Amós 3 - DIOSPA QHELQACHISQAN DEUTEROCANONICAL

Diosmanta sut'inchajpa ruwanan

¹ Israelitakuna, Tata Diospa nisqanta uyariychej. Egiptomanta orqhomusqan runakunaj contranta ajinata nin:

² Tukuy kay pachapi ayllukunamanta qankunallata ajllakorqaykichej. Chayrayku tukuy juchaykichejmanta cuentata mañasqaykichej.

³ Sichus iskay runakuna khuska purinku chayqa, ujllata parlasqankurayku ajinata purinku.

⁴ Sichus león montepi qhaparin chayqa, jap'isqanmanta qhaparin. Sitajchus jusk'unpi uña león qhaparin chayqa, imatachá jap'isqanmanta qhaparin.

⁵ Sichus p'isqo tojllaman urman chayqa, urman tojllapi mikhuna kasqanrayku. Sichus tojlla pampaman urman chayqa, imatachá jap'in.

⁶ Sichus llajtapi pututu waqan chayqa, runakuna qhollpirakuyta qallarinku. Sichus ñak'ariy llajtapi rikhurin chayqa, Tata Diosmin chayta apachimun.

⁷ Tata Dios manamin imatapis ruwanchu, manaraj ñawpajta paymanta sut'inchajkunaman willaspaqa.

⁸ León qhaparejtin, pitaj mana kharkatitinmanchu? Tukuyta Kamachej Tata Dios parlajtin, pitaj Tata Diospa sutinpi mana sut'inchanmanchuri?

Samaria llajta thuñisqa kanqa

⁹ Asdod llajtapi kamachina wasikunapi, Egipto suyupi kamachina wasikunapi ima kayta willaychej: Samaria orqoman jamuychej, qhawaychejtaj imaymana ch'ajwa chantá ñak'ariy ima kasqanta, nispa.

¹⁰ Tata Dios nin: Aylluymanta kajkuna mana imatapis cheqanta ruwayta yachankuchu. Kamachinanku wasipi waqaychanku kallpankuman atinikuspa suwasqankuta, qhechusqankuta ima, nispa.

¹¹ Chayrayku ajinata Tukuyta Kamachej Tata Dios nin: Samaria llajtata awqan muyuykonqa, phatu perqantataj urmachenqa. Chaymantataj kamachinanku wasikunatapis ch'usajta saqenqanku, nispa.

¹² Tata Dios nillantaj: Imaynatachus oveja michejqa leonpa siminmanta qhechun iskay chakillataña, chayrí uj ninrej puntallantaña, ajinallatataj Samariapi tiyaj israelitakunamanta, Damascopi sumaj puñunapi sirejkunamanta ima pisilla qhepakonqanku, nispa.

¹³ Kayta uyariychej, chaymantataj Jacobpa ayllunman willaychej: Tukuy Atiyniyoj Tata Dios kay jinata nin: Jacobpa ayllunpa contranpi rimariychej.

¹⁴ Maypachachus Israelta juchallisqanmanta cuentata mañasaj chaypacha, Betelpi tukuy altarkunata phirisaj. Chay altarkunaj wajrankunapis sik'isqa kaspa, pampaman urmanqanku.

¹⁵ Chiri tiempopaj ruwasqa wasikunata laqayaman tukuchisaj, jinallataj q'oñi tiempopaj ruwasqa wasikunatapis. Marfilmanta wasikunata chinkachisaj, kamachina wasikunatapis thuñillasajtaj, nispa. Ajinata Tata Dios nin.