2 Samuel 13 - DIOSPA QHELQACHISQAN DEUTEROCANONICAL

Amnonqa Tamarta alqochakun

¹ Davidpa churin Absalonpata ujnin panan karqa may k'achitapuni, Tamar sutiyoj. Davidpa ujnin churin Amnonrí Tamarta sinch'itapuni munapayarqa.

² Panan Tamartajrí mana qharita rejsej sipas karqa. Chayrayku Amnonqa paywan mana imatapis ruwayta atispa, llakiywan onqoykorqa.

³ Amnonpatarí uj kawsaqen Jonadab sutiyoj tiyaporqa. Davidpa wawqen Simeaj churin karqa, paytaj ch'awkiyanapaj wapu karqa.

⁴ Chantá uj kuti Jonadab taporqa: Kuraj kamachejpa churin, imaraykutaj jinata astawan tulluyashankiri? Manachu willariwankiman? nispa. Amnontaj kuticherqa: Mayta munakuni wawqey Absalonpa panan Tamarta, nispa.

⁵ Chantá Jonadabqa payta umacharqa: Puñunaykiman yaykuspa, onqosqaman tukuy. Tatayki watukusoj jamojtintaj, ninki kacharimusunanta panayki Tamarta, wayk'upusunanpaj. Rikushajtiyki wayk'upusuchun, mikhuchisuchuntaj, nispa.

⁶ Jinapi Amnonqa puñunanman yaykupuspa, onqosqaman tukorqa. Kuraj kamachej payta watukoj jamojtintaj, Amnonqa nerqa: Ama jinachu kay, panay Tamarta kacharimuway, iskay t'antitata ruwarqospa mikhuchinawanpaj, nispa.

⁷ Chantá Davidqa Tamarta nerqa: Turayki Amnonpa wasinman rispa, mikhuyta wayk'orqampuy, nispa.

⁸ Jinataj Tamarqa Amnonpa wasinman rerqa, Amnontaj puñunanpi kasharqa. Tamarqa jak'uta puñaytawan, turan rikushajtin t'anta ruwasqanta hornopi chayacherqa.

⁹ Chaymantataj chayachisqan t'antata orqhomuspa, payman jaywarqa. Amnontajrí mana mikhuyta munarqachu, kamacherqataj chaypi tukuy kajkuna llojsinankuta.

¹⁰ Tukuy llojsejtinkukamataj, Amnonqa Tamarta nerqa: Apamuway chay mikhuyta kay puñunayman, makiykimanta mikhunaypaj, nispa. Tamartaj chay ruwasqan t'antata turan Amnonpa puñunanman aparqa,

¹¹ Tamar mikhuchinanpaj, qayllaykojtintajrí Amnonqa payta jap'iykuspa, nerqa: Jamuy panáy, puñusunchej, nispa.

¹² Tamartaj kuticherqa: Ama turáy, ama honrayta t'akachiwaychu. Chaytaqa Israel ayllu ukhupi mana ruwanachu. Ama chay jina millaytaqa noqawan ruwaychu.

¹³ Chay p'enqayniywan maymantaj riymanri? Qanrí, Israel ayllu ukhupi khuchi runapaj qhawasqa kawaj. Ama jina kaspa, kuraj kamachejwan parlay. Payqa casarananchejta mana jark'akonqachu, nispa.

¹⁴ Amnontajrí Tamarpa nisqanta mana uyarerqachu. Kallpanman atinikuspa, paymanta alqochakorqa.

¹⁵ Chaymantataj Amnonqa sinch'ita chejniyta qallarerqa, Tamartaqa munakusqanmanta astawanraj chejnikorqa. Chayrayku kamacherqa: Kunanqa llojsiy kaymanta, nispa.

¹⁶ Tamarqa kuticherqa: Mana, turáy, ama jinataqa wijch'uwaychu. Sichus imatachus ruwawasqayki millay chayqa, kaymanta wijch'uwasqaykeqa aswan millayraj kanman, nispa. Amnontajrí mana uyariyta munarqachu,

¹⁷ kamachinta wajyaspataj, nerqa: Jawaman kay warmita wijch'uspa, sumajta punkuta wisq'aykuy, nispa.

¹⁸ Chantá chay kamacheqa Tamarta jawaman wijch'orqa, chaymantataj sumajta punkuta wisq'aykorqa. Tamarqa sumaj qhoysu p'achawan p'achallisqa kasharqa, kuraj kamachejpa ususin qharita mana rejsej imaynatachus p'achallikunku, ajina.

¹⁹ Chaypacha Tamarqa umanman ushphata qhalliykukorqa, p'achantataj llik'irakorqa. Makinta umanman churaykukuspataj, sinch'ita qhaparispa wasinman kutiporqa.

²⁰ Chantá turan Absalonqa payta taporqa: Turayki Amnonchu chayta ruwasorqa? Kunanqa ch'inlla kay panáy, payqa turayki kasqanrayku. Ama chaymantaqa chhikata llakikuychu, nispa. Tamartaj turan Absalonpa wasinpi may llakisqa qhepakorqa.

²¹ Kuraj kamachej Davidtaj chay tukuymanta yachaspa, mayta phiñakorqa. Chaywanpis mana Amnonta k'amerqachu kuraj kaj churin kasqanrayku, munakusqanraykutaj.

²² Absalonpis manallataj imatapis Amnontaqa nerqachu. Chaywanpis payta sinch'ita chejnikorqa, panan Tamarpa honranta t'akasqanmanta.

Absalón Amnonta wañuchin

²³ Iskay wata qhepaman Absalonqa Efraín llajta qayllapi, Baal Jasor orqopi, ovejankunata ruthuchisharqa. Chaymantaj kuraj kamachejpa tukuy churinkunata mikhunankupaj wajyarerqa.

²⁴ Chay jawa Absalonqa kuraj kamachejta watukoj rispa, nerqa: Kunan kamachiykunaqa ovejaykunata ruthushanku, munaymantaj qan, chantá yanapaj runaykikuna ima waturikunawaykichejta, nispa.

²⁵ Kuraj kamachej Davidtajrí kuticherqa: Mana, wawáy, mana tukuyniyku riyta atiykumanchu, ama chhika gasto kanaykupaj, nispa. Chaywanpis Absalonqa rinankuta nillarqapuni, kuraj kamachejtaj mana riyta munarqachu. Jinapi: Walejlla risuchun, nispa, Absalonta samincharqa.

²⁶ Chantá Absalonqa nerqa: Mana riyta atejtiykeqa, wawqey Amnonllapis jamurinawanta niy ari, nispa. Kuraj kamachejtaj nerqa: Imaraykutaj Amnón rinanta munankiri? nispa.

²⁷ Absalón kutin kutinta nisqanrayku, kuraj kamachejqa saqerqa Amnón, chay wakin churinkunapiwan rinankuta. Absalontaj sumaj mikhunata kuraj kamachejpaj jina wayk'ucherqa.

²⁸ Absalonqa kamachinkunata yachaykuchisqa: Sumajtamin Amnonta qhawankichej. Machaykojtinkama, noqa nisqaykichej wañuchinaykichejta, qankunataj payta wañuchinkichej. Ama manchachikuychejchu nisqayman jina ruwaytaqa. Kallpachakuychej, wapuchakuychejtaj, nispa.

²⁹ Chayrayku Absalonta kasuspa, kamachinkunaqa Amnonta wañucherqanku. Chantá kuraj kamachejpa chay waj churinkunaqa chayta rikuspa, mulankuman lloq'aykuytawan, ayqerqanku.

³⁰ Chay ayqejkuna ñanllapiraj kashajtinku, Davidman willarqanku tukuynin churinkunata Absalón wañuchisqanta.

³¹ Chaypacha kuraj kamachejqa tiyananmanta sayarispa, p'achanta llik'irakorqa, pampamantaj choqakorqa. Chantá payta yanapajkunapis p'achankuta llik'irakullarqankutaj.

³² Chantá Davidpa wawqen Simeaj churin Jonadabqa Davidta nerqa: Kuraj kamachejníy, ama yuyaychu tukuy churiykikunata wañuchisqankuta, manachayqa Amnonllata wañuchinku. Ajinatapuni Absalonqa ruwananta umachakorqa, Amnonqa panan Tamarpa honranta t'akachisqanrayku.

³³ Chayrayku, kuraj kamachejníy, mana tukuy churiykikunachu wañun. Amnonllata wañuchinku, nispa.

³⁴ Absalón ayqeshanankamataj, qhawaj soldadoqa Joronayin ñanninta ashkha runakuna jamushasqankuta rikorqa. Chantá qhawaj soldadoqa kuraj kamachejman willamorqa Joronayin ñanninta, ashkha runakuna jamushasqanta.

³⁵ Jonadabtaj kuraj kamachejta nerqa: Jamushankuña churiykikuna, kuraj kamachejníy, noqa nisqayman jina, nispa.

³⁶ Chayta nejtinkama, kuraj kamachejpa churinkuna chayamorqanku, sinch'ita qhaparispataj, waqarqanku. Ajinallatataj kuraj kamachejpis, kamachinkuna ima mayta waqarqanku.

^37-38 Absalontajrí ayqespa, Gesurmanta kuraj kamachej Amiudpa churin Talmaypaman riporqa, kinsa wata junt'atataj chaypi qhepakorqa. Davidtajrí sapa p'unchay Amnonmanta waqaj karqa.

³⁹ Jinapis churin Amnón wañusqanmanta sonqon tiyaykurejtinña, Davidqa churin Absalonta maytapuni rikuyta munarqa.