2 Samuel 17 - DIOSPA QHELQACHISQAN DEUTEROCANONICAL

Jusayqa Ajitofelpa umachasqanta pantachin

¹ Chay qhepata Ajitofelqa Absalonta nerqa: Saqeway 12.000 soldadokunata ajllanayta, kunan ch'isipacha Davidpa qhepanta llojsinaypaj.

² Pay llawch'iyasqa pisi kallpa kashajtin, noqaqa kaymanta jinalla chayaspa manchariykuchisaj, paywan kashaj runankunataj ayqerikaponqanku. Kuraj kamachejllatataj wañuchisaj.

³ Chaymantataj chay tukuy runata qanwan allinyachisqayki, imaynatachus uj warmi qosanwan allinyakun ajinata. Qanqa uj runaj wañunallanta mask'anki, tukuy runapajtaj mana ima llakiypis kanqachu, nispa.

⁴ Ajitofelpa yuyaychasqanqa Absalonman, jinataj israelitakunaj kurajninkukunamanpis sumaj rijch'arqa.

⁵ Chaywanpis Absalonqa kamachillarqataj arquita Jusayta wajyanankuta, imachus yuyasqanta ninanpaj.

⁶ Jusay chayamojtintaj, Absalonqa payta nerqa: Ajitofelqa kay jinata yuyan. Ruwasunmanchu chayta, chayrí amachu? Qan ima ninkitaj? Niwayku ari, nispa.

⁷ Jusaytaj Absalonman kuticherqa: Kay kutipi Ajitofelpa yuyaychasqanqa mana walejchu.

⁸ Qanqa yachanki tatayki, chay runankuna ima kallparara wapu kasqankuta. Kunantaj imaynatachus china jukumarimanta uñanta qhechojtinku phiñarikun, jinatachari phiña kashanku. Chay jawaqa tataykeqa maqanakuyman yachasqa, runankunawan khuskataj mana uj ch'isitapis puñushanchu.

⁹ Kunanpis uj chhanka jusk'upichari pakakushan, chayrí may cheqanejpichus. Chay jawarí ñawpaj kutipi runaykikunamanta wañurasqankuta uyariytawankama, wakinkunaqa yuyanqanku Absalonpa soldadonkuna atipachikusqankuta.

¹⁰ Aswan phiña león jina runakunapis sinch'ita iskayrayanqanku, imaraykuchus tukuy Israel ayllupi yachanku tatayki jina soldadonkunapis wapu kasqankuta.

¹¹ Kunanqa yuyaychaykiman tukuynin israelitakunata Danmantapacha Berseba llajtakama qanwan tantakunankuta, tukuy tantakuspataj mama qocha kantupi t'iyu jina mana yupay atina kanqanku. Qan kikiykitaj maqanakupi paykunata kamachiwaj.

¹² Jinamanta tataykiwanqa maqanakoj wakiykusunchej, maypichá taripasun, chaypi. Imaynatachus chhulla pampaman urmamun, ajinata paykunawan maqanakoj yaykusunchej. Ajinata payta, soldadonkunata ima tukuyninta wañuchisunchej.

¹³ Sichus mayqen llajtapipis pakakunman chayqa, tukuy israelitakuna waskhata apasqayku chay llajtaj perqantataj thuñisqayku. Jinaspataj, tukuy ruminta wayq'oman wijch'umusqayku, chaypi mana uj rumillapis puchunankama, nispa.

¹⁴ Absalón, tukuy israelitakuna imaqa yuyarqanku Jusay arquitaj nisqan aswan allin kasqanta Ajitofelpa yuyaychasqanmanta nisqaqa. Tata Diosqa nisqaña Ajitofelpa yuyasqanqa mana ruwakunanta, Absalonpa patanman llakiyta apachimunanpaj.

¹⁵ Jinapi Jusayqa sacerdote Sadocman, Abiatarman ima willarqa Absalonman, jinataj Israelmanta kurajkunamanpis Ajitofel imatachus yuyaychasqanta, jinallataj paypis imatachus yuyaychasqanta ima.

¹⁶ Jinamanta nerqa usqhayllata kuraj kamachej Davidman kay jinata willamunankuta: Ama chay ch'innejpi puñunkichejchu, manachayqa Jordán mayuta chimpaychej, Absalonpa soldadonkuna qanta jinataj soldadoykikunata ama wañuchinankupaj, nispa.

¹⁷ Jonatanwan, Ajimazwanqa Roguelpi kasharqanku, imaraykuchus llajtaman yaykushajtinku runa mana rikunanta munarqankuchu. Chantá uj warmi kamachi rispa, paykunaman willamorqa, chay ratopachataj paykunaqa kuraj kamachej Davidman willaj kachaykukorqanku.

¹⁸ Chaywanpis uj waynuchu paykunata rikuspa, Absalonman willaykamorqa. Chantá Jonatanwan, Ajimazwanqa usqhayta rispa, Bajurín llajtapi uj runaj wasinman chayarqanku, pakaykukorqankutaj pationpi kaj pujyuman.

¹⁹ Chay wasiyojpa warmintaj pujyoj siminman uj mantawan qhataykuspa, chay patanman trigota churaykorqa. Manataj pipis repararqachu.

²⁰ Chantá Absalonpa runankuna chayaspa, chay warmita taporqanku: Maypitaj kashanku Ajimazwan, Jonatanwanri? nispa. Chay warmitaj kuticherqa: Kayninta mayunejman rerqanku, nispa. Chaypacha Absalonpa runankunaqa paykunata mask'amorqanku, mana tarispataj, Jerusalenman kutiporqanku.

²¹ Chay runakuna ripusqankutawantaj, Ajimazwan, Jonatanwanqa pujyumanta llojsiytawankama, usqhayta rispa Davidman willamorqanku: Usqhayta mayuta chimpaychej, imaraykuchus Ajitofelqa contraykichejpi chay jinata umachan, nispa.

²² Chantá Davidqa tukuy runankunawan usqhayta Jordán mayuta chimparqanku. Q'ayantin paqarintaj Jordán mayuta mana chimpajqa ni ujpis qhepakorqachu.

²³ Ajitofelqa Absalón yuyaychasqanta mana kasusqanta rikuspa, burronta sinchaykuytawan, llajtanpi wasinman riporqa. Wasinpi tukuy kajta allinchaytawan, sipirparikorqa. Chantá ayllunkunaqa ayanta tatanpa covachanman p'ampamorqanku.

Davidqa Majanayin llajtaman chayan

²⁴ Davidqa Majanayin llajtaman chayarqa, chaykamataj Absalonqa Jordán mayuta tukuynin israelita soldadonkunawan chimparqa.

²⁵ Absalonqa soldadokuna kamachejta ismaelita Itraj churin Amasata churarqa, pay Joabpa cuentanmanta kamachinanpaj. Itraqa Najaspa ususin Abigailwan casarakusqa, payqa Joabpa maman Seruyáj ñañan karqa.

²⁶ Absalonqa Galaad jap'iypi israelitakunawan khuska jarakorqa.

²⁷ David Majanayin llajtaman chayarqa chaypacha, Najaspa churin Sobi payta taripaj llojsimorqa. Pay karqa Amonpi Rabá llajtamanta. Jinallataj Lodebar llajtamanta Amielpa churin Maquir, chantá Galaadpi Roguelín llajtamanta Barzilaypis Davidta taripaj llojsimullarqankutaj.

²⁸ Paykuna apamorqanku phullukunata, yurukunata, mankakunata, jinataj trigota, cebadata, jak'uta, cebada jank'ata, jabasta, lentejata,

²⁹ abeja misk'ita, ñojñuta, waka quesota, oveja quesota ima. Chayta apamorqanku David, jinataj paywan rejkuna mikhunankupaj, imaraykuchus yuyasqanku: Ch'innejmanta chayamuspaqa sayk'usqa, yarqhasqa, yakumanta ch'akisqataj chayamonqanku, nispa.