2 Samuel 22 - DIOSPA QHELQACHISQAN DEUTEROCANONICAL

Davidpa takiynin

¹ Davidqa kay takiyta Tata Diospaj takiporqa, maypachachus Tata Diosqa waqaycharqa Saulpa makinmanta jinataj awqankunamantapis, chaypacha.

² Kay jinata nerqa: Qan, Tata Dios, pakakunay chhanka kanki, jark'akuwajniy, kacharichiwajniytaj.

³ Diosníy, qan kanki pakakunay chhanka, jark'akuwajniytaj. Atiyniykiwan qhespichiwanki, alto patapi sumaj pakakunaytaj kanki. Qanlla mana allin ruwajkunamanta jark'akuwanki.

⁴ Qanqa, Tata Dios, yupaychanapaj jina kanki. Qanta qhaparikamojtiy, awqaykunamanta kacharichiwanki.

⁵ Wañoyqa waskhawan jina ch'ipaykuwarqa, wasaykoj mayu jina mancharichiwarqa.

⁶ Wañoyqa ukhu pachaj waskhanwan ch'ipaykuwarqa. Wañuypa tojllanpi rikhurerqani.

⁷ Tata Diosta wajyakorqani, may llakiyniypi kashaspa. Diosniy yanapanawanta mañakorqani, paytaj templonmantapacha uyarimuwarqa. Qhaparikusqaytaj ninrinman chayarqa.

⁸ Chaypacha jallp'aqa sinch'ita kharkaterqa, janajpa cimientonkunapis kharkatiterqanku. Tata Diospa phiñakuyninrayku kuyuchisqa karqanku.

⁹ Senqanmantaqa q'oshñi llojsimorqa, siminmantataj tukuy imata q'olaj nina llojsimullarqataj, k'ajarishaj nina brasataj t'akarikamorqa.

¹⁰ Janajta llik'iraspa, pay urayk'amorqa. Chakin urapitaj laqhayarishaj yana phuyu karqa.

¹¹ Lijrayoj querubinman lloq'aykuspa, wayraj chawpinpi rikuchikorqa.

¹² Pakaykukorqataj sinch'i laqhayaj muyuyninpi, yanayarishaj phuyu chawpipi.

¹³ Uj sinch'i k'anchay ñawpaqenmanta llojserqa, phuyumantataj nina k'aja paramorqa.

¹⁴ Patapi Kaj Tata Diosqa janaj pachamanta illapa jina parlasqanta uyarichimorqa.

¹⁵ Flechankunata, lliuj lliujninkunatawan kachaykorqa, awqaykunatataj tukuynejman ch'eqeracherqa.

¹⁶ Tata Diosníy, k'amisqaykiwan mama qochaj ukhun rikhurerqa. Sinch'i samayniykiwantaj kay pachaj cimientonkunapis rikhurillarqataj.

¹⁷ Patamantapacha Diosqa makinta jaywamuwarqa. Ukhu mama qochamanta orqhowarqa.

¹⁸ Chay jina atiyniyoj awqaykunamanta kacharichiwarqa, chejnikuwarqanku chaykunamanta, noqamanta aswan kallpayoj kajkunamanta.

¹⁹ Sinch'i llakiypi kashajtiy, paykuna maqaj wakiykuwarqanku. Chaywanpis Tata Diosqa yanapawarqapuni,

²⁰ kacharichiwarqataj. Noqata munakuwasqanrayku qhespichiwarqa.

²¹ Tata Diosqa t'inkata qowan, llimphu purisqayman jina.

²² Noqaqa Tata Diosta kasuspa purini. Mana jayk'ajpis Diosniymanta karunchakunichu sajra kajta ruwanaypaj.

²³ Kamachisqanqa sonqoypi kashan. Ni jayk'ajpis kamachisqanmantaqa karunchakunichu.

²⁴ Paypa ñawpaqenpi mana pantaspa purerqani. Sajra ruwanamanta waqaychakuni.

²⁵ Chayrayku Tata Diosqa t'inkata qowan, paypa ñawpaqenpi llimphu sonqoyoj kasqayman jina.

²⁶ Qanqa, Tata Dios, khuyakojtaqa khuyallankitaj. Cheqan runawanpis cheqanllataj kanki.

²⁷ Ch'uya sonqoyojwanqa ch'uya sonqollataj kanki. Millayta ruwajpajrí, phiñakuyniykita rikuchinki.

²⁸ Llamp'u sonqoyojkunata qan kacharichinki, uma oqharejtarí, k'umuykuchinki.

²⁹ Qan, Tata Dios, k'anchayniymin kanki. Qan, Tata Dios, laqha kayniyta k'anchapuwanki.

³⁰ Yanapawasqaykiwan awqayta atipasaj, Diosniywantaj may chhikachaj perqakunatapis wasaykusaj.

³¹ Diospa ñannenqa cheqanmin. Tata Diospa nisqanqa jap'ikunapaj jinapuni. Diosqa paymanta jap'ikojkunata waqaychanpuni.

³² Pitaj Diosmanta aswan jatunri? Waj dios kanmanchu chhankapi jina pakakunanchejpaj?

³³ Dioslla noqataqa kallpachawan. Paylla ni pejpa k'aminanta kawsachiwan.

³⁴ Paymin tarukata jina phawachiwan. Orqo patapi sinch'ita sayachiwan.

³⁵ Paymin maqanakupaj sumajta yachachiwan. Paymin kallpata qowan broncemanta arcota mat'ita kacharinaypaj.

³⁶ Qan waqaychawanki, kacharichiwankitaj. K'acha kayniykiwan jatunchawanki.

³⁷ Ñanniyta pichapuwanki, chakiy ama llusk'ananpaj.

³⁸ Awqaykunata qhatiykuspa wañucherqani. Tukuyninkuta tukuchisparaj kutimporqani.

³⁹ Tukuyninkuta tukucherqani amaña ujtawan jatarinankupaj. Chakiy uraman wañusqa urmarqanku.

⁴⁰ Qan maqanakupaj kallpachawarqanki. Awqaykunata ñawpaqeypi k'umuykucherqanki.

⁴¹ Awqaykunata ñawpaqeymanta ayqecherqanki. Ajinamanta chejnikuwajkunata wañucherqani.

⁴² Yanapayta mañakorqanku, nitaj pipis yanaparqachu. Tata Diosta wajyakorqanku, paytajrí mana uyarerqachu.

⁴³ Ñut'u jallp'ata jina paykunata ruwarqani. Ñan patapi t'uruta jina paykunata sarorqani.

⁴⁴ Ch'ajwa sayarichej llajtakunamanta qan kacharichiwarqanki. Suyukunata kamachinaypaj churawarqanki, kunantaj mana rejsisqay runakuna kamachiykuna kanku.

⁴⁵ Waj llajtayojkuna qonqorikuwanku. Kamachisqayta uyarispa kasuwanku.

⁴⁶ Waj llajtayojkuna q'ewarakunku. Pakakusqankumanta kharkatitispa llojsimunku.

⁴⁷ Jatunchasqa kachun Tata Diosqa. Waqaychawajqa saminchasqa kachun. Jatunchasqa kachun kacharichiwaj Diosneyqa.

⁴⁸ Diosqa awqaykunawan pagachikonqa. Payqa waj llajtakunawan kasuchiwan.

⁴⁹ Awqaykunamantapis pay kacharichiwan, contraypi oqharikojkunamantataj aswan pataman churawan. Qan, Tata Dios, maqanakuta mask'aj runakunamanta jark'akuwanki.

⁵⁰ Chayrayku suyukuna ukhupi qanta yupaychayki. Sutiykita yupaychaspa takisaj.

⁵¹ Qanqa noqa ajllakusqayki kuraj kamachejta may chhika kutita maqanakupi atipacherqanki. Munakuspa noqa Davidta, miraynintawan wiñaypaj waqaychanki, nispa. Ajinata Davidqa Tata Diosta jatuncharqa.