2 Samuel 11 - DIOSPA QHELQACHISQAN DEUTEROCANONICAL

David juchallin

¹ Chay qhepan wata paray mit'a kashajtin, kuraj kamachejkuna maqanakuman llojsej kanku, chaypacha, Davidqa maqanakuman kacharqa Joabta, yanapajninkunata, chantá tukuy soldadontawan. Paykunaqa amonitakunata maqanakupi atipaykorqanku, Rabá llajtatataj jap'inankupaj muyuykorqanku. Davidtajrí Jerusalenllapi qhepakorqa.

² Uj tarde Davidqa puñusqanmanta jatarispa, kamachinan wasi alto patapi puriykachasharqa. Chantá jinallaman uj k'achita warmita mayllakushajta rikuykorqa.

³ Chaypacha Davidqa pichus chay warmi kasqanta tapojta kacharqa, chay tapumojkunataj nerqanku Elianpa ususin, jitita Uriaspa warmin Betsabé kasqanta.

⁴ Chaypacha Davidqa kamacherqa chay warmita pusamunankuta. Chantá paywan puñuykorqa, chaymantataj warmeqa wasinman riporqa. Chay warmitaj chaypachallaraj killa yawarninmanta llimphuchakusqa.

⁵ Chantá chay warmi wijsallisqa rikhurispa, Davidman willacherqa: Qanpajmin onqoj kashani, nispa.

⁶ Chayta uyarispa, Davidqa kamacherqa Joabman, jitita Uriasta kachamunanta paywan parlarinanpaj. Joabtaj Uriasta payman kachamorqa.

⁷ Urías chayamojtintaj, David taporqa Joab jinataj soldadokunapis imaynachus kashasqankuta, jinataj maqanaku imaynachus rishasqanta.

⁸ Chaymantataj Uriasta kamacherqa: Wasiykiman rispa, samarikamuy, nispa. Davidpa kamachinan wasimanta Urías llojsejtinkamataj, kuraj kamachejqa uj sumaj mikhuyta t'inkata jina payman apacherqa.

⁹ Uriastajrí wasinman ripunantaqa, kamachina wasi punkupi chay ch'isi qhawaj soldadokunawan khuska puñorqa.

¹⁰ Q'ayantin Davidman willajtinku Urías wasinman mana ripusqanta, Davidqa payta taporqa: Imaraykutaj wasiykiman mana puñoj riporqankichuri? nispa.

¹¹ Chantá Uriasqa Davidman kuticherqa: Tata Diospa arcan, Israelmanta jinataj Judamanta soldadokunapis sach'a thansamanta ruwasqa ch'ujllakunallapi kashanku. Jinallataj Joabpis, kamachiykikunapis q'ara pampallapi puñushanku. Noqataj riymanchu kasqa wasiyman mikhoj, ujyaj, warmiywan puñukamojtaj? Qanrayku tiluni: Mana chaytaqa ruwasajchu, nispa.

¹² Chantá Davidqa Uriasta kamacherqa: Kunantawan qhepakuyraj, q'ayalla kachapusqayki, nispa. Ajinamanta Uriasqa Jerusalenpi q'ayantinkama qhepakorqa.

¹³ Davidtaj mikhuyta jinataj ujyanata machaykuchinankama qorqa. Ch'isiyaykuytañataj, Uriasqa llojsiporqa. Chaywanpis kamachina wasita qhawaj soldadokunawan puñukaporqa, manapunitaj wasinman rerqachu.

¹⁴ Davidqa q'ayantin paqarin Joabman uj cartata qhelqaspa, Uriaswan apacherqa.

¹⁵ Chay cartapitaj nerqa: Uriasta ñawpaj puntapi sinch'i maqanaku kashan, chayman churaychej, chantá sapanta saqerpariychej chaypi wañuchinankupaj, nispa.

¹⁶ Jinataj israelita soldadokuna maqanakunankupaj chay llajtata muyuykojtinkoqa, Joabqa awqanmanta aswan wapu soldadokuna maypichá kasharqanku, chayman Uriasta churarqa.

¹⁷ Llajtata jark'ajkunamanta soldadokuna llojsimuytawan, Joabpa contranpi maqanakorqanku. Chaypitaj wañorqanku wakin Davidpa soldadokuna, chaykunawan khuskataj jitita Uriaspis wañullarqataj.

¹⁸ Chantá Joabqa Davidman tukuy imaynachus maqanakupi rishasqanta willacherqa.

¹⁹ Chay kachanmantaj kay jinata yachaykucherqa: Maypachachus kuraj kamachejman maqanakumanta willaykojtiykikama,

²⁰ ichapis kuraj kamachejqa phiñakuspa, tapusunkiman: Imaraykutaj anchata llajtaman qayllaykorqankichejri? Manachu yachankichej paykunaqa perqa patamanta tukuy imata choqamusqankuta?

²¹ Pitaj Yerubaalpa churin Abimelecta wañucherqa? Manachu uj warmilla perqa patamanta uj kutana rumita choqamuspa, Tebespi payta wañurparicherqa? Imaraykutaj ari perqaman anchatapuni qayllaykorqankichejri? nispa. Chayta tapusunki chayqa, qan kay jinata kutichinki: Jitita Urías kamachiykipis wañullantaj, nispa.

²² Chay kachaqa Davidman chayaspa, willarqa tukuy imatachus Joab willananta kamacherqa, chayta.

²³ Chay kachataj Davidta nerqa: Chay llajtamanta llojsimoj soldadokuna noqaykuwan anchata maqanakorqanku. Chaywanpis noqaykoqa llajta punkukama ithiricherqayku.

²⁴ Chaypachataj perqa patamanta soldadokuna arcowan flechamuspa, wakinta wañucherqanku. Urías jititatapis wañuchillarqankutaj.

²⁵ Davidtaj chay kachaman kuticherqa: Niy Joabman ama chhikata llakikunanta. Maqanakupeqa mana yachanchejchu mayqen wañunanta. Chayrayku llajtaj contranpi astawan sinch'ita maqanakuchun jap'inankama. Qantaj kallpachaykuy, nispa.

²⁶ Chantá Uriaspa warmenqa qosan wañupusqanta yachaytawan, lutokorqa.

²⁷ Chay lutokusqan pasajtinñarí, David kamacherqa warmita kamachinan wasiman pusamunankuta, paywantaj casarakorqa. Chantá chay warmeqa uj qhari wawata paqarichikorqa. Tata Diospajrí Davidpa chay jina ruwasqanqa mana allinchu karqa.