2 Samuel 1 - DIOSPA QHELQACHISQAN DEUTEROCANONICAL

Davidqa Saúl wañusqanmanta yachan

¹ Saúl wañusqanmanta qhepaman Davidqa amalecitakunata maqanakupi atipaytawan, Siclag llajtaman kuterqa, chaypitaj iskay p'unchayta qheparikorqa.

² Chay minchhantin, Saulpa soldadonkunamanta ujnin chayamorqa, llik'isqa p'achayoj, umantaj jallp'awan qhalliykusqa. David kasharqa, chayman chayamuspataj, k'umuykorqa pampaman umanta chayachinankama.

³ Chantá David tapurerqa: Maymantataj jamushankiri? nispa. Chay runataj kuticherqa: Israelitaj maqanakunan jaramanta ayqemushani, nispa.

⁴ David tapullarqataj: Willariway ari. Imataj tiyanri? nispa. Chay runataj kuticherqa: Israelita soldadokuna maqanakumanta ayqekorqanku, ashkhataj wañuchisqa karqanku. Saulta, jinataj churin Jonatantapis filisteokuna wañuchillarqankutaj, nispa.

⁵ Chantá David chay soldadota tapurerqa: Imaynapitaj yachanki Saulwan, churin Jonatanwan wañusqankutari? nispa.

⁶ Chay runataj kuticherqa: Mana rinallamanta, Gilboa orqoman rerqani, chaypitaj rikorqani Saulta lanzanpi atiykusqata. Chaypachapunitaj filisteokunaqa carretapi maqanakojkuna, jinataj caballopi maqanakojkunapis payta taripaykushasqankutaña.

⁷ Chantá wasaman qhawarikamuspa, wajyamuwarqa, noqataj chimpaspa, taporqani: Imata ninki? nispa.

⁸ Pay tapuwarqa pichus kasqayta, noqataj nerqani: Amalecita kani, nispa.

⁹ Chaymanta niwarqa: Ujkama tukucharpariway, imaraykuchus ñak'arishaspa mana wañuyta atinichu, nispa.

¹⁰ Ajinaqa payman qayllaykuspa, tukucharparerqani, manaña kawsananpaj jinachu kasqanrayku. Chaymantataj pillunta orqhorqani umanmanta, makinmantataj brazaletenta, qanmantaj apamorqayki, wiraqochíy, nispa.

¹¹ Chayta uyarispa, Davidwan, soldadonkunawan ima p'achankuta llik'irakorqanku, llakikusqankuta rikuchispa.

¹² Maytataj waqarqanku Saulwan, churin Jonatanwan wañupusqankumanta, ajinallatataj Tata Diospa soldadonkuna maqanakupi wañusqankumanta. Chantá inti yaykuykama ayunarqanku.

¹³ Chaymanta Davidqa willaj soldadota taporqa: Qanrí maymantataj kanki? nispa. Paytaj kuticherqa: Mana kay llajtayojchu kani, amalecita kani, nispa.

¹⁴ Chantá David chay runata nerqa: Imaraykutaj mana manchachikorqankichu Tata Diospa ajllasqanpa contranpi makiykita oqhariytari? nispa.

¹⁵ Ujnin kamachinta wajyaspataj, Davidqa nerqa: Riy, wañuchimuy chay soldadota, nispa. Paytaj t'ojsispa, amalecitata wañurpacherqa.

¹⁶ Davidtaj nerqa: Qan kikiyki juchachakunki wañunaykipaj, simiykiwantaj ch'ataykukunki Tata Diospa ajllasqan kuraj kamachejta wañuchisqaykita rimarispa, nispa.

Saulwan Jonatanwan wañusqankumanta aya takiy

¹⁷ Davidqa takerqa kay aya takiyta Saulwan, churin Jonatanwan wañusqankumanta.

¹⁸ Pay kamachillarqataj tukuy Judá jatun ayllu ukhupi kay aya takiyta yachachinankuta. Kay aya takeyqa Jaserpa qhelqanpi qhelqasqa kashan:

¹⁹ Israel ayllúy, may uyarisqa kasqaykeqa chay orqo cheqanejpi chinkachisqa karqa. Chay jinata chay wapu runakuna wañunku.

²⁰ Chaytaqa ama willaychejchu Gat llajtapi, nillataj willaraychejchu Ascalón llajtapipis, ama chay filistea warmikuna kusikunankupaj, nitaj lantikunata qhatejkunaj ususinku kusiywan tusunankupaj.

²¹ Gilboa orqokunaqa amaña qankuna patamanqa parachunchu, nitaj chhullachunchu. Amañataj qankunapi imapis poqochunchu. Chaypi wapu soldadokunaj escudonku sarusqa karqa. Manaña Saulpa escudonpis lliphipinñachu.

²² Jonatanqa arconwan flechaspa wañuchejpuni, Saulpis espadanwan wañuchillajtaj. Wapu soldadokunata wañuchejpuni kanku.

²³ Saulwan, Jonatanwanqa ancha munasqa karqanku. Mana t'aqanakorqankuchu kawsashaspa, nitaj wañushaspapis. Ankamanta aswan usqhayta phawaj kanku. Leonkunamantapis aswan kallpayoj karqanku.

²⁴ Israel suyumanta warmikuna, Saulmanta waqaychej. Payqa kulli puka p'achawan p'achallichej kasunkichej. Ima k'achata p'achaykichejta qoriwan k'achanchasorqachej.

²⁵ Chay jinata may wakichisqa runakuna maqanakupi wañorqanku. Jonatanqa pata orqoykikunapi wañuchisqa karqa.

²⁶ Jonatán wawqéy, sinch'i llakisqa kashani. Noqaqa kikin wawqeymantapis astawan munakorqayki. Qanpa munakuyniykipis warmikunaj munakuyninkumantapis aswan karqa.

²⁷ Imaynata wapu soldadokuna wañorqanku, maqanakupaj armankupis phirisqa karqa, nispa. Ajinata Davidqa aya takiyta wakicherqa Saulrayku, Jonatanrayku ima.