Daniel (hebreo) 3 - DIOSPA QHELQACHISQAN DEUTEROCANONICAL

Qorimanta lanti

¹ Uj kuti kuraj kamachej Nabucodonosorqa qorimanta uj lantita ruwacherqa. Chay lantej sayaynenqa kinsa chunka metro karqa, rakhuntaj kinsa metro. Chantá Nabucodonosor kamacherqa Babilonia suyupi, Dura nisqa cheqapi chay lantita sayachinankuta.

² Pay kamachillarqataj wajyachinankuta tukuynin kamachejkunata, soldado kamachejkunata, juch'uy llajtakunapi kamachejkunata, kamachejpa yuyaychajninkunata, qolqeta waqaychajkunata, juezkunata, waj kurajkunata ima ruwachisqan lanti sayachisqa kasqanmanta raymichanankupaj.

³ Chayrayku tukuyninku chay lantej ñawpaqenman tantakamorqanku, lantita raymichanankupaj.

⁴ Jinapi lanti raymichayta qallarej jatunmanta qhaparispa, nerqa: Tukuy suyukunamanta, tukuy llajtakunamanta kajkuna, imaymana parlayniyojkuna ima, uyariwaychej:

⁵ Maypachachus putututa, pinkilluta, bombota, arpata, salteriota, zampoñata ima waqajta uyarinkichej chaypacha, pampakama k'umuykuspa, kuraj kamachej Nabucodonosorpa ruwachisqan qori lantita yupaychankichej.

⁶ Tukuy pikunachá mana pampakama k'umuykuspa lantita yupaychanqankuchu, chaykuna chaypachapacha lawrashaj uj jatun hornoman wijch'uykusqa kanqanku, nispa.

⁷ Jinataj, tantasqa karqanku, chay runakuna tocanakunaj waqasqanta uyariytawankama, pampakama k'umuykorqanku qorimanta ruwasqa lantita yupaychanankupaj.

⁸ Chaywanpis Caldeamanta wakin runakuna judiokunawan jap'inakuspa, kuraj kamachej Nabucodonosorman rerqanku, wakin judiokunata ch'ataykunankupaj.

⁹ Paykuna nerqanku: Jallalla, jallalla, kuraj kamachejniyku, wiñaypaj kawsay, sutiykitaj yuyarisqapuni kachun.

¹⁰ Kamachejniyku, qan kamacherqanki: Maypachachus runakuna tocanakunaj waqasqanta uyarispa, pampakama k'umuykuytawan, qorimanta ruwasqa lantiyta yupaychachunku, nispa.

¹¹ Nillarqankitaj pichus mana jinata ruwajqa lawrashaj jatun hornoman wijch'uykusqa kananta, icharí?

¹² Chaywanpis wakin judiokuna tiyan, pikunatachus Babilonia jap'iypi kamachejkuna kanankupaj churarqanki, chaykuna. Paykunaqa mana kasuta ruwasunkuchu, nitaj qorimanta ruwachisqayki lantitapis yupaychankuchu. Sutinkoqa Sadrac, Mesac, Abednego ima, nispa.

¹³ Chantá Nabucodonosor manchayta phiñakuspa, Sadracta, Mesacta, Abednegotawan ñawpaqenman pusamunankuta kamacherqa. Ñawpaqenpi sayashajtinkutaj,

¹⁴ Nabucodonosor paykunata taporqa: Cheqachu qankuna diosniykunata mana jatunchankichejchu, nitaj qorimanta ruwachisqay lantitapis yupaychankichejchu?

¹⁵ Kunanrí ujtawan pututoj waqasqanta, chay waj tocanakunaj waqasqanta ima uyariytawan, pampakama k'umuykuspa lanti ruwachisqayta yupaychankichejchu, chayrí manachu? Sichus lantiyta mana yupaychankichej chayqa, chaypachapacha sumaj parichisqa hornoman wijch'uykusqa kankichej. Chaypacha, ima diostaj qankunata makiymanta kacharichiyta atisunkichejmanri? nispa.

¹⁶ Jinapi chay kinsantin waynakuna Nabucodonosorman kuticherqanku: Kamachejniyku, kaymanta mana imatapis parlana kanchu.

¹⁷ Noqayku yupaychayku, chay Diosniykumá nina lawrashaj hornoman wijch'uykuwasqaykumanta qhespichiyta atiwayku. Jinallataj qan mana allin kajta ruwanawaykuta yuyashanki, chaymantapis kacharichiwasqayku.

¹⁸ Mana kacharichiwaykumanchu chaypis, kamachejniyku, kayta allinta yachay: Manapuni diosniykikunata yupaychasqaykuchu, nitaj pampakama k'umuykusqaykuchu qorimanta ruwasqa lantiykej ñawpaqenpi, nispa.

Kinsantin waynakuna hornomanta qhespichisqa kanku

¹⁹ Nabucodonosor imachus nisqankuta uyariytawan, chay kinsantin waynakunaj contrankupi sinch'ita phiñakusqanrayku, uyan pukayarqa. Chantá soldadonkunata kamacherqa hornota qanchis kutitawan astawan parichinankuta.

²⁰ Kamachillarqataj astawan wapu soldadonkunaqa Sadracta, Mesacta, Abednegotawan wataykuspa, sumaj parichisqa hornoman wijch'uykunankuta.

²¹ Chantá soldadokuna kinsantin waynakunata wataykuspa, sumaj parichisqa hornoman wijch'uykorqanku, paykuna kurajkuna kasqankurayku ima p'achawanchus p'achallikoj kanku, chay jina p'achallisqata.

²² Kuraj kamachejqa horno manchay parichisqa kananta kamachisqanrayku, pikunachus waynakunata wijch'uykusharqanku, chay soldadokunaqa ninaj ruphasqan wañorqanku.

²³ Chay kinsa waynakunataj sumaj parichisqa horno ukhuman watasqa urmaykorqanku.

²⁴ Chaywanpis tumpamantawan kuraj kamachej Nabucodonosorqa chayta mayta mancharikuspa, ujllata sayarerqa, jinaspataj yuyaychajninkunata nerqa: Manachu kinsa runakunata ninaman wijch'uykucherqanchej? nispa. Paykunataj kuticherqanku: Arí, kinsalla karqanku, nispa.

²⁵ Nabucodonosortajrí nerqa: Noqa tawa runakunata rikushani phaskarasqata, jinataj nina ukhupi mana imanasqa purishajta. Chay tawa kaj runataj dioskunaj churinman rijch'akun, nispa.

²⁶ Chantá horno punkuman qayllaykuspa, Nabucodonosor qhaparerqa: Sadrac, Mesac, Abednego, Patapi Kaj Diospa kamachinkuna, llojsimuychej, kaymantaj jamuychej, nispa. Chantá kinsantin runakuna nina lawrashaj chawpimanta llojsimorqanku.

²⁷ Jinapi chay suyumanta tukuy kamachejkuna waynakunaman qayllaykuspa, repararqanku waynakunaj ukhunkoqa mana ruphasqachu kasqanta, nitaj chujchankupis q'aspasqachu kasqanta. P'achankupis pachallan kakushasqa, nitaj q'oshñej q'apaynillanpis paykunapi kasqachu.

²⁸ Chantá kuraj kamachej Nabucodonosor jatunmanta qhaparerqa: Yupaychasqa kachun Sadracpata, Mesacpata, Abednegojpatawan Diosninku, pichus angelninta paykunata waqaychananpaj kachamorqa, chay. Kuraj kamachej kajtiypis, kamachisqayta mana kasorqankuchu. Aswanpis wañuyta mana manchachikuspa, Diosninkumanta jawa waj diosman manapuni k'umuykorqankuchu nitaj yupaycharqankuchu.

²⁹ Chayrayku noqa kayta kamachini: Sichus pipis kay waynakunaj Diosninkoj contranpi imatapis parlanman chayqa, mayqen suyumantapis, chayrí mayqen parlayniyojpis kachun, pay wañuchisqa kanqa, ayantaj chhikan chhikan khuchurasqa kanqa. Wasinpis thuñisqallataj kanqa, imaraykuchus chay jinata qhespichej Dios jina manapuni waj dios kanchu, nispa.

³⁰ Chaymantapachataj kuraj kamachejqa chay kinsa waynakunata Babilonia jap'iypi aswan jatun ruwanaman churarqa.