2 Samuel 18 - DIOSPA QHELQACHISQAN DEUTEROCANONICAL

Absalón wañun

¹ Davidqa tukuy soldadonkunata tantaykuspa, waranqa waranqamanta, jinataj pachaj pachajmanta t'aqararqa, sapa t'aqamantaj kamachejkunata churarqa.

² Tukuynin soldadota kinsaman t'aqarqa. Ujnin t'aqata Joab kamacherqa, ujnintataj Seruyáj churin Joabpa wawqen Abisay kamacherqa, chay ujnin t'aqatataj Gatmanta Itay kamacherqa. Tukuynin soldadonkunatataj David nerqa: Noqa qankunawan khuska maqanakoj risaj, nispa.

³ Paykunatajrí kuticherqanku: Ama qanqa noqaykuwan riychu. Paykunaqa ayqesqaykuta chayrí wañusqaykuta mana qhawanqankuchu. Qanqa noqaykumanta nisqaqa 1.000 soldadokuna jina valenki. Chayrayku walej kanman kay llajtapi qhepakunallayki, kaymantapacha yanapajkunata kachamunawaykupaj, nispa.

⁴ Kuraj kamachejtaj paykunata nerqa: Ruwasaj imachá aswan allin rijch'asunkichej, chayta, nispa. Chantá llajta yaykuna punkumanta uj ladoman sayaspa, soldadokunata waranqa waranqamanta, jinataj pachaj pachajmanta llojsejta qhawarqa.

⁵ Chay jawaqa kuraj kamachejqa Joabta, Abisayta, Itayta ima kamacherqa: Noqata munakuwasqaykichejrayku, chay wayna Absalonta khuyayllawan qhawaychej, nispa. Tukuy soldadokunataj uyarerqanku kuraj kamachej imatachus kurajkunaman Absalonmanta kamachisqanta.

⁶ Ajinata ari Davidpa soldadonkunaqa llojserqanku Israel soldadokunawan maqanakamunankupaj. Efraín jatun aylloj jap'iynin montepi maqanakorqanku,

⁷ Israelmanta kajkunataj atipachikorqanku Davidpa soldadonkunawan. Chay p'unchaypeqa may ashkhapuni wañuchisqa karqanku. Tukuypi 20.000 jina wañorqanku.

⁸ Maqanakoqa tukuynejpi karqa, kay kutipitaj monte ukhupi chinkasqa wañusqankoqa aswan ashkha karqa espadawan wañuchisqa kajkunamanta nisqaqa.

⁹ Absalontajrí mulapi rishaspa, Davidpa soldadonkunawan tinkukorqa. Jinapi Absalón ayqekushajtin, chay mulaqa uj jatun encina sach'a uraman yaykuykorqa, Absalonpa chujchantaj encina sach'aman ch'ipaykukorqa. Paytaj warkhusqa qhepakorqa, mulataj cheqanta riporqa.

¹⁰ Uj soldadotaj chayta rikuspa, Joabman willamorqa: Absalonta rikorqani uj encina sach'api warkhusqata, nispa.

¹¹ Joabtaj kuticherqa: Rikusparí, imaraykutaj chay kikinpi mana wañucherqankichuri? Noqaqa kusiywan chunka qolqeta, uj chumpitawan t'inkata qoykiman karqa, nispa.

¹² Chay runatajrí Joabman kuticherqa: Waranqa qolqeta qoshawajtiykipis, kuraj kamachejpa churinpa contranpeqa mana makiytaqa oqhariymanchu. Tukuyniyku uyarerqayku kuraj kamachej imatachus kamachisqanta qanman, Abisayman, jinataj Itaymanpis, churin Absalonta ama imatapis ruwanaykichejmanta.

¹³ Chaytachus ruwayman karqa chayqa, noqaj contrallaypajtaj kanman karqa, imaraykuchus kuraj kamachejpajqa mana imapis pakasqaqa kanchu. Qantaj kuraj kamachejmanta jark'akunawaykipaj mana imatapis ruwawajchu karqa, nispa.

¹⁴ Joabtaj kuticherqa: Mana astawan tiempoyta usuchiymanchu qanwan parlaspa, nispa. Chantá kinsa lanzata oqhariykukuspa, maypichus Absalón kasharqa, chayman rerqa. Chantá Absalonman chay kinsa lanzata sat'iykorqa encina sach'api warkhusqa kashajtin.

¹⁵ Chaymantataj Joabpa chunka armanta apajkuna soldadonkuna Absalonta muyuykuspa, tukucharparerqanku.

¹⁶ Chantá Joabqa kamacherqa cornetata waqachinankuta, soldadokunataj manaña astawan israelitakunata qhatiykorqankuñachu, Joab paykunata sayachisqanrayku.

¹⁷ Chaypacha Absalonpa ayanta, chay montepi uj jatun jusk'u karqa, chayllaman wijch'uykorqanku, patanmantaj rumita may chhikata qolluykorqanku. Tukuy israelita soldadokunataj sapa uj wasinkuman ayqerqanku.

¹⁸ Absalonqa kawsashaspallaraj, paymanta yuyarikunankupaj uj jatun sayantata rumimanta jatarichisqa “Kuraj Kamachejpa Vallen” nisqapi. Chay sayantamantaj sutinta churasqa, mana uj churillanpis sutinta apananpaj kasqanrayku. Kunankamataj chayqa sutichasqa kashan “Absalonpa Rumi Sayantan” nisqa.

¹⁹ Chantá Sadocpa churin Ajimazqa Joabman nerqa: Mañarikuyki, saqenawaykita kuraj kamachejman usqhayta rispa willamunayta Tata Dios justiciata ruwasqanta, awqanpa atiyninmanta kacharichispa, nispa.

²⁰ Joabtajrí kuticherqa: Kunanqa mana walejchu kanman kuraj kamachejman churin wañusqanmanta willaj rinaykeqa. Waj kutipi rinki, nispa.

²¹ Chantá Joabqa Etiopiamanta uj soldadota nerqa: Riy qan kuraj kamachejman willamuy imatachus rikusqaykita, nispa. Etiopiamanta runataj Joabpa ñawpaqenpi k'umuykukuytawan, usqhayta rerqa.

²² Sadocpa churin Ajimazrí Joabta nillarqapuni: Imapis kachun, etíopej qhepanta risaj, nispa. Joabtaj kuticherqa: Imapajtaj riyta munanki, wawáy? Willamusqaykimantaqa mana ima t'inkatapis jap'inkichu, nispa.

²³ Ajimaztajrí kuticherqa: Munajtiyki, mana munajtiykipis, usqhayta risajpuni, nispa. Joabtaj kuticherqa: Riypis á, nispa. Chaypacha Ajimazqa vallenta usqhayta rispa, etíope runata atiparqa.

²⁴ Chaykama Davidqa llajta yaykuna punku chawpipi tiyarikusharqa, chay llajta qhawaj soldadotaj perqa patapi kasharqa, chay llajtaman yaykuna punku chaynejpi. Qhawarispataj, chay soldadoqa rikorqa uj runata sinch'ita corremushajta.

²⁵ Kuraj kamachejmantaj qhaparispa willarqa. Kuraj kamachejtaj nerqa: Sapallanchus jamushan chayqa, walej willayta apamushan, nispa. Chay runa astawan qayllamushajtintaj,

²⁶ chay qhawaj soldadoqa waj runata corremushajta rikullarqataj, qhaparerqataj, punkupi kasharqa, chay soldadoman: Waj runapis jamushallantaj, nispa. Kuraj kamachejtaj kuticherqa: Walej willaytachá apamushallantaj, nispa.

²⁷ Chay soldadoqa astawan nillarqataj: Ñawpaj kaj runaj purisqanqa Sadocpa churin Ajimazman rijch'akun, nispa. Kuraj kamachejtaj kuticherqa: Payqa sumaj runa. Cheqamanta walej willaytachá apamushan, nispa.

²⁸ Ajimazqa karullapiraj kashaspa, qhaparispa napaykorqa. Chantá kuraj kamachejpa ñawpaqenman chayaytawan, pampakama k'umuykuspa nerqa: Saminchasqa kachun Tata Diosniyki, qanpa contraykipi oqharikojkunata chinkachisqanrayku, nispa.

²⁹ Davidtajrí taporqa: Walejllachu kashan wayna Absalonqa? nispa. Ajimaztaj kuticherqa: Kamachiyki Joab kachamushawajtenqa, rikorqani ashkha runata qhollpirakushajta, manataj yacharqanichu imachus kasqanta, nispa.

³⁰ Chaypacha kuraj kamachejqa kamacherqa: Ithiriy uj ladoman, chaypitaj qhepakuy, nispa. Ajimaztaj kuraj kamachejpa nisqanta ruwarqa.

³¹ Chayllapi etíope runapis chayamuspa, nillarqataj: Kuraj kamachejníy, uyariy kay sumaj willayta: Kunan Tata Diosqa justiciata ruwasunki, kacharichisuspa contraykipi karqanku, tukuy chaykunamanta, nispa.

³² Kuraj kamachejqa chay etiopeta taporqa: Absalón waynaqa walejllachu kashan? nispa. Chay etiopetaj kuticherqa: Chay wayna jina tukukuchunku contraykipi oqharikojkunaqa, qanpaj sajra kajta mask'apusunku, chaykunapis, nispa.

³³ 33 (19.1) Chayta uyariytawan, kuraj kamachejqa sinch'i llakiywan chay llajta punku patapi wasi kasharqa, chayman wicharispa, waqayta qallarerqa. Puriykachaj jinataj nisharqa: Absalón wawáy, Absalón wawáy. Qan wañunaykimantaqa noqa wañuyman karqa. Wawáy, Absalón wawáy, nispa.