2 Samuel 20 - DIOSPA QHELQACHISQAN DEUTEROCANONICAL

Sebaqa Davidpa contranpi oqharikun

¹ Chaypacha Gilgal llajtapi kasharqa Benjamín jatun ayllumanta uj millay runa Sebá sutiyoj. Payqa Bicrij churin karqa. Sebaqa putututa waqachispa, nerqa: Yeséj churin Davidwanqa ni ima ruwananchej kanchu. Israelitakuna, wasiykichejman ripuychej, nispa.

² Tukuy israelitakunaqa Davidta saqerparispa, Bicrij churin Sebata qhatinankupaj rerqanku. Judamanta kajkunatajrí Jordán mayumanta Jerusalenkama kuraj kamachejman sayakuspallapuni kasharqanku.

³ Davidqa Jerusalenpi kamachinan wasiman kutipuspa, kamachinan wasi qhawajkuna chunka waj warminkunata, uj wasiman wisq'aykucherqa, soldadokunawan qhawachispa. Chaypitaj paykunata mikhuchillarqapuni. Chaywanpis manañataj ujtawan paykunawanqa puñuykorqachu. Ajinata chay warmikunaqa wisq'asqa qhepakorqanku warmisapa jina wañupunankukama.

⁴ Chantá kuraj kamachejqa Amasata kamacherqa: Judamanta kaj runakunata wajyamuy, kinsa p'unchaymantawantaj kaypi paykunawan kanayki tiyan, nispa.

⁵ Chantá Amasaqa Judamanta kajkunata tantamoj rerqa. Chaywanpis kuraj kamachej nisqanmanta astawan qheparikorqa.

⁶ Chaypacha Davidqa Abisayta nerqa: Bicrij churin Sebaqa Absalonmanta astawanraj uma nanayta qowasunman. Chayrayku soldadoykunata pusariykukuspa, qhepanta kachaykukuy. Pajtataj wakin jark'achasqa llajtata tarispa, pakakuwasunman, nispa.

⁷ Joabpa soldadonkuna, kamachina wasipi qhawajkuna quereteokuna, peleteokuna ima Bicrij churin Sebata mask'aj rerqanku. Jinallataj wapu kaj soldadokunapiwan, Jerusalenmanta Abisaywan khuska llojserqanku.

⁸ Gabaonpi jatun chhanka chaynejpiña kashajtinkurí, Amasa paykunata taripaj llojserqa. Joabqa maqanakuna p'achan churasqa kasharqa, sumaj chumpisqa, uj ladonpitaj espadayoj. Thaskirejtinkamataj, espadan uraman urmarparqa.

⁹ Chaypachataj Joabqa espadanta oqhariytawan, chimpaykorqa Amasaman, sunkhanta paña makinwan jap'ispa much'aykoj jina, taporqa: Walejchu risunki, wawqéy? nispa.

¹⁰ Amasatajrí mana qhawarikorqachu Joab makinpi espadata jap'ishasqanta. Jinallamanta Joabqa chaywan Amasaj wijsanta khallarparerqa, tukuynin ch'unchulantaj pampaman thallikamorqa. Amasa wañurpapojtinkama, Joabqa manaña ujtawan t'ojserqachu. Chaymantataj Joabwan, wawqen Abisaywan imaqa Bicrij churin Sebatañataj qhatiykorqanku.

¹¹ Jinapi Joabpa ujnin kaj soldadonqa, Amasa wijch'urayasharqa, chayman qayllaykuspa, nerqa: Pichus Joabman Davidmanwan kutisqa kajqa Joabta qhatichun, nispa.

¹² Chaykama Amasaqa chay ñan chawpipi yawarnin patapi sunt'ishallarqaraj. Jinapi tukuynin chaynejta rejkuna sayaykukuspa, Amasata anchata qhawajtinku, chay soldadoqa ayanta ñan kantuman ithirichispa, qhataykorqa.

¹³ Ñan kantuman ithirichejtintaj, Joabwan tukuy rejkunaqa cheqanta rerqanku Bicrij churin Sebata qhatiykunankupaj.

¹⁴ Sebaqa Israel tukuy jatun ayllukunanejta Abel Betmacá chaynejkama rerqa. Chantá Bicrij tukuy ayllunkuna tantakuspa, paypa qhepanta llajtaman yaykorqanku.

¹⁵ Joabpa soldadonkunataj Abel Betmacaman chayaspa, llajtaj perqanmanta qayllanpi jallp'ata qolluykorqanku, chaymantapacha llajtaman maqanakoj yaykunankupaj. Chantá tukuyninku perqata urmachiyta munashallarqankutaj.

¹⁶ Jinallamanta uj yuyaysapa warmi llajtaj perqanmantapacha qhaparimorqa: Uyariwaychej, uyariwaychej. Ama jina kaspa Joabman willaripuwaychej, paywan parlarikuyta munani, nispa.

¹⁷ Joab qayllajtintaj, chay warmeqa taporqa: Qanchu Joab kanki? nispa. Paytaj kuticherqa: Arí, noqa kani, nispa. Chantá warmitaj nerqa: Noqa kamachiyki parlasqayta ama jina kaspa uyariway, nispa. Joabtaj kuticherqa: Uyarishayki, nispa.

¹⁸ Chantá warmeqa nerqa: Unayqa nej kanku: Pillapis imallatapis yachayta munajqa Abel llajtapi tapukamuchun, nispa. Ajinamanta imatapis allinchaj kanku.

¹⁹ Noqaykoqa kay llajtapi allin sonqoyoj runakuna kayku. Jinapis qanqa Israelpa maman jina kaj llajtata thuñiykuyta munashanki. Imaraykutaj chinkachiyta munanki Tata Diospa chayaqen llajtatari? nispa.

²⁰ Joabtaj kuticherqa: Chaytaqa mana yuyallanipischu. Mana noqaqa yuyanichu kay llajtata chinkachiyta nitaj phiriyta.

²¹ Chayqa mana jinachu, manachayqa Efraín jatun aylloj jap'iynin orqonejmanta Bicrij churin Sebá sutiyoj runaqa kuraj kamachej Davidpa contranpi oqharikun. Pusamuwaychej pay sapallanta, noqataj kay llajtamanta ithiripusaj, nispa. Chay warmitaj Joabman kuticherqa: Kay perqa patamantapacha umanta wijch'umusqayku, nispa.

²² Chaypachapacha warmeqa llajtapi tukuy runata yachayninwan umachaj rerqa. Paykunataj Bicrij churin Sebáj umanta qholuspa, Joabman wijch'uykorqanku. Chaypacha Joabqa putututa waqacherqa soldadokuna llajtamanta jataripunankupaj, sapa ujtaj wasinkuman riporqanku. Joabtajrí kuraj kamachejwan parlaj Jerusalenman kutiporqa.

Davidta yanapajkuna

²³ Joabqa tukuy Israel ayllumanta soldadokunata kamachinanpaj churasqa karqa. Joyadáj churin Benaiastaj quereteokuna, jinataj peleteokuna soldadokunata kamachej karqa.

²⁴ Adoranqa runakunata llank'achinanpaj churasqa karqa. Kuraj kamachejpa qhelqerintaj Ajiludpa churin Josafat karqa.

²⁵ Sevapis qhelqerillataj karqa. Sadocwan Abiatarwantaj sacerdotekuna karqanku.

²⁶ Yaír llajtamanta Irataj Davidpa sacerdotellantaj karqa.