Amós 6 - DIOSPA QHELQACHISQAN DEUTEROCANONICAL

Tata Diosqa Israelta jasut'enqa

¹ Ay, Sionpi ni imamanta llakiyniyoj kawsajkuna. Ay, pikunachus ni imamanta manchachikuspa Samariapi tiyakojkuna. Qankunaqa jatunpaj qhawasqa kankichej waj suyukunapi, jinataj israelitakuna yanapata mask'aspa, qankunaman rinku.

² Chaywanpis Calneman riychej, qhawariychejtaj. Chaymantataj jatun llajta Jamatman riychej, chaymantataj filisteokunaj llajtanku Gatman urayk'uychej. Reparaychej: Qankuna chay runakunamanta astawan sumajchu kankichej? Qankunaj llajtaykichejqa paykunajmanta astawan jatunchu?

³ Qankunaqa llakiy p'unchay kananta karunchayta munankichej. Chaywanpis kallpaman atinikuspa ñak'arichiy kawsayta aysamushankichej.

⁴ May valorniyoj marfilmanta ruwasqa puñunapi winkurinkichej. Raymikunaykichejpipis tiyanaykichejpi thallarinkichej. Corderokunata, wira torillokunata ñak'aspa, aycha mat'ata mikhurinkichej.

⁵ Arpaj waqayninpi imapis kachunta takirinkichej, ñawpaj kuraj kamachej Davidpis kawajchej jinataj mosoj tocanakunata ruwakunkichej.

⁶ Jatuchaj copapi vinotapis ujyankichej, sumachaj q'apashaj jawinawan jawikunkichej, manataj llakikunkichejchu llajtaykichej mana allin kashasqanmanta.

⁷ Chayrayku qankuna ñawpajta waj suyuman apasqa kankichej, ajinataj raymiykunapi munasqaykichejta ruwasqaykichej tukukonqa.

⁸ Tukuy Atiyniyoj Tata Dios sutinpi tiluspa nin: Israelitakunaj wapuykachasqankuta chejnini, kamachinanku wasikunatataj mana rikuyta atinichu. Kay llajtata awqankuman jaywasaj, imankunachá tiyan, chaytawan, nispa.

⁹ Chaypacha, chunka qharikunachus uj wasipi qhepakonqanku chayqa, chunkantin wañonqanku.

¹⁰ May manchachikuna kasqanrayku, wañojpa ayllun wasimanta ayllunpa ayanta orqhoshajtin, wasipi puchojta taponqa: Pipis qanwan kanchu? nispa. Tapoj runataj kutichenqa: Mana, nispa. Wasiman yaykojtaj nenqa: Ch'in kay, pajtá Tata Diospa sutinta oqharishawaj, nispa.

¹¹ Chay ajina kanqa, imaraykuchus Tata Dios jasut'ita apachimonqa jatuchaj wasikunaman, juch'uychaj wasikunamanwan, ajinamantataj tukuy wasikuna thuñisqa, chinkachisqataj kanqanku.

¹² Caballokuna atinkumanchu chhankata wichariyta? Atinmanchu pipis mama qochapi yuntawan llank'ayta? Qankunarí justiciata wañunaman tukuchinkichej, justiciaj ruwasqantataj jayaman tukuchinkichej.

¹³ Yanqhallata jatunchakuspa kusikunkichej: Kallpallanchejwan atiyniyoj kanchej, nispa.

¹⁴ Israelitakuna, qankunaqa allinta qhawakuychej, imaraykuchus Tukuy Atiyniyoj Tata Dios kay jinata nisunkichej: Qankunaj contraykichejpi uj suyuta sayarichisaj. Paykunataj sonqo nanayta ñak'arichisonqachej, Jamat llajtaman yaykuna q'asamantapacha Arabá mayukama, nispa.