2 Samuel 2 - DIOSPA QHELQACHISQAN DEUTEROCANONICAL

David Judapi kuraj kamachej

¹ Chay qhepata Davidqa Tata Diosta tapurerqa: Riyta atiymanchu Judá suyumanta mayqen llajtallamanpis? nispa. Tata Diostaj kuticherqa: Arí, riyta atillanki, nispa. Davidqa ujtawan taporqa: Maymantaj risajri? nispa. Tata Diostaj nerqa: Riy, Hebrón llajtaman, nispa.

² Chantá Davidqa Hebrón llajtaman rerqa iskaynin warmin pusarisqa, Jezrel llajtamanta Ajinoán warminwan, chantá pichus Carmel llajtapi wañoj Nabalpa warmin Abigaíl karqa, chaypiwan.

³ Davidqa pusallarqataj soldadonkunatapis, sapa ujta aylluntinta. Jinamanta paykunaqa Hebrón cheqa llajtakunapi tiyakaporqanku.

⁴ Jinapi Judá jatun ayllumanta runakuna chayamorqanku. Chaypitaj aceitewan umanta jawispa, Davidta churarqanku Judá jatun ayllupi kuraj kamachej kananpaj. Chantá Davidman willarqanku Galaadpi Jabesmanta kajkuna Saulpa ayanta p'ampasqankuta.

⁵ Chaypacha Davidqa kachakunata Galaadpi Jabesman kacharqa, kay jinata nichispa: Tata Dios qankunata saminchachun Saulmanta khuyakusqaykichejrayku, ayanta jallp'aykichejpi p'ampasqaykichejmanta.

⁶ Tata Diostaj qankunata yanapachun, mana jayk'aj qankunata qonqaspa. Noqapis qankunapaj allin imakunata ruwasaj Saulta p'ampasqaykichejrayku.

⁷ Kunanqa kallpachakuychej, wapuchakuychejtaj. Saúl wañupunña chaypis, kunanqa kuraj kamachejpaj Judá jatun ayllumanta kajkuna noqata churawanku, nispa.

Israel suyu Judá suyuwan maqanaku

⁸ Chantá Saulpa soldadonkunata kamachej Nerpa churin Abnerqa Saulpa churin Isbosetta Majanayin llajtaman pusarqa.

⁹ Chaypitaj kuraj kamachej kananpaj payta churarqa kay llajtakunapi kamachinanpaj: Galaadpi, Gesuripi, Jezrelpi, Efrainpi, Benjaminpi, jinataj tukuy Israel suyupi.

¹⁰ Isbosetqa Israel suyuta kamachiyta qallarishaspa, tawa chunka watayoj karqa. Chantá iskay watata kamacherqa. Judá jatun ayllumanta kajkunatajrí Davidta kuraj kamachejninkupaj rejsikaporqanku.

¹¹ Jinamanta Davidqa Hebrón llajtamanta Judá jatun aylluta qanchis wata sojta killayojta kamacherqa.

¹² Uj kuti Abnerqa llojserqa Majanayin llajtamanta Gabaón llajtaman, Saulpa churin Isbosetpa soldadonkunawan.

¹³ Chaypachallataj Seruyáj churin Joabpis, Davidpa soldadonkunapiwan Hebronmanta llojsillarqankutaj. Chantá Gabaón yaku qocha chaynejpi tinkorqanku, chaypitaj chimpan chimpanpi tiyasharqanku, Israelmanta soldadokunaqa ujnin chimpanpi, Judamanta soldadokunataj chay ujnin chimpanpi.

¹⁴ Chantá Abnerqa Joabta nerqa: Waynakunata maqanachina, nispa. Joabtaj kuticherqa: Arí, walej kanman, nispa.

¹⁵ Ajinaqa Benjamín jatun ayllumanta Saulpa churin Isbosetpamanta kajkuna llojserqanku chunka iskayniyoj soldadokuna, Davidpa soldadonkunamantapis chunka iskayniyojllataj llojserqanku.

¹⁶ Sapa ujninkutaj chujchankumanta jap'inaykukorqanku. Chantá espadawan wajtankupi t'ojsinakorqanku, jinamanta ujllapi tukuyninku wañuchinakorqanku. Chayrayku Gabaonpi chay cheqaqa “Espada pampa” sutiwan sutichasqa karqa.

¹⁷ Chay p'unchaypeqa may sinch'ipuni maqanaku karqa. Jinapi Abnerqa, Israelpa soldadonkuna ima atipachikorqanku Davidpa soldadonkunawan.

¹⁸ Chay maqanakupi kasharqanku Seruyáj kinsantin churinkunapis: Joab, Abisay, Asael ima. Asaelqa taruka jina may sinch'itapuni phawaj.

¹⁹ Paytaj Abnerpa qhepanta qhatiykorqa nitaj ni mayman ayqejta saqerqachu.

²⁰ Abner qhepaman qhawarikamuspataj, qhaparerqa: Manachu qan Asael kanki? nispa. Paytaj kuticherqa: Arí, noqa kani, nispa.

²¹ Chantá Abnerqa kuticherqa: Amaña qhatiykachawaychu. Walej kanman mayqen soldadollatapis wañuchispa, tukuy kapuyninta jap'ikapunayki, nispa. Asaeltajrí mana uyarej tukuspa, qhatiykullarqapuni.

²² Jinapi Abnerqa watej Asaelta nillarqataj: Ama qhatiykachawayñachu, manachayqa wañurparichisqayki. Chaymantarí ima uyaywantaj wawqeyki Joabman chimpaymanri? nispa.

²³ Chantá Asael mana t'aqakuspa qhatiykullajtinpuni, Abnerqa lanzanwan Asaelpa wijsanman sat'irparerqa wasanman pasachinankama. Asaeltaj chay kikinpi wañusqa choqakorqa. Chaynejman tukuy runakuna chayaspataj, Asaelpa ayanta qhawanankupaj sayarej kanku.

²⁴ Joabwan, Abisaywantajrí Abnerta qhatiykullarqankupuni. Inti yaykupushajtinña, Amma nisqa orqoman chayarqanku. Chay orqoqa Guiaj chimpanpi, Gabaón ch'innejman rina ñan patapi kashan.

²⁵ Chaypeqa Benjamín jatun ayllumanta kajkuna Abnerwan ujllaman tantaykukuspa, chay Amma orqo patapi maqanakunankupaj sayaykorqanku.

²⁶ Chantá Abnerqa qhaparispa, Joabta nerqa: Mayk'akamataj maqanakullasunpuniri? Qan kamachiy soldadoykikunata amaña qhatinawaykuta. Wawqentin kanchej. Manachu yuyanki kayqa jatun llakiypi tukukunanta? nispa.

²⁷ Joabtaj kuticherqa: Tata Diospa sutinpipuni tiluyki. Manachus ajinata qhaparimuwankiman karqa chayqa, soldadoykunaqa sut'iyanankama wawqenkunata qhatiykullankumanpuni karqa, nispa.

²⁸ Chayta uyariytawankamataj Joabqa putututa waqacherqa. Chantá tukuy soldadonkuna manaña qhatiykorqankuchu israelitakunata, nitaj paykunawan maqanakorqankuñachu.

²⁹ Chantá Abnerqa chay soldadonkunawan khuska tukuy tutantin Arabá pampanta rerqanku. Chay ñanllatapuni rispa, Jordán mayuta chimparqanku, Bitronnejta rispataj, Majanayinman chayarqanku.

³⁰ Joabqa Abnerta qhatiykachasqanmanta kutimpuspa, tukuy soldadonkunata waturakorqa, chaypitaj yachakorqa Asael chantá Davidpa soldadonkunamanta chunka jisq'onniyoj imalla wañusqanku.

³¹ Davidpa soldadonkunatajrí 360 runakunata wañuchisqanku Abnerpa soldadonkunata, Benjaminpa soldadonkunatawan.

³² Chay qhepata Asaelpa ayanta aparqanku Belén llajtaman, tatanpa aya p'ampananpitaj p'ampaykorqanku. Joab, soldadonkuna imaqa tukuy tutantinta rispallapuni, sut'iyarqoshajtin Hebronman chayarqanku.