2 Samuel 23 - DIOSPA QHELQACHISQAN DEUTEROCANONICAL

David wañupunan qayllata parlasqan

¹ David manaraj wañupushaspa, kay jinata nerqa: Noqaqa Yeséj churin David kani, pitachus Diosqa mayta jatuncharqa, pitachus Jacobpa Diosnin kuraj kamachej kananpaj ajllakuwarqa, pichus Israelpi ima munayta takej ima kay jinata nini:

² Tata Diospa Espíritun noqanejta parlan. Nisqanqa simiy puntapi kashan.

³ Israelpa Diosnin parlarqa, Israelpa waqaychajnintaj niwan: Pichus cheqanta ruwaspa runakunata kamachin, pichus Diosta manchachikuspa kamachej,

⁴ payqa sut'iyaymanta llojsimoj inti jina, mana phuyusqa p'unchaypi inti k'anchaynin jinataj, qhorata wiñachej para jina kanqa, nispa.

⁵ Chayrayku mirayneyqa Diospi sinch'i sayasqa kashan. Paymin noqawan wiñaypaj tratota ruwan, sumaj cheqan ruwasqata, sumaj sayachisqatataj. Payqa yanapallawanqapuni, tukuy imatachus munasqaytataj ruwanqapuni.

⁶ Tukuy sajra ruwaj runakunatajrí khishka jina wijch'usqa kanqanku, mana pipis makinwan jap'iyta munanchu.

⁷ Oqhariyta munajqa ruthunapaj josewan, chayrí k'aspiwan oqharenqa, ninaman wijch'uykunanpaj tukuynin q'olananpaj, nispa.

Davidpa wapu soldadonkuna

⁸ Davidpa aswan wapu kaj soldadonkunaj sutinkoqa kaykuna kanku: Tacmonmanta Yoseb Basébet, payqa kinsa kaj wapu soldadokunata kamachej karqa. Uj kuti 800 runakunata lanzallanwan wañucherqa.

⁹ Qhepantaj Ajoj ayllunmanta Dodoj churin Eleazar karqa. Paypis chay kinsa wapu soldadokunamanta ujnin kaj karqa. Payqa Pasdaminpi Davidwan kasharqa, filisteokuna maqanakupaj tantasqa kashajtinku. Chaypitaj paykunalla maqanakoj sayaykorqanku, chay israelitakunataj ayqerqanku.

¹⁰ Eleazarrí mana iskayrayaspa maqanakullarqapuni, filisteokunatataj wañuracherqa makin espadanman k'askaykunankama. Chay p'unchaypeqa Tata Diosqa filisteokunata Eleazarwan atipasqata atipaykucherqa. Chaymantataj soldadokunaqa Eleazarpa qhepanta rerqanku awqankoj imankuta oqharikojllaña.

¹¹ Kinsa kajtaj aratmanta Agej churin Samá karqa. Filisteokuna maypachachus Lehí llajtapi tantakorqanku, lenteja tarpusqa kasharqa chaypi, chaypacha israelitakunaqa paykunamanta ayqerqanku.

¹² Samatajrí chajra chawpipi sayaykukuspa, paykunata jark'arqa, jinamanta filisteokunata atipaykorqa. Tata Diosqa chay p'unchaypi filisteokunata Samawan atipasqata atipaykucherqa.

¹³ Uj kuti, mikhuy oqharina mit'api, kinsa chunka wapu soldadokunamanta kinsa ukhu Davidwan Adulán nisqa chhanka jusk'upi parlaj rerqanku. Filisteokunamanta soldadokunataj Refayin vallepi jarasqa kasharqanku.

¹⁴ Davidqa chhanka jusk'upi kasharqa, maypachachus filisteokunamanta uj t'aqa soldadokuna Belenpi kasharqanku, chaypacha.

¹⁵ Jinapi Davidqa yakumanta ch'akisqanrayku nerqa: Imaynapichus pillapis yakuta jaywariwanman, Belén llajta punkupi kashan, chay pujyumanta, nispa.

¹⁶ Chantá chay kinsantin wapu runakunaqa filisteokunaj jarankuman yaykuykuspa, Belén llajtaman yaykuna pujyumanta yakuta orqhomorqanku, chantá Davidman aparqanku. Davidman jaywajtinkutajrí, payqa mana ujyarqachu, manachayqa pampaman jich'arqa, Tata Diosman ofrendata jina jaywaspa.

¹⁷ Pay nerqa: Tata Dios jark'awachun kay yakuta ujyaykunamanta. Ujyayman chayqa, kay runakunaj yawarninkutapis ujyashayman jina kanman, imaraykuchus kay yakuta wañuyta mana manchachikuspa apamorqanku, nispa. Chayrayku mana ujyayta munarqachu. Chaytaqa chay kinsa wapu soldadokuna ruwarqanku.

¹⁸ Seruyáj churin Joabpa wawqen Abisayqa chay kinsa chunka wapu soldadokunaj kamachejninku karqa. Uj kuti maqanakoj sayaykuspa, lanzanwan 300 runakunata wañuracherqa.

¹⁹ Ajinamanta chay kinsa chunka runakuna ukhupi may uyarisqa kamachejninku karqa. Chaywanpis manapuni chay kinsa wapu soldadokunamanqa jap'ikorqachu.

²⁰ Cabsel llajtamanta Joyadáj churin, Benaías sutiyojpis wapu soldadollataj karqa. Paypis t'ukunata ruwallarqataj. Moabmanta Arielpa iskaynin churinkunata pay wañucherqa. Uj kutitaj, maypachachus rit'isharqa chaypacha, uj t'oqoman yaykuspa, uj leonta wañucherqa.

²¹ Wañuchillarqataj uj jatunkaray Egipto llajtayoj runata, pay lanzanta jap'ishajtin. Benaiasrí k'aspillawan chimpaykuspa, lanzanta qhechurparerqa chantá kikin lanzallanwantaj wañucherqa.

²² Joyadáj churin Benaiasqa chayta ruwasqanrayku, chay kinsa chunka runakuna ukhupeqa may uyarisqa karqa.

²³ Paykuna ukhupi aswan uyarisqa karqa. Chaywanpis manapuni chay kinsa wapu soldadokunaman jap'ikorqachu. Davidtaj Benaiasta qhawaj soldadokunata kamachinanpaj churarqa.

²⁴ Kinsa chunka wapu soldadokunaqa kaykuna karqanku: Joabpa wawqen Asael, Belenmanta Dodoj churin Eljanán,

²⁵ Harod llajtamanta Samá, Elicawan ima,

²⁶ Heles llajtamanta paltita, Tecoa llajtamanta Iquespa churin Ira,

²⁷ Anatot llajtamanta Abiezer, Husá llajtamanta Sibecay,

²⁸ Ajoj llajtamanta Salmón, Netofa llajtamanta Maray,

²⁹ Banaj churin Jéleb, chaypis Netofallamantataj karqa, Benjamín ayllupi Gabaamanta Ribaypa churin Itay,

³⁰ Piratonmanta Benaías, Gaas mayumanta Hiday,

³¹ Arbamanta Abí Albón, Barhummanta Azmavet,

³² Salbonmanta Elijaba, jinataj Jasenpa churinmanta Jonatán,

³³ Ararmanta Samá, Sararpa churin Ajían, paypis Ararllamantataj karqa,

³⁴ Macamanta Ajasbaypa churin Elifelet, Gilomanta Ajitofelpa churin Elián,

³⁵ Carmel llajtamanta Jesray, Arbamantataj Paray,

³⁶ Soba llajtamanta Natanpa churin Igal, Gad llajtamanta Bani,

³⁷ Amonmanta Selec, Berotmanta Najaray, payqa Seruyáj churin Joabpa yanapajnin karqa,

³⁸ Jatirmanta Ira, Garebwan ima,

³⁹ jitita Uriaspiwan. Tukuyninkupi kinsa chunka qanchisniyoj karqanku.