa Templon llimphuchasqa kanqa, nispa.

Ángel Gabriel Danielpa mosqokusqanta sut'inchan

¹⁵ Noqa Daniel, mosqoypi jina rikusqayta qhawashaspa, imatachus niyta munasqanta yachayta munarqani. Jinallapi ñawpaqeypi sayashaj runaman rijch'akoj rikhurerqa.

¹⁶ Ulay nisqa mayumantataj uj runata parlamojta uyarerqani, paytaj nerqa: Gabriel, kay runaman mosqoypi jina rikusqanta sut'inchay, nispa.

¹⁷ Chantá Gabriel qayllaykamuwarqa. Noqataj mancharispa, pampakama k'umuykorqani. Paytajrí niwarqa: Runaj churin, kayta yachay: Chay mosqoypi jina rikusqaykeqa kay pachaj tukukuyninmanta willashan, nispa.

¹⁸ Pay parlashawajtillanraj, yuyayniy chinkawarqa, pampapitaj wijch'usqa rikhurerqani. Chantá pay jamuspa, sayarichiwarqa.

¹⁹ Jinaspataj, niwarqa: Kunan willasqayki, Diospa phiñakuynin tukukuyta imachus kananmanta, imaraykuchus imatachus mosqoypi jina rikusqaykeqa chay tukukuy tiempomanta willashan.

²⁰ Iskay wajrayoj carnerota rikusqaykeqa Mediaj kuraj kamachejninwan, jinataj Persiaj kuraj kamachejninwan ima ninakun.

²¹ Chivotaj Greciaj kuraj kamachejninwan ninakun. Chivoj iskaynin ñawinpa chawpinpi kaj jatun wajrantaj Greciaj ñawpaj kaj kuraj kamachejninwan ninakun.

²² Chay jatun wajra p'akikojtin, cuentanmanta tawa wajrakuna p'utumusqanku, chay niyta munan chay suyumanta tawa kuraj kamachejkuna sayarinankuta. Chaywanpis mana ñawpaj kaj kuraj kamachej jina atiyniyojchu kanqanku.

²³ Manaña chay tawa kuraj kamachejkuna kamachishajtinku, millay ruwanapis anchaña kanqa. Chantá machu machu uj kuraj kamachej sayarenqa, paytaj ch'awkiyanapaj churasqa kanqa.

²⁴ Atiyniyoj kanqa chaypis, chay atiynenqa mana payllamantachu kanqa. Chantá t'ukunapaj jina tukuy imatapis phirenqa, tukuy ima ruwasqanpitaj allin renqa. Atiyniyoj runakunata chinkachenqa. Diospa ajllasqan ayllumantapis ashkhatapuni chinkachillanqataj.

²⁵ Ch'awkiyanapaj churasqa kasqanrayku, tukuy millay ruwasqanpi allin renqa, maytataj runaykachanqa. Ni imamanta llakiyniyoj tiyakojkunata wasanchaspa, ch'inllamanta wañurachenqa. Tukuy Kurajkunaj Kurajninkoj contranpipis sayaykullanqataj. Chay Kuraj Kajrí millay kuraj kamachejta atipanqa. Chaytaqa mana pi runachu ruwanqa.

²⁶ Ch'isin paqarintaj mosqoypi jina rikusqaykeqa cheqapuni. Kunantaj chayta sonqoykipi waqaychay, imaraykuchus unaymantaraj junt'akonqa, nispa.

²⁷ Chay qhepata noqa Daniel mana kallpayoj rikhurerqani, chantá unaysituta onqosqa karqani. Chaymanta jatarikuspa, imatachus Babiloniaj kuraj kamachejpaj ruwanay karqa, chayta ruwallarqanipuni. Chaywanpis imatachus rikusqaymanta anchata t'ukusharqani, nitaj imatachus niyta munasqanta sut'inchayta aterqanichu.