2 Macabeos 15 - DIOSPA QHELQACHISQAN DEUTEROCANONICAL

Nicanor wañun

¹ Nicanorman willarqanku Judas runankunawan khuska Samaria cheqapi kashasqanta. Chantá Nicanor chayman kachaykukorqa. Paykunata atipananpaj jina samarina p'unchaypi paykunata jap'ej rerqa.

² Paywan khuska karqanku, chay judiokunarí, pikunatachus mana munashajta paywan apasharqa, chaykuna Nicanorta nerqanku: Ama chay jinata mana khuyakuyniyoj jina paykunata samarina p'unchaypi wañuchiychu, imajtinchus tukuy imata rikoj Diosqa samarina p'unchayta paypaj ajllakorqa. Chayrayku chay p'unchayta jatun respetowan qhawana, nispa.

³ Chaywanpis chay mana sonqoyoj runa kuticherqa: Janaj pachapi Tukuyta Kamachej uj Dios kanmanchu, pichus kamacherqa samarina p'unchayta waqaychana kasqanta? nispa.

⁴ Judiokunataj kuticherqanku: Tukuyta Kamachej Kawsaj Dios tiyan, pichus janaj pachapi kamachej, chantá may atiyniyojmin. Paymin kamachiwarqayku qanchis kaj p'unchaypi samarinaykuta, nispa.

⁵ Nicanortajrí nerqa: Noqamin kay pachapi atiyniyoj kani, chayraykutaj kamachiykichej kuraj kamachejta kasuspa maqanakunaykichejta, nispa. Jinapis, Nicanorqa chay millay yuyasqanta mana junt'ayta aterqachu.

⁶ Nicanor may kasqanta yuyakuspa, wapuykachaspa ima, uj apachetata oqharichiyta munarqa, chaypi churachinanpaj Judaspa soldadonkunamanta qhechusqan armankuta.

⁷ Macabeotajrí Tukuyta Kamachej Diospi tukuy sonqo atinikorqa, paykunata yanapananta suyakuspa.

⁸ Chayrayku soldadonkunata kallpacharqa, Diosta mana manchachikojkunamanta ama manchachikunankuta. Manachayqa Dios imaynatachus ñawpajta paykunata yanapasqanmanta yuyarikuspa, kunanpis suyananku karqa Tukuy Atiyniyoj Tukuyta Kamachej Dios paykunata yanapananta.

⁹ Ajinata Judas Macabeo soldadonkunata sonqocharqa Moisespa kamachisqanmanta qhelqamanta, Diosmanta sut'inchajkunaj nisqankumanta ima parlaspa. Paykunata yuyarichillarqataj imaynatachus unay maqanakupi atipasqankumanta ima. Ajinamanta Judaspa soldadonkuna may kallpachasqa, sonqochasqataj karqanku.

¹⁰ Chay jinata runankunata sonqochasqanmantataj, Judas imatachus ruwanankuta allinta yachacherqa. Chantá paykunata yuyarichillarqataj Diosta mana manchachikojkuna puraj uya kasqankumanta, jinallataj imaynatachus paykuna trato ruwasqankuta p'akisqankumanta ima.

¹¹ Ajinamanta, Judas Macabeo paykunata kallpachaykorqa. Chay nisqanqa aswan karqa espadamanta, escudomantawan nisqaqa. Chaymantataj, paykunaman willarqa imatachus mosqoyninpi rikusqanta. Chaypis paykunata anchatapuni kusichillarqataj.

¹² Judas Macabeo mosqoyninpi kayta rikorqa: Onías ñawpa kuraj kaj sacerdote karqa. Payqa k'acha sonqoyoj runa karqa, cheqan runa, llamp'u sonqoyoj ima, munakunapajpuni karqa. Wawa kasqanmantapacha llimphu kawsayniyoj karqa. Judasqa chay runata rikusqa makin oqharisqata, paytaj Diosmanta tukuy judiokunapaj mañakushasqa.

¹³ Chaypachallapi waj runañataj rikhurimusqa, yuraj chujchayoj, respetanapaj jinataj. Paypa rijch'aynenqa uj kuraj kamachej jina karqa, atiynintaj kamachinanpaj jina karqa.

¹⁴ Jinapi Onías nisqa: Kaymin Diosmanta sut'inchaj Jeremías. Payqa llajta masinkunata manchayta munakuspa, tuta p'unchay judiokunapaj Diosmanta mañakun, chantá ajllasqan llajtapaj ima, nispa.

¹⁵ Jeremiastaj paña makinta oqharispa, Judasman uj qori espadata jaywasqa, chantataj nisqa:

¹⁶ Diospa qosqan kay espadata jap'iy, mayqentachus Dios t'inkata jina jaywashasunki, chayta. Kay espadawanqa awqaykikunata wañuchispa, kantumanta chinkachinki, nispa. Ajinata Judas mosqokusqanta willarqa.

¹⁷ Judaspa k'acha parlasqan astawan waynakunata kallpacharqa. Chayrayku judiokuna wapuchakuspa, nerqanku manaña jarankupi qhepakunankuta, manachayqa awqankukunawan maqanakoj llojsinankuta. Jinapi paykuna chay tukuy ima ujkama tukukunanta munarqanku, imaraykuchus Jerusalén llajtaman, jinataj Diosta yupaychanaman, chantá Temploman ima jatun llakiy jamushasqanta repararqanku.

¹⁸ Jinapis warminkumanta, wawqenkukunamanta, tukuy ayllunkukunamanta ima llakikorqanku chaypis, astawanpuni Templomanta llakikusharqanku, imaraykuchus Temploqa chaypachallaraj llimphuchasqa kasqa.

¹⁹ Llajtapi qhepakojkunapis may llakisqallataj kasharqanku, paykunataj phutikorqanku awqankukunawan maqanakupi imachus kananta yuyaspa.

²⁰ Tukuyninku manchachikuywan suyasharqanku imapichus tukuy ima tukukunanta. Awqakunaqa wakichisqaña karqanku maqanakoj yaykunankupaj. Elefantekunapis kanankupi churasqaña karqanku. Puraj ladopitaj caballopi rej soldadokuna kallarqankutaj.

²¹ Jinapi Judas Macabeo may chhika soldadokunata qayllamushajta rikorqa. Rikullarqataj tukuy imaymana armakunayoj kasqankuta, phiña elefantekunatapis. Pay allinta yacharqa mana pipis armakunallawan atipayta atisqanta, manachayqa Tukuyta Kamachej Dios munayninman jina pitapis atipachisqanta. Chayrayku, Macabeo makinta janajman oqharispa, t'ukunata ruwaj Tukuyta Kamachej Dios yanapananta mañakorqa

²² Pay nerqa: Qan, Tukuyta Kamachej Dios, maypachachus Ezequías Judapi kuraj kamachej karqa chaypacha, angelniykita kachamorqanki. Jinataj payqa Senaqueribpa soldadonkunamanta yaqha 185.000 runakunata wañucherqa.

²³ Kunanpis, qan, janaj pachapi Tukuyta Kamachej Dios, ñawpaqeykuta k'acha angelniykita kachamuy, awqaykukunata manchachinanpaj, kharkatitichinanpaj ima.

²⁴ Jatun atiyniykiwan k'iriykuy qanta mana manchachikoj runakunata, pikunachus qanpaj millayta rimanku, ajllakusqayki aylluykitapis maqanku, chaykunata, nispa.

²⁵ Chaykama Nicanorpa soldadonkunaqa trompetakunata waqarichispa, takispa ima maqanakoj jamusharqanku.

²⁶ Judaspa soldadonkunataj Diosmanta mañakuspa, maqanakuman rishallarqankutaj.

²⁷ Chantá makinkuwan maqanakuspa, sonqonkupitaj Diosmanta mañarikuspa, paykuna 35.000 jina soldadokunata wañucherqanku. Chay jinata Dios paykunata yanapasqanmantataj may kusisqa qhepakorqanku.

²⁸ Maqanakuyta tukusqankumanta kusisqa ripushaspa, paykuna Nicanorta pampapi wañusqata rikorqanku, tukuy maqanakuna armanwan khuskata.

²⁹ Chantá, parlayninkupi sinch'ita qhaparispa, Tukuyta Kamachej Diosta yupaycharqanku.

³⁰ Macabeoqa wayna kasqanmantapacha ayllunta munakusqa, tukuy sonqowantaj ayllunpa allin kayninta mask'asqa. Paytaj Nicanorpa umanta qholurparinankuta kamacherqa, jinallataj paña makintapis khuchunankuta. Chantaqa chaykunata Jerusalenman apanankuta nerqa.

³¹ Chaymantataj Judas Jerusalenman rerqa. Chaypitaj llajta masinkunata, sacerdotekunatapis tantacherqa. Jinaspataj, altarpa ñawpaqenpi sayaspa, pikunachus pukarapi kasharqanku, chaykunatapis wajyachillarqataj.

³² Tukuyninku chaypiña kashajtinkutaj, paykunaman rikucherqa millayta ruwaj Nicanorpa qholusqa umanta, makinta ima. Nicanorqa manchayta wapuykachaspa, chay makinta oqharisqa Templo cheqaman, may kasqanta yuyakuspataj, Tukuy Atiyniyoj Diospa contranta rimasqa.

³³ Chaymantataj Judasqa millayta ruwaj Nicanorpa qalluntapis chhikan chhikanta khuchuspa, suwintukunaman qaranankuta kamacherqa. Jinallataj Nicanorpa makinta Temploj ñawpaqenpi churanankuta nerqa ajinamanta Nicanor loco jina millay ruwasqanmanta pagananpaj.

³⁴ Chaymantataj tukuyninku janajman qhawaspa, Tukuyta Kamachej Diosta kay jinata yupaycharqanku: Jatunchasqa kachun Tukuyta Kamachej Diosninchej, imaraykuchus payqa Templonta waqaycharqa ama ch'ichichasqa kananpaj, nispa.

³⁵ Jinallataj Judasqa Nicanorpa umanta pukara perqapi warkhuchillarqataj. Ajinamanta chayta rikuspa, tukuy yuyarikunankupaj Tukuyta Kamachej Dios imaynatachus paykunata yanapasqanmanta.

³⁶ Chaymanta, tukuyninku uj sonqolla nerqanku sapa wata chay p'unchaypi raymita ruwanankuta. Ajinamanta chaymantapacha raymita ruwanankuta nerqanku sapa chunka iskayniyoj kaj killapi, chunka kinsayoj kaj p'unchaypi. Chay killaqa arameo simipi nikun Adar. Chay killa tukukuytataj Purim nisqa raymi qallarin.

Tukukuynin

³⁷ Nicanorpa tiemponpi imachus kasqan ajinata tukukorqa. Chaymantapachataj Jerusalén llajta hebreokunaj makinkupi karqa. Noqapis kaypi kaymanta willasqayta tukuchini.

³⁸ Sumaj qhelqasqa, sumaj ruwasqataj kajtin, noqa sonqo junt'asqa kasaj. Mana allinchu, maychus chaylla kajtinrí yachanaykichejta munani chayllata ruwayta atisqayta.

³⁹ Yachankichej jina vinollata, chayrí yakullata ujyanaqa mana misk'ichu. Aswan misk'i vinoqa yakuwan chajrusqa llaminaqa. Ajinallatataj, uj p'anqapi tukuy imaymanamanta qhelqasqa kajtin, pikunachus ñawirejkuna ñawirispa misk'irichikunku. Kaypi imamantachus qhelqasqayta tukuni.