2 Samuel 19 - DIOSPA QHELQACHISQAN DEUTEROCANONICAL

¹ 1 (2) Kuraj kamachejqa churin Absalón wañusqanmanta sinch'i llakiyta waqasqanta Joabman willamorqanku.

² 2 (3) Jinamanta chay p'unchaypi atipasqankumanta kusikuyninkoqa llakiyman tukorqa.

³ 3 (4) Chay kutimoj soldadokunapis llajtaman pakayllamanta yaykorqanku, maqanakumanta ayqekamoj p'enqasqa soldadokuna jina.

⁴ 4 (5) Kuraj kamachejtajrí uyanta jap'iykukuspa, mayta waqarqa: Wawáy Absalón. Wawáy, wawitáy, nispa.

⁵ 5 (6) Chantá Joabqa kuraj kamachejpa wasinman rispa, nerqa: Qan kuraj kamachejniykoqa soldadoykikunata p'enqaypi rikhurichinki. Paykunaqa wañunaykimanta jark'akusorqanku, jinallataj churiykikunata, ususiykikunata, warmiykikunata, waj warmiykikunatawan ima.

⁶ 6 (7) Kunanrí qanqa rikuchishawayku kamachejniykikunata, yanapasojkunatapis mana allinpaj qhawasqaykita. Qanqa chejnikusojkunata munakunki, munakusojkunatatajrí chejninki. Kunan yachani qanpajqa aswan walej kanman karqa Absalón kawsananqa, noqaykutaj tukuyniyku wañunayku.

⁷ 7 (8) Kunan llojsispa, kamachiykikunata sonqochamuy, manachayqa Tata Diospa sutinrayku tiluni: Kunan ch'isi kutimojkunamanta mana uj runallapis qanwan qhepanqachu. Chayqa aswan jatun llakiy kanman qanpaj, wayna kasqaykimantapacha tukuy llakiykuna qhatarisusqanmantaqa, nispa.

⁸ 8 (9) Chantá kuraj kamachej Davidqa llajtaj punkunman rispa, tiyakamorqa. Tukuy soldado punkupi tiyakushasqanta yachaspa, payman rerqanku. Israelitakunatajrí tukuyninku wasinkuman ayqerqanku.

David Jerusalenman kutipun

⁹ 9 (10) Israelitakuna siminakusharqanku: Kuraj kamachej Davidqa awqanchej filisteokunamanta kacharichiwarqanchej. Chaywanpis Absalonrayku karuman ayqerqa.

¹⁰ 10 (11) Kuraj kamachej churasqanchej Absalonqa maqanakupi wañun. Imatataj suyashanchej, kuraj kamachej Davidta mana kutichimunanchejpajri? nispa.

¹¹ 11 (12) Davidtaj tukuy parlasqankuta uyarerqa. Chaypacha Davidqa sacerdote Sadocman, Abiatarman ima kay jinata willacherqa: Qankuna parlaychej Judá jatun ayllumanta kurajkunawan, tapuychejtaj imaraykuchus qhepakushanku kamachinay wasiman mana kutichiwaspa.

¹² 12 (13) Nillaychejtaj: Kikin aylluykichejmanta kashajtiy, qankuna imatataj suyashankichej mana kutichiwanaykichejpajri? nispa.

¹³ 13 (14) David kamachillarqataj Amasaman ninankuta: Qanqa yawar masiy kanki. Jinaqa kunanmanta ñawpajmanqa Joabpa cuentanmanta soldadoykunaj kuraj kamachejninku kanki. Manachus nisusqayta junt'asaj chayqa, Tata Dios sinch'ita jasut'iwachun, nispa.

¹⁴ 14 (15) Ajinamanta Davidqa Judá jatun ayllumanta runakunaj sonqonkuta suwarqa, tukuyninkutaj uj runa jinalla kuraj kamachejta chantá yanapajninkunata wajyachikamporqanku.

¹⁵ 15 (16) Chaypacha kuraj kamachejqa Jordán mayukama jamorqa. Chay jawataj Judamanta kajkunaqa taripaj Gilgalman rerqanku, mayuta chimpayta yanapanankupaj.

¹⁶ 16 (17) Jinallataj Benjamín ayllumanta, Bajurín llajtamanta Geraj churin Simeypis, Judamanta runakunawan khuska usqhayllata urayk'amorqa kuraj kamachej Davidta taripamunanpaj.

¹⁷ 17 (18) Paywantaj Benjamín jatun ayllumanta 1.000 runakuna jamorqanku. Jinallatataj Saulpa uywaqen Sibapis chunka phishqayoj wawankunawan, iskay chunka kamachinkunawan ima rispa, Jordán mayuman chayarqanku manaraj kuraj kamachej chayashajtin.

¹⁸ 18 (19) Chay mayuta chimparqanku kuraj kamachejpa ayllunta chimpachimunankupaj, allin qhawasqa kananpaj. Maypachachus kuraj kamachej Jordán mayuta chimpananpaj wakichikushajtin, Geraj churin Simeyqa kuraj kamachejpa ñawpaqenpi k'umuykuspa,

¹⁹ 19 (20) nerqa: Kuraj kamachejníy, mañarikuyki pantakusqayta qonqapunaykita, manañataj yuyanaykita Jerusalenmanta llojsimushajtiyki, sajra kajta contraykipi ruwasqaymanta. Amataj phiñapayawaychu.

²⁰ 20 (21) Noqa yachakuni juchallisqayta, chayrayku tukuynin Joséj ayllunmanta, noqaqa aswan ñawpajta, kuraj kamachejniyta taripaj llojsimuni, nispa.

²¹ 21 (22) Chaypacha Seruyáj churin Abisay nerqa: Simeyqa manachu wañunan tiyan, Tata Diospa ajllakusqan kuraj kamachejta maldicisqanmanta? nispa.

²² 22 (23) Davidtajrí kuticherqa: Ni ima ruwanay kanchu qankunawan, Seruyáj churinkuna. Imaraykutaj churanakuwankichejri? Kunan cheqamanta yachani Israelpa kuraj kamachejnin kasqayta. Chayrayku kunan p'unchayqa mana pipis Israelpi wañuchisqachu kanqa, nispa.

²³ 23 (24) Chaymantataj kuraj kamachejqa Simeyta nerqa mana wañuchinanta.

²⁴ 24 (25) Jinapi Saulpa allchhin Mefibosetpis llojsillarqataj kuraj kamachejta taripamunanpaj. Kuraj kamachej llojsisqanmantapacha walejlla kutimpunankama, Mefibosetqa chakinta mana mayllakusqachu, nitaj sunkhantapis k'utukusqachu, nillataj p'achantapis t'ajsakusqachu.

²⁵ 25 (26) Chantá Jerusalenmanta taripaj jamorqa chaypacha, kuraj kamachejqa payta nerqa: Mefiboset, imaraykutaj noqawan mana rerqankichuri? nispa.

²⁶ 26 (27) Mefibosettaj kuticherqa: Kuraj kamachejníy, kamachiy mana kasuwarqachu. Mana puriyta atisqayrayku, kamacherqani uj burrota sinchapunawanta, chayman lloq'aykuspa qanwan rinaypaj.

²⁷ 27 (28) Jinallataj payqa qanman qhasimanta ch'ataykuwan. Chaywanpis qan kuraj kamachejneyqa Diospa angelnin jina kanki. Imachus allin rijch'asusqanta noqawan ruway.

²⁸ 28 (29) Tataypa tukuy ayllonqa wañunan karqa. Chaywanpis noqa kamachiykitaqa wajyachiwarqanki qanwan khuskallapuni wasiykipi mikhunaypaj. Imatawantaj mañakuyman qan kuraj kamachejniymantari? nispa.

²⁹ 29 (30) Kuraj kamachejtaj kuticherqa: Manaña kanchu imapis parlanaqa. Kamachini qanwan, Sibawan jallp'ata rak'inakunaykichejta, nispa.

³⁰ 30 (31) Mefibosettaj kuticherqa: Paylla tukuynin jallp'ata jap'ikapuchun. Qan, kuraj kamachejníy, walejllata kutimpunki kamachinayki wasiman, nispa.

³¹ 31 (30) Galaadmanta Barzilaypis Roguelín llajtamanta urayk'amorqa Jordán mayuta kuraj kamachejwan khuska chimpananpaj, chaypitaj Davidta kacharpayapunanpaj.

³² 32 (33) Payqa allin machuña karqa, pusaj chunka watayojña. Majanayin llajtapi kuraj kamachej David kashanankama, tukuy imata kuraj kamachejman jaywasqa may qhapaj kasqanrayku.

³³ 33 (34) Kuraj kamachejqa chaypacha Barzilayman nerqa: Jerusalenman noqawan ripuna. Chaypi noqa uywasqayki, nispa.

³⁴ 34 (35) Barzilaytajrí kuticherqa: Manaña unaytachu noqaqa kawsasaj, Jerusalenman qanwan ripunaypajqa.

³⁵ 35 (36) Pusaj chunka watayojña kani. Manaña yachanichu imachus allin mana allin kajpatapis. Manaña sumajta mikhunichu nitaj ujyanipischu. Manañataj uyariyta atinichu takejkunatapis. Kuraj kamachejníy, imamanñataj qanpa llakiyniyki kanaypaj riymanri?

³⁶ 36 (37) Qanwan Jordán mayumanta aswan jaqaynejkamalla risaj. Imaraykutaj qan kuraj kamachej t'inkachiwankimanri?

³⁷ 37 (38) Kuraj kamachejníy, mañarikuyki llajtayman kutipunayta saqenawaykita, chaypi wañupunaypaj, tataykunaj covachankupi ayayta p'ampanawankupaj. Chaywanpis, kuraj kamachejníy, kaypi kashan churiy Quimán. Pay qanwan richun, qantaj paypaj ruway, imachus allin rijch'asunki, chayta, nispa.

³⁸ 38 (39) Kuraj kamachejtaj kuticherqa: Quimán noqawan richun, noqataj imatachus munasqaykita paywan ruwasaj. Imatachus mañawasqaykita qosqayki, nispa.

³⁹ 39 (40) Chantá tukuy runakuna Jordán mayuta chimparqanku, kuraj kamachejtaj mayuta chimpaspaña, Barzilayta samincharqa, much'aykuspataj kachaporqa. Barzilaytaj wasiman kutiporqa.

⁴⁰ 40 (41) Kuraj kamachejtaj Gilgal llajtaman Quimanwan khuska rerqa, jinataj Judamanta kaj tukuy runawan. Israelitakunamanta khuskan jina runakunapis paywan rillarqankutaj.

⁴¹ 41 (42) Chaypacha tukuynin israelitakuna kuraj kamachejta watukoj rispa, nerqanku: Imaraykutaj Judá jatun ayllumanta kaj wawqeykukunalla qan kuraj kamachejniykuta jap'ikapunkumanri? Paykunallachu qanta, aylluykita, soldadoykikunatapis chawpillankupi Jordán mayuta chimpachisunkuman? nispa.

⁴² 42 (43) Judá jatun ayllumanta kajkunatajrí israelitakunaman kuticherqanku: Imaraykuchus kuraj kamachejqa noqaykoj qaylla aylluyku. Imaraykutaj chayllamanta phiñakuwajchejri? Noqaykutaqa kuraj kamachejchu mikhuchiwayku, chayrí payqa imatachu noqaykuman qowashayku? nispa.

⁴³ 43 (44) Jinapi israelitakunaqa kutichillarqankutaj: Noqayku aswan ashkha kayku qankunamanta nisqaqa, chayraykutaj kuraj kamachej Davidqa noqaykuwanrajmin kanan kashan. Jinaqa imaraykutaj manakajpaj qhawawaykuri? Manachu noqaykoqa qankunamanta aswan ñawpajta mañarqayku kuraj kamachej kutimpunanta? nispa. Chaywanpis Judá jatun ayllumanta kajkunaqa phiñarikuspa aswan sinch'ita parlarqanku israelitakunamanta nisqaqa.