2 Samuel 9 - DIOSPA QHELQACHISQAN DEUTEROCANONICAL

Davidqa Mefibosetta yanapan

¹ Uj kuti Davidqa taporqa: Saulpa ayllunmanta pillapis kawsashanrajchu, Jonatanpa sutinpi payta yanapanaypaj? nispa.

² Saulpata uj kamachin Sibá sutiyoj karqa, paytataj wajyarqanku Davidman rinanpaj. Sibá jamojtintaj, kuraj kamachej taporqa: Qanchu Sibá kanki? nispa. Sibataj kuticherqa: Arí, noqa kani, kuraj kamachejníy, nispa.

³ Chaypacha kuraj kamachejqa Sibata taporqa: Saulpa ayllunmanta pillapis qhepakunchu? Tata Diosqa sonqoyman churawan payta khuyarikunaypaj, nispa. Sibataj kuticherqa: Kashanrajmin, Jonatanpa uj churin. Payqa iskaynin chakinmanta suchu, nispa.

⁴ Davidtaj nerqa: Maypitaj kashanri? nispa. Sibataj kuticherqa: Lodebar llajtapi, Amielpa churin Maquirpa wasinpi tiyakushan, nispa.

⁵ Chantá Davidqa Lodebar llajtamanta, Amielpa churin Maquirpa wasinmanta Jonatanpa churinta pusamunankuta kamacherqa.

⁶ Saulpa allchhin, Jonatanpa churin Mefibosetqa Davidpa ñawpaqenman chayamuspa, pampakama k'umuykukorqa. Davidtaj nerqa: Qanchu kanki Mefiboset? nispa. Paytaj kuticherqa: Kaypi kashani, munayniykitapuni ruwanaypaj, kuraj kamachejníy, nispa.

⁷ Davidtaj nerqa: Ama manchachikuychu. Noqaqa cheqamanta tatayki Jonatanta munakusqayrayku qhawasqayki. Jinataj jatun tataykej Saulpa jallp'anta kutichipusunankuta kamachisaj, wasiypitaj sapa p'unchay mikhunki, nispa.

⁸ Chaypacha Mefibosetqa ujtawan pampakama k'umuykuspa, nerqa: Kuraj kamachejníy, pitaj noqa kasqani wañusqa alqo jina mana sirvej kashajtiy yuyarikunaykipajri? nispa.

⁹ Chantá kuraj kamachejqa Saulpa ñawpa kamachin Sibata wajyaspa, nerqa: Qopushani uywaqeyki Saulpa allchhinman, imakunachus Saulpata, jinataj ayllunpata karqa, chay tukuy kapuyninta.

¹⁰ Chayrayku qanwan, wawaykikunawan, kamachiykikunawan ima paypa jallp'anpi llank'ankichej, chantá paypaj poqoykunata jallch'apunkichej. Chaywan uywaqeyki Saulpa allchhin kawsanqa. Mefibosettajrí noqawan khuskapuni wasiypi mikhonqa, nispa. Sibajtaqa chunka phishqayoj churinkuna karqa, iskay chunka kamachinkunataj.

¹¹ Sibataj kuraj kamachejman kuticherqa: Kuraj kamachejníy, kay tukuy kamachisqaykitaqa ruwasajpuni, nispa. Mefibosettajrí Davidpa mikhunanmantapuni ujnin wawanpis kanman jina mikhorqa.

¹² Chay jawa Mefibosetpataqa uj juch'uy qhari wawan karqa Micaías sutiyoj. Sibá, jinataj tukuy wasinpi tiyakojkunapis Mefibosetpa kamachinkuna karqanku.

¹³ Mefibosetqa Jerusalenpi tiyakorqa, kuraj kamachejwan khuskapunitaj mikhoj. Payqa iskaynin chakinmanta suchu karqa.