2 Samuel 15 - DIOSPA QHELQACHISQAN DEUTEROCANONICAL

Absalonqa Davidpa contranpi oqharikun

¹ Chaymanta mana unayninmanchu, Absalonqa carretata ruwachikorqa, caballokunata ima rantikorqa. Ñawpaqenta purinankupajtaj phishqa chunka runatawan mink'akorqa.

² Chantá tuta tutamanta jatarispa, ñan kantuman rej, llajta punkunejman jina. Jinataj pillapis kuraj kamachejta mask'aj jamojtin, justiciata ruwananta munaspa, Absalonqa chay runata wajyaspa, maymantachus kasqanta tapoj. Sichus chay runa Israelpa ujnin kaj ayllumanta kasqanta nej chayqa,

³ Absalonqa kay jinata nej: Cheqamanta quejakusqaykeqa walejpuni, maychus kajtaj kashan. Chaywanpis mana pipis kuraj kamachejpa churasqan kanchu justiciata ruwaj, nispa.

⁴ Nillajtaj: Imaynapichus noqata churawankuman kay suyupi juezninku kanaypaj. Chaypacha noqaman jamuwankuman tukuy quejakunayoj kajkuna, noqataj justiciata ruwayman, nispa.

⁵ Chay jawarí, pillapis k'umuykuspa napaykojtenqa, Absalonqa q'apirej, ojllaykoj, much'aykojtaj.

⁶ Chay jinata Absalonqa ruwaj llajtaman yaykoj tukuy israelitakunawan, justiciata mask'aspa kuraj kamachejta watukoj rejkunawan. Ajinata ruwaspataj, tukuy israelitakunaj sonqonkuta suwarqa.

⁷ Tawa wataman jinataj, Absalonqa kuraj kamachejta nerqa: Kuraj kamachejníy, ama jina kaychu Hebrón llajtaman rejta saqerillaway, Tata Diosman imatachus qosaj nisqayta junt'amunaypaj.

⁸ Noqa kamachiykeqa Siria suyupi Gesur llajtapiraj tiyakushaspa, Tata Diosman nerqani, sichus pay Jerusalenman kutichimuwanman chayqa, noqa payta yupaychanayta, nispa.

⁹ Kuraj kamachejtaj kuticherqa: Rillay, allillantaj risuchun, nispa. Chantá Absalonqa Hebrón llajtaman riporqa.

¹⁰ Chaypachallataj tukuy Israel ayllukunaman kachakunata kacharqa willanankupaj: Putututa waqajta uyarejtiykichejkama, willaychej Hebrón llajtapi Absalón kuraj kamachej kananpaj churasqa kasqanta, nispa.

¹¹ Chay jawa Absalonqa Jerusalenmanta 200 runakunata wajyakorqa. Paykunarí mana imata yachaspa rerqanku.

¹² Ajinallataj Absalonqa Gilo llajtamanta wajyachimorqa Davidpa umachajnin Ajitofelta, Tata Diosman uywa ñak'asqa q'olachinata jaywashajtin, paywan khuska kananpaj. Jinamanta kuraj kamachej Davidpa contranpi kajkuna astawan kasharqanku. Absalonwan sayasqa kajkunaqa yapakushallarqankupuni.

David Jerusalenmanta ayqekun

¹³ Uj runaqa Davidman willaj rerqa israelitakuna Absalonman k'askakapushasqankuta.

¹⁴ Chaypacha Davidqa kamacherqa tukuy Jerusalenpi kaj kamachinkunata: Kunanpacha ayqenachej, manachayqa Absalonmanta ayqeyta mana atisunchu. Jakuchej usqhayta. Pajtataj taripaspa, sinch'i llakiyta ruwawasunman, llajtapi tiyakojkunatataj wañurachinman, nispa.

¹⁵ Paykunataj kuraj kamachejman kuticherqanku: Noqaykoqa wakisqaña kashayku imatachus qanpa kamachisqaykita ruwanaykupaj, nispa.

¹⁶ Ajinata kuraj kamachej Davidqa kamachinan wasimanta tukuy ayllunwan khuska llojserqa. Wasita qhawanankupaj chay ujnin warminkunamanta chunkallata saqerqa.

¹⁷ Kuraj kamachejwan, runankunapiwan llojsishaspa, llajta kantu wasipiraj samarikorqanku.

¹⁸ Kuraj kamachejpa ladonman tukuy kamachinkuna sayarqanku. Chantá kuraj kamachejta qhawaj soldadokuna quereteomanta, peleteomantapis paypa ñawpaqenta pasarqanku. Jinallataj 600 geteokunapis pasallarqankutaj, pikunachus Gat llajtamantapacha kuraj kamachejwan khuska jamusqanku, chaykuna.

¹⁹ Chantá kuraj kamachejqa Gat llajtamanta kaj Itayta nerqa: Imaraykutaj qanpis noqaykuwan jamunkiri? Kutipuy, chay mosoj kuraj kamachejwan qhepakamuy, imaraykuchus qanqa mana kay llajtayojchu kanki, llajtaykimantapis wijch'umusqa kanki.

²⁰ Qaynallaraj chayamorqanki. Imaynatataj nisqayki noqawan rinaykitari? Mana yachanichu maymanchus rinaytapis. Kutipullay, kay llajta masiykikunatawan pusakapuy. Tata Diostaj khuyakususpa waqaychasuchun, nispa.

²¹ Itaytajrí kuticherqa: Tata Diospa sutinrayku, qanpa sutiykiraykutaj tiluni: Mayllamanpis rejtiykeqa, noqaqa qanwanpuni kasaj, nispa.

²² Chantá David nerqa: Jina kajtenqa, jamuy noqaykuwan, nispa. Ajinamanta Itayqa Davidwan rerqa, tukuy runankunawan, tukuy ayllunkunawan khuska.

²³ Davidta runankunawan ripojta rikuspa, tukuyninku jik'un jik'unta waqarqanku. Davidqa chantá runankunawan Cedrón wayq'ota chimpajtinkukama, tukuy runakuna rerqanku ch'innejman rej ñanninta.

²⁴ Sadocpis Diospa arcanta apajkuna levitakunawan khuska rillarqataj. Chantá Abiatarpa ladonman arcata saqerqanku tukuy runakuna llajtamanta llojsinankukama.

²⁵ Jinapi kuraj kamachejqa Sadocta nerqa: Diospa arcanta llajtaman kutichipullay. Sichus Tata Dios khuyawanqa chayqa, pay munanqa kutimunayta arcanta rikunaypaj, jinallataj maypichus kashan, chay cheqatapis.

²⁶ Sichus niwanqa: Mana qanwanqa sonqo junt'asqachu kani, nispa chayqa, noqawanqa imatachus munasqanta ruwachun, nispa.

²⁷ Kuraj kamachejqa sacerdote Sadocta nillarqataj: Qanwan, Abiatarwan, churiyki Ajimazwan, Abiatarpa churin Jonatanwan ima llajtaman kutillaychej.

²⁸ Chaykama noqaqa kay ch'innejpi qhepakusaj, imachus kasqanta willachimunawaykichejkama, nispa.

²⁹ Chantá Sadocwan, Abiatarwanqa Diospa arcanta Jerusalenman kuticherqanku, chaypitaj qhepakorqanku.

³⁰ Davidtajrí Olivos orqo wichayta q'ara chakilla, waqaspa, umanta qhataykukuspataj wicharerqa. Tukuy paywan kajkunapis umankuta qhataykukuspa, waqaspallataj wicharerqanku.

³¹ Maypachachus Davidman willarqanku Ajitofelpis Absalonman kutisqa kasqanta chaypacha, Davidqa Tata Diosmanta mañakorqa Ajitofelpa umachasqanta pantachinanpaj.

³² Maypichus Diosta yupaychaj kanku, chay orqo puntaman David chayajtinñaqa, arquitakunaj ayllunmanta Jusayqa chaypi paywan tinkumoj rerqa, p'achan llik'isqa, umantaj jallp'awan qhalliykusqa.

³³ Davidtajrí Jusayta nerqa: Sichus qan noqawan jamuwaj chayqa, mana yanapawankimanchu.

³⁴ Sitajchus Jerusalenman kutispa, Absalonman kay jinata niwaj: Kuraj kamachejníy, noqaqa qanta yanapasqayki, imaynatachus tataykita yanaparqani, ajinata, nispa. Ajinamanta yanapawankiman Ajitofelpa umachasqanta pantachispa.

³⁵ Chaypi qanwan kashanqanku sacerdote Sadoc, Abiatarwan ima. Chayrayku, paykunaman willarinki imatachus kamachina wasipi uyarisqaykita.

³⁶ Jinallataj Sadocpa churin Ajimaz, Abiatarpa churin Jonatanpis chayllapitaj kashanqanku. Ajinaqa tukuy uyarisqaykichejtaqa paykunanejta willachimuwankichej, nispa.

³⁷ Ajinapeqa Davidpa kawsaqen Jusayqa Jerusalenman chayarqa, Absalón chay llajtaman yaykushajtin.