2 Samuel 14 - DIOSPA QHELQACHISQAN DEUTEROCANONICAL

Joab Absalonta kutichimun

¹ Seruyáj churin Joabqa yacharqa kuraj kamachej Davidqa manchaytapuni Absalonta watukusqanta.

² Chayrayku, payqa Tecoa llajtamanta uj sumaj yuyaysapa warmita pusachimorqa. Nerqataj: Llakiyniyoj warmiman tukuy, luto p'achatataj churakuy. Amataj sumaj q'apashaj jawinawan jawikunkichu, piniyki wañusqanmanta may unayñapis llakisqa kashawaj jina.

³ Chaymantataj kuraj kamachejpaman rispa, kay imatachus nisqayki, chay kikinta nimunki, nispa. Joabtaj yachacherqa imatachus chay warmeqa kuraj kamachejman ninanta.

⁴ Chantá Tecoamanta warmeqa kuraj kamachejpaman rispa, ñawpaqenpi pampakama k'umuykuspa, nerqa: Yanapariway ari, kuraj kamachejníy, nispa.

⁵ Chantá David taporqa: Imataj qhatirisunkiri? nispa. Warmitaj kuticherqa: Noqaqa qosay wañupusqanrayku warmisapa kani.

⁶ Noqajtaqa iskay churiykuna karqanku. Paykunaqa campopi maqanakusqanku, mana pipis t'aqaj kajtintaj, ujnin kaj chay ujninta maqaspa, wañurparichisqa.

⁷ Kunantaj tukuy aylluykuna contraypi oqhariykukuspa, munanku pichus wawqenta wañuchejta jaywanayta, wañuchisqanmanta wañuchinankupaj, pay sapallan chayaqeta jap'inan kasqanrayku. Mana wawayoj qhepakunayqa mana imallachu paykunapajqa. Qosay mana piniyoj qhepakojtin, kay pachapi manaña sutinta pipis apaj kanqachu, nispa.

⁸ Chantá kuraj kamachejqa chay warmiman kuticherqa: Wasiykiman ripullay. Noqa qanpa llakiyniykimanta yachasaj, nispa.

⁹ Chay warmitajrí kuticherqa: Kuraj kamachejníy, sichus pipis juchachasqa kanqa chayqa, noqa aylluywan ima juchachasqa kasqayku. Manataj qan kuraj kamachejniychu nitaj kamachiyniykipis juchayojchu kanqa, nispa.

¹⁰ Kuraj kamachejtaj kuticherqa: Pichus contraykipi imata ruwayta munajta kayman pusamuwanki, manañataj ujtawan imanasonqachu, nispa.

¹¹ Chay warmirí nillarqataj: Kuraj kamachejníy, Tata Diosmanta mañay, ama aylluy astawan llakiyta yapanawanta vengakuspa, ujnin kaj wawaytawan wañuchispa. Kuraj kamachejtaj nerqa: Tata Diospa sutinrayku tiluni: Wawaykitaqa mana pipis imananqankuchu, nispa.

¹² Chay warmitaj nillarqapuni: Kuraj kamachejníy, ama jina kaspa, ujsitutawan nirikusqayta uyariway, nispa. Kuraj kamachejtaj nerqa: Parlallay, nispa.

¹³ Chantá warmeqa nerqa: Kuraj kamachejníy, Diospa ayllunpa contranpi imaraykutaj qan kay jinallatataj ruwayta munashankiri? Chay nisqaykirayku qanllataj juchayoj rikhurinki, pichus wijch'usqa wawaykita mana kutimpunanta saqespa.

¹⁴ Tukuypis wañunanchejpuni kashan. Imaynatachus yaku pampaman jich'akojtin, mana ujtawan oqhariyta atikunñachu ajina noqanchej kanchej. Chaywanpis Tata Diosqa mana pitapis wañuchinchu, aswanpis payqa wijch'usqa kajkuna karu llajtamanta kutimunanpaj wakichin.

¹⁵ Wiraqochíy, ajinamanta noqa jamorqani kayta qanman nisoj runakuna manchachiwasqankurayku. Chayrayku noqa kamachiyki qanman jamorqani kayta willasunaypaj: Ichapis kuraj kamachejqa mañakusqayta uyariwanman, nispa.

¹⁶ Kuraj kamachejníy, uyariwanki chayqa, Diospa jallp'anmanta wawaytawan, noqatawan chinkachiyta munajmanta waqaychawasqayku.

¹⁷ Kuraj kamachejníy, noqa suyashani imatachus ninawaykita, sonqoy tiyaykunanpaj. Qanqa Diospa angelnin jina, yachanki imachus allin, mana allin kasqantapis. Tata Diostaj qanwanpuni kakuchun, nispa.

¹⁸ Chantá kuraj kamachej David kuticherqa: Imatachus tapusqayta ama llullakuspa cheqanta willaway, nispa. Warmitaj kuticherqa: Kuraj kamachejníy, parlarillay, nispa.

¹⁹ Jinataj kuraj kamachejqa taporqa: Manachu kay tukuy imataqa Joab umachaykusunki? nispa. Warmitaj kuticherqa: Qan kuraj kamachejniyrayku tiluni chay nisqaykeqa cheqanpuni kasqanta. Qanpa yanapajniyki Joabpuni kachamuwarqa, payllataj yachachiwarqa kay tukuy imata qanman nisunayta.

²⁰ Chay tukuyta kamachiyki Joab ruwarqa mana allin kajta allinyachiyta munaspa. Chaywanpis, qan, kuraj kamachejníy, sumaj yachayniyoj kanki. Diospa angelnin jina tukuy imachus llajtanchejpi kashasqanta yachanki, nispa.

²¹ Chaypacha kuraj kamachejqa Joabta wajyachispa nerqa: Ñapis imatachus ruwanayta niniña. Rispa, wayna Absalonta kutichimuy, nispa.

²² Chantá Joabqa pampakama k'umuykuspa, kuraj kamachejta samincharqa: Kuraj kamachejníy, kunan yachani qan khuyawasqaykita, imaraykuchus nisusqayta ruwashanki, nispa.

²³ Jinamanta Joabqa Gesur llajtaman rerqa Absalonta Jerusalenman pusamunanpaj.

²⁴ Kuraj kamachejtajrí kamacherqa Absalonqa wasinman cheqanta ripunanta. Chayrayku Absalonqa wasinman riporqa, manataj kuraj kamachejpa wasinman yaykorqachu.

²⁵ Absalonqa chaki puntanmanta uma puntankama ima munay junt'asqa karqa. Tukuynin Israel ayllu ukhupi pay jina alajitoqa mana karqachu. Paytaj sumaj uyarisqa runa karqa.

²⁶ Chujchanta sapa wata tukukuyllapi k'utukoj ancha jatun kasqanrayku. K'utusqa chujchantaj iskay kilo kuraj pesaj.

²⁷ Absalonpataqa kinsa churinkuna tiyarqa, ususintaj ujlla karqa, Tamar sutiyoj. Pay may alajitapuni karqa.

²⁸ Iskay watata Absalonqa Jerusalenpi tiyakorqa, manataj kuraj kamachejta watukoj riyta atejchu.

²⁹ Chantá Absalonqa Joabta wajyacherqa paypa sutinpi kuraj kamachejta watumunanpaj. Joabtajrí mana riyta munarqachu. Uj kutitawanpis Absalonqa nillarqataj Joabqa kuraj kamachejman rinanta. Chay kutipipis Joabqa manallataj rerqachu.

³⁰ Chantá Absalonqa kamachinkunata nerqa: Qhawaychej, Joabpa jallp'anqa noqaj jallp'aywan tinkuypi kashan, cebada chajrayoj. Rispa, cebadanman ninata jap'iykuchimuychej, nispa. Absalonpa kamachinkunataj rispa, Joabpa cebada chajranman ninata jap'iykuchimorqanku.

³¹ Chaymanta Joabqa Absalonpa wasinman rispa, payta taporqa: Imaraykutaj kamachiykikuna chajrayman ninata jap'iykuchinkuri? nispa.

³² Absalontaj kuticherqa: Wajyachimorqayki kayman jamunaykita kuraj kamachejman kachasunaypaj, niripunawaykipaj: Imapajtaj Gesur llajtamanta kutichimuwarqanki? Noqamantaqa aswan walej kanman karqa chayllapi qhepakunay, nispa. Kuraj kamachejwan tinkuytapuni munani. Sichus imapi juchayoj kayman chayqa, wañuchiwachun, nispa.

³³ Chantá Joabqa kuraj kamachej Davidman rispa, Absalonpa nisqanta willamorqa, kuraj kamachejtaj Absalonta wajyacherqa. Absalonqa kuraj kamachejpa ñawpaqenman yaykuspa, pampakama k'umuykukorqa. Kuraj kamachejtaj Absalonta much'aykorqa.