2 Samuel 6 - DIOSPA QHELQACHISQAN DEUTEROCANONICAL

Davidqa Diospa arcanta Jerusalenman apayta munan

¹ Davidqa watej Israel ayllumanta 30.000 ajllasqa soldadokunata tantaykullarqataj.

² Jinaspataj, Judá jap'iypi chay Baalá llajtamanta purirerqanku Davidwan, tukuy runankunawan, Diospa arcanta apamunankupaj. Arcaqa Tukuy Atiyniyoj Tata Diospa sutinwan sutichasqa karqa. Payqa arcapi querubinkuna chawpipi tiyakushan.

³ Orqo patapi kasharqa Abinadabpa wasinpi, chaymanta Tata Diospa arcantaqa mosoj carretaman churaykorqanku. Jinapi Abinadabpa churinkuna Uzawan, Ajiowan ima Tata Diospa arcanta apaj carretata pusayserqanku.

⁴ Abinadab churin Ajiotaj Diospa arcaj ñawpaqenta risharqa.

⁵ Chaykama Davidwan, tukuy israelitakunawanqa risharqanku, Tata Diospa ñawpaqenpi tukuy kallpankuwan takispa, tususpa ima. Tocasharqankutaj arpakunata, lirakunata, panderetakunata, qenakunata, platillokunata ima.

⁶ Jinallapi Naconpa eran nisqa, chayman chayamojtinku, Uzaqa Tata Diospa arcanta makinwan jap'erqa, bueykuna misk'ajtinku mana carretamanta urmaykunanpaj.

⁷ Chaypacha Tata Diosqa Uzapaj phiñakorqa, chay arcata mana manchachikuspa jap'iykusqanmanta. Diosqa chay kikinpi Uzata wañurparicherqa. Uzataj Diospa arcan qayllapi wañusqa choqakorqa.

⁸ Chantá Davidqa ujinayarqa, Tata Dios chay jinata Uzata wañurparichisqanrayku. Chayrayku chay cheqata “Peres Uzá” sutiwan suticharqa, chay sutiwantaj kunankama kashan.

⁹ Chaypacha Davidqa Tata Diosta sinch'i manchachikuspa, nerqa: Imapajtaj yuyallaymanpis Tata Diospa trato ruwasqan arcata wasiyman apaytari? nispa.

¹⁰ Diospa trato ruwasqan arcata Davidqa manaña llajtanman apayta munaspari, kamacherqa Gat llajtamanta Obed Edompa wasinman apanankuta.

¹¹ Jinataj Tata Diospa trato ruwasqan arcaqa Obed Edompa wasinpi kinsa killata qhepakorqa. Tata Diostaj payta, aylluntawan samincharqa.

Davidqa Diospa arcanta Jerusalenman apan

¹² Chantá Davidman willarqanku Tata Diospa arcan Obed Edompa wasinpi kasqanrayku, Tata Diosqa paypa ayllunta, tukuy kapuynintawan saminchasqanta. Chantá Davidqa Obed Edompa wasinman rerqa chaymanta jatun kusiywan Diospa arcanta Davidpa llajtanman apamunanpaj.

¹³ Tata Diospa arcanta apamojkunaqa sojtata thaskejtinku, Davidqa uj torota, uj wira corderotawan ñak'aspa, Tata Diosman jaywarqa.

¹⁴ Davidqa linomanta unku p'achawan p'achallisqa risharqa, Tata Diospa ñawpaqenpi tukuy kallpanwan tusurispa.

¹⁵ Ajinata Davidwan, tukuynin israelitakunawanqa Tata Diospa arcanta aparqanku may kusiywan qhaparispa, cornetakunata waqarichispataj.

¹⁶ Tata Diospa arcan Davidpa llajtanman chayajtin, Saulpa ususin Micalqa wasi ventananmanta qhawarimuspa, kuraj kamachej Davidta tusushajta, phinkiykachashajtataj Tata Diospa ñawpaqenpi rikorqa. Chayta rikuspataj, Micalqa sonqonpi Davidta pisipaj qhawarqa.

¹⁷ Tata Diospa arcantaqa chaypajpuni Davidpa wakichisqan toldo ukhuman churarqanku. Chantá Davidqa Tata Diospa ñawpaqenpi q'olacherqa uywa ñak'asqakunata jinataj allinyakunapaj jaywanakunatawan.

¹⁸ Chaykunata jaywayta tukuspañarí, Davidqa tukuy israelitakunata Tukuy Atiyniyoj Tata Diospa sutinpi samincharqa.

¹⁹ Jinapi David chaypi kajkunaman mikhunankupaj qorqa sapa ujman uj t'antata, uj chhikan aycha kankata, palma poqoymanta t'antata, chantá uva k'isata ima. Chaymantataj tukuyninku wasinkuman kutiporqanku.

²⁰ Chantá David ayllu masinta saminchananpaj kutipojtin, Saulpa ususin Mical payta taripaj llojsimuspa, nerqa: Mana p'enqayniyoj runa, Israelpa kuraj kamachej kashaspa chay kamachiyki imillakunaj rikunankuta sikiyki rikhurishajta tususqayki qanpajqa allinchu? nispa.

²¹ Davidtajrí Micalman kuticherqa: Arí, tusorqani, Tata Diosta yupaychaspa tusorqani, imaraykuchus payqa ajllawarqa tataykej cuentanmanta jinataj tukuy aylluykejmanta ima, Israel ayllunta kamachinaypaj. Chayrayku Tata Diospa ñawpaqenpi tusullasajpuni.

²² Jinapis astawanraj kunanmanta nisqaqa ruwasaj, ninki jina noqapaj p'enqay kasqanta. Chaywanpis chay sipaskunaqa pikunamantachus parlanki, chaykuna allinpaj qhawawanqanku, nispa.

²³ Saulpa ususin Micaltaj wañupunankama mana uj wawatapis rejserqachu.