Amós 4 - DIOSPA QHELQACHISQAN DEUTEROCANONICAL

¹ Samariamanta warmikuna, uyariychej kay nisqayta: Qankunaqa Basanmanta kaj wira waka jina kankichej. Qankuna wajchakunata ñak'arichinkichej, pisichikojkunatataj waqachinkichej. Qosaykichejtataj kamachinkichej: Apamuy vinota machanaykupaj, nispa.

² Tukuyta Kamachej Tata Diostajrí may llimphu kayninrayku tiluspa, nin: Uyariwaychej, jamoj p'unchaypi qankunata ganchowan jap'ispa apasonqachej, wawaykichejkunapis anzuelowan watasqa kanqanku.

³ Llajtaj perqan q'asanta sinrulla ujmanta uj llojsinkichej, jinataj Hermón orqoman wijch'usqa kankichej. Noqa Tata Diosmin chayta nini.

Israelitakuna Diosman mana kutirikunkuchu

⁴ Israelitakuna, Betelman juchallej riychej, Gilgalpitaj astawan contraypi oqharikuychej. Tutamanta uywa ñak'asqa jaywanata apamuychej, sapa kinsa p'unchaytaj chunkamanta ujta t'aqasqaykichejmanta qoychej.

⁵ Pachis nispa, jaywanata jina mana levadurayoj t'antata q'olachiychej. Sonqomanta munaspa, jaywanata apamusqaykichejmantapis tukuyman willaramuychej. Chayta ruwaspa, manchayta kusikunkichej, icharí? Noqa Tukuyta Kamachej Tata Diosmin chayta nini.

Israelitakuna mana wanankuchu

⁶ Noqaqa tukuy llajtaykichejkunapi yarqhaywan ñak'aricherqaykichej, tukuy juch'uy llajtakunapitaj mikhunamanta pisicherqaykichej. Chaywanpis qankuna mana noqaman kutirikamuwarqankichejchu. Noqa Tata Diosmin chayta nini.

⁷ Poqoyta oqharinapaj kinsa killaraj kashajtin, mana parachimorqanichu. Uj llajtaman parachimorqani, ujmantaj mana. Wakin chajrakunapaj paracherqani, wakintaj paramanta jina ch'akiporqanku.

⁸ Chantá runakuna llajtamanta llajta yakuta mask'aspa purerqanku, manataj ch'akiyninkuta thasnunankupaj tarerqankuchu. Chaywanpis qankuna manapuni noqaman kutirikamuwarqankichejchu. Noqa Tata Diosmin chayta nini.

⁹ Chantá ch'aki wayrawan jasut'erqaykichej, chajraykichejtapis khuruwan tukuykucherqani. Huertaykichejta ch'akicherqani, jinallataj uva sach'aykichejtapis. Phinki phinkikunawan higo sach'aykichejta, olivo sach'aykichejta ima tukuykucherqani. Qankunatajrí mana noqaman kutirikamuwarqankichejchu. Noqa Tata Diosmin chayta nini.

¹⁰ Imaynatachus Egiptoman millay onqoykunata kachaykamorqani, ajinallatataj onqoykunata kachaykamorqaykichej. Saqerqani waynaykichejkuna maqanakupi wañuchisqa kanankuta, saqellarqanitaj awqaykichej caballoykichejkunata qhechusunaykichejta. Wañojniykichejpa asnasqankuta jaraykichejpi muskhicherqaykichej. Chaywanpis qankuna manapuni noqaman kutirikamuwarqankichejchu. Noqa Tata Diosmin chayta nini.

¹¹ Sonqo nanayta phiriykorqaykichej, imaynatachus Sodomata, Gomorratawan ruwarqani, ajinata. Ninamanta orqhosqa nina k'aja jina karqankichej. Chaywanpis manapuni noqaman kutirikamuwarqankichejchu. Noqa Tata Diosmin chayta nini.

¹² Chayrayku Israel, kunanqa noqa ruwasqaykiman jina qanwan ruwasaj, ajinata ruwanasuy kajtintaj, Diosniykiwan uyapurakunaykipaj wakichikuy, nispa. Ajinata Tata Dios nin.

¹³ Tata Diosmin orqokunata, wayratapis ruwarqa. Runamanpis imatachus yuyasqanta rejsichillantaj. Payqa k'anchayta laqhaman tukuchin, kay pachaj aswan patanejtataj purin. Sutenqa Tukuy Atiyniyoj Tata Diosmin.