2 Samuel 24 - DIOSPA QHELQACHISQAN DEUTEROCANONICAL

David israelitakunata yupachin

¹ Tata Diosqa israelitakunapaj watejmanta sinch'ita phiñakuspa, paykunaj contrankupi Davidta yuyaycharqa, Israel aylluta, Judá ayllutawan yupachinanta.

² Chaypacha Joabta chantá soldadonkunata kamachejkunamanwan ima kamacherqa: Tukuy Israel suyuta Danmantapacha Bersebakama purimuychej, chay runakunatataj yupamuychej, mashkhachus tukuypi kasqankuta noqa yachanaypaj, nispa.

³ Joabtajrí kuraj kamachejta nerqa: Kuraj kamachejníy, Tata Diosniyki uj pachaj jinatawan kamachisqayki runakunata mirachichun kunan kasqanmanta nisqaqa, qantataj chayta rikunaykipaj kawsachisuchun. Chaywanpis imapajtaj israelitakunata yupachiyta munankiri? nispa.

⁴ Jinapis kuraj kamachejpa kamachisqanqa aswan atiyniyoj karqa, Joabpa jinataj soldadokunata kamachejkunajmanta nisqaqa. Chayrayku Joabqa jinataj soldadokunata kamachejkunapis kuraj kamachejpa ñawpaqenmanta llojserqanku israelitakunata yupamunankupaj.

⁵ Jordán mayuta chimpaspa, valle chawpipi kasharqa Aroer llajta chaymanta qallarerqanku, Gaadman, jinataj Jazer cheqanej puriyman.

⁶ Chaymantataj Galaadman chantá Cadesman ima rerqanku, chayqa jititakunaj jap'iyninku karqa. Chaymantataj Danman chayarqanku, Dan chaynejmantataj Sidón chayninta muyuykamorqanku.

⁷ Chaymantataj Tiro llajtapi pukaraman rerqanku, heveokunajpata chantá cananeojpata tukuynin llajtankuman. Judamanta uranejmantaj llojsimorqanku, Berseba chaynejpitaj tukorqanku.

⁸ Jisq'on killa iskay chunka p'unchayniyojpi tukuynin suyuta muyumuytawankama, Jerusalenman kutimorqanku.

⁹ Chantá Joabqa kuraj kamachejman willarqa yupasqankuman jina mashkhachus runa kasqanta. Yachakorqataj Israel suyupi tukuyninpi 800.000 qharikuna maqanakuman rinankupaj jina kasqankuta. Willallarqataj Judapi 500.000 qharikuna kasqankuta.

¹⁰ Chantá Davidqa israelitakunata yupachispa, juchallisqanta reparakorqa, Tata Diosmantaj juchanta rimarerqa: May jatunta juchallikuni chay imakunata ruwaspa. Chayrayku Tata Dios, mañarikuyki juchayta pampachanaykita. Noqaqa wampu jina chaytaqa ruwarqani, nispa.

¹¹ Q'ayantin David jatarikushajtin, Tata Dios sut'inchaj Gadta nerqa:

¹² Riy Davidman, nimuytaj kay kinsa imakunamanta, imatachus noqa ruwanayta chijllakunanpaj, nispa.

¹³ Gadtaj Davidman rispa, taporqa: Mayqentataj munanki: Kay suyupi qanchis wata yarqhay kanantachu, kinsa killa junt'ata awqaykimanta ayqeykachanaykitachu, chayrí kinsa p'unchayta kay suyuman wañuchej onqoy jamunantachu? Unanchakuspa, niway kunan imatachus kachamuwajman willamunayta, nispa.

¹⁴ Davidtaj Gadman kuticherqa: Imatachus ninayta mana yachanichu. Chaywanpis aswan walej kanman kikin Tata Diospa makinman urmanayku, paypa khuyakuynin may jatun kasqanrayku, amataj runaj makinman urmanaykupaj, nispa.

¹⁵ Chantá Tata Diosqa Israel suyuman millay onqoyta kachamorqa, chay paqarinmantapacha mayk'ajkamachus kanan karqa, chaykama. Danmantapacha Bersebakama 70.000 runakuna wañorqanku.

¹⁶ Onqoyta apamoj angelqa Jerusalén llajtata tukuchinanpaj kashajtin, Tata Dios sinch'ita llakikorqa chay jina ñak'arichisqanrayku. Chayrayku Tata Dios chay angelta kamacherqa: Chaykamalla, amaña ñak'arichiychu, nispa. Tata Diospa angelnenqa jebuseo Arauna maypichus trigota trillasharqa, chaynejpi kasharqa.

¹⁷ Jinallapi Davidqa runakunata wañurachisharqa chay angelta rikuspa, Tata Diosta nerqa: Noqa juchallini. Noqamin juchayoj kani. Kay runakunarí ima juchayojtaj kankuri? Paykunata ñak'arichinaykitaqa, mañakuyki noqata, aylluytawan ñak'arichinawaykuta, nispa.

Davidqa altarta ruwan

¹⁸ Chay p'unchaypacha Gadqa Davidta watukoj rispa, nerqa: Maypichus jebuseo Arauna trigota trillashasqa chaynejpi, Tata Diospaj uj altarta ruwapuy, nispa.

¹⁹ Chaypacha Davidqa Diosmanta sut'inchaj Gad imatachus nisqanta ruwamorqa, Tata Diospa kamachisqanman jina.

²⁰ Araunaqa kuraj kamachejta, runankunatawan ima wasinman jamushajta rikuspa, phinkirispa kuraj kamachej ñawpaqenman rerqa. Pampakama k'umuykuspataj,

²¹ Arauna nerqa: Imaraykutaj qan kuraj kamachejniy noqa kamachiykita watukoj jamushankiri? nispa. Davidtaj kuticherqa: Chay trigo oqharina eraykita rantikapusuyta munani, chaypi Tata Diosman uj altarta ruwapunaypaj, kay llajtanchejmanta millay onqoy chinkananpaj, nispa.

²² Araunataj kuticherqa: Qan, kuraj kamachejníy, Diosman q'olachispa jaywanaykipaj jap'ikapullay, imachari allin rijch'asunki, chayta. Kaypi tiyan bueykuna ñak'aspa q'olachinapaj, jinallataj trigo trillana k'ullupis, kay yuntakunaj yugonkupis. Chaykunaqa walej kanman llant'apaj.

²³ Kay tukuyta qan kuraj kamachejniyman qopuyki, nispa. Chantapis Araunaqa nillarqataj: Chay jaywasqaykita Tata Dios kusisqa jap'ikuchun, nispa.

²⁴ Kuraj kamachejtajrí Araunaman kuticherqa: Chaykunataqa jinalla mana jap'iykimanchu. Rantisunaypuni tiyan valesqanta pagasuspa. Mana jaywaymanchu Tata Diosmanqa mana rantispa jap'isqaytaqa, nispa. Jinamanta Davidqa chay erata ranterqa, jinataj chay bueykunatawan phishqa chunka qolqekunawan.

²⁵ Chaypitaj Davidqa Tata Diospaj uj altarta ruwaporqa, altar patapitaj uywa ñak'asqata q'olachispa jaywarqa, jinataj allinyakuna jaywanatapis. Chantá Tata Dios uyarerqa suyunrayku David mañapusqanta, chay millay onqoytaj Israel suyumanta chinkaporqa.