2 Samuel 5 - DIOSPA QHELQACHISQAN DEUTEROCANONICAL

David Israel suyuta Judá suyutawan kamachin

¹ Chaymanta qhepata Israelmanta tukuy jatun ayllukuna Hebronpi tantakuspa, Davidwan parlarqanku: Noqaykoqa yawar masiyki kayku, aylluykitaj.

² Cheqamanta Saúl kuraj kamachejniyku kashajtinpis, qanpuni israelitakunataqa maqanakupi kamachej jina pusaykacharqanki. Chay jawaqa Tata Dios nisorqa: Qanpuni tukuy Israel aylluyta michinki, kamachinkitaj, nispa.

³ Chaypacha Israelmanta tukuy kurajkuna rerqanku Hebronman kuraj kamachej Davidwan parlaj. Davidtaj Tata Diospa ñawpaqenpi chay kuraj runakunawan uj tratota ruwarqa. Paykunataj Israel suyupi kuraj kamachej kananpaj Davidta umanman aceitewan jawerqanku.

⁴ Kamachiyta qallarishaspa, Davidqa kinsa chunka watayoj karqa, tawa chunka watatataj kamacherqa.

⁵ Judá aylluta Hebronmanta qanchis wata sojta killayojta kamacherqa. Chaymantataj Jerusalenpi kamacherqa Israel aylluta jinataj Judá ayllutapis kinsa chunka kinsayoj watata.

David Sión llajtata jap'in

⁶ Chay qhepata kuraj kamachej Davidqa soldadonkunawan khuska Jerusalenman maqanakoj rerqanku, chaypi tiyakojkuna jebuseokunawan. Chay jebuseokunataj mana yuyarqankuchu David chay llajtaman yaykuspa jap'ikapunanta. Chayrayku alqokachakuspa, nerqanku: Qanqa mana kay llajtataqa jap'ikapuyta atinkichu. Ñawsakuna, suchukuna ima mana yaykuchimusonqankuchu, nispa.

⁷ Chaywanpis Davidqa Sión pukarata atipaspa, jap'erqa. Chayrayku kunankama “Davidpa llajtan” nisqa kashan.

⁸ David chay kutipi nisqa: Pichus jebuseokunata wañurachej yaykojqa, yaku larq'anta yaykuspa wañurachimuchun chay ñawsakunata jinataj suchukunata ima, imaraykuchus paykunata sinch'ita chejnikuni, nispa. Chaymantapachataj nej kanku: Ni ñawsakuna nitaj suchukuna Tata Diospa Temploman yaykuyta atinkuchu, nispa.

⁹ Chaymantataj Davidqa pukara kamachinan wasita sayacherqa, chay llajtatataj “Davidpa llajtan”, nispa suticharqa. Muyuyninmantaj Milo chaynejmantapacha ukhu ladoman perqaykucherqa.

Jiranqa Davidta yanapan

¹⁰ Tukuy Atiyniyoj Tata Dios paywan kasqanrayku, Davidqa astawanpuni kallpachakusharqa.

¹¹ Chayrayku Tiro sutiyoj llajtata kuraj kamachej Jiranqa kacharqa runankunata parlapayamunankupaj. Chay jawa kachallarqataj carpinterokunata, jinataj rumi ch'eqojkunatapis. Paykunaqa pino kurkukunata apaspa, Davidpa kamachinan wasita ruwarqanku.

¹² Ajinamanta Davidqa cheqamanta yacharqa Tata Dios payta Israel suyupi kuraj kamachej kananpaj churasqanta, llajtanta munakuspa suyuntapis jatunyachisqanta.

Davidpa wakin wawankuna

¹³ Hebronmanta Jerusalenman jampusqanmantaña, Davidqa ashkha warmiwan casarakullarqataj, jinallataj waj warminkunapis kallarqankutaj. Chay warmikunapitaj astawan churinkuna jinataj ususinkunapis kallarqankutaj.

¹⁴ Jerusalenpi paqarikojkuna kaykuna karqanku: Samúa, Sobab, Natán, Salomón,

¹⁵ Ibejar, Elisúa, Nefeg, Jafía,

¹⁶ Elisama, Eliada, Elifelet ima.

Davidqa filisteokunata atipan

¹⁷ Maypachachus filisteokuna uyarerqanku Davidqa Israel ayllupi kuraj kamachej churasqa kasqanta chaypacha, tukuyninku Davidwan maqanakunankupaj tantaykukorqanku. Davidtajrí chayta yachaspa, pukaraman yaykorqa.

¹⁸ Chaypacha filisteokunaqa astawan ñawpajman rispa, Refayin pampaman junt'aykorqanku.

¹⁹ Chayraykutaj Davidqa Tata Diosta taporqa: Filisteokunawan maqanakoj riymanchu? Paykunawan maqanakojtiyrí, atipayta yanapawankimanchu? nispa. Tata Diostaj kuticherqa: Arí, maqanakoj rillay. Noqa yanapasqayki atipanaykipaj, nispa.

²⁰ Chantá Davidqa Baal Perasinman rispa, filisteokunata atipaykorqa. Chayrayku David nerqa: Tata Diosqa ashkha yaku jina awqaykunata ñawpaqeymanta chinkarpachin, nispa. Chay cheqatataj Baal Perasín sutiwan suticharqa.

²¹ Chay jawataj filisteokunaqa lantinkukunata saqerpayarqanku, Davidwan, soldadonkunawantaj chaykunata apakaporqanku.

²² Chaywanpis filisteokunaqa watejmanta Refayin pampaman junt'aykamullarqankutaj.

²³ Watejmanta Davidqa Tata Diosta tapullarqataj, Tata Diostaj nerqa: Ama paykunawan maqanakoj ñawpaqenkuta riychu. Manachayqa chay bálsamo sach'akunanejman chayaytawan, muyuykuspa qhepallankumanta maqanakoj yaykunki.

²⁴ Maypachachus uyarinki sach'akuna patapi runapis purishanman jina, chaypacha maqanakoj yaykunki, imaraykuchus chay niyta munan noqa Tata Dios ñawpaqeykita rishasqayta filisteokunaj soldadonkunata wañurachispa, nispa.

²⁵ Chantá Davidqa Tata Diospa nisqanman jina ruwaspa, filisteokunata atipaykorqa Geba llajtamantapacha Guézer llajtakama.