2 Corintios 2 - DIOSPA QHELQACHISQAN DEUTEROCANONICAL

¹ Chayrayku noqa ujtawan qankunata watukoj manaña jamorqanichu, ama llakichisunaykichejpaj.

² Sichus noqa llakichiykichejman chayqa, pikunataj noqata kusichiwanqankuri? Jaqay pikunatachus noqa llakicherqani, chaykunachu?

³ Chayrayku qankunaman chay jinata qhelqamorqaykichej, mayk'ajpis chayamuspa ama llakikunaypaj, qankunawan kusikunay kashajtin. Yachankichej jina noqa kusikuni, maypachachus qankuna kusisqa kankichej, chaypacha.

⁴ Chay cartata qhelqamushaspaqa, sinch'i llakisqa karqani, phutisqataj, jinallataj mayta waqarqani. Chaywanpis mana qankunata llakichiyta munaspachu chay cartata apachimorqaykichej, manachayqa may jinatachus qankunata munakususqayta yachanaykichejpaj.

Juchallikojpa juchanta pampachana

⁵ Sichus pipis noqata llakichiwarqa chayqa, mana noqallatachu llakichiwarqa, aswanpis tukuy qankunatapis llakichillasorqachejtaj. Ajinata nispaqa, maychus kasqallanta nishani.

⁶ Qankuna juchallikoj runata cheqan ñanman kutirichiyta munaspa k'arajta k'amiykusqaykichejqa chayllaña kachun.

⁷ Aswanpis qankuna juchanta pampachaychej, paytataj sonqochaychej ama sinch'i llakiywan atipachikunanpaj.

⁸ Chayrayku mañarikuykichej, watejmanta payta munakapunaykichejta.

⁹ Jinallataj chay cartata apachimorqaykichej, sonqoykichej imaynachus kasqanta yachanaypaj, tukuy imapi kasukunkichejchus, manachus, chayta yachanaypaj.

¹⁰ Sichus pejpa juchanta pampachankichej chayqa, noqapis pampachallanitaj. Jinapi imatachus pampachanay karqa, chayta Cristoj sutinpi pampachani, qankunaj allinniykichejpaj.

¹¹ Ajinata ruwani Kuraj Supay ama atipanawanchejpaj, imaraykuchus yachanchejña paypa sonqonpi mana allin kajta ruwayta munanallapuni kasqanta.

Pabloqa Troas llajtapi phutikun

¹² Cristomanta sumaj willayta willanaypaj Troas llajtaman rerqani. Chaypitaj Tukuyta Kamachej Jesusrayku sumaj riwarqa.

¹³ Noqaj sonqoytajrí mana samariyta aterqachu, imaraykuchus wawqey Tito manaraj chayamorqachu qankunamanta willanawanpaj. Chayrayku chay wawqe panakunata: Uj p'unchaykama kachun, nispa, noqa Macedoniaman purirerqani.

Cristonejta atipajkuna

¹⁴ Manaraj chaymanta astawan parlashaspa, kayta nini: Diosta pachis nina, imaraykuchus paymin tukuyta atipaj Cristowan khuska yanapawayku noqaykupis atipanaykupaj. Ajinamanta Dios tukuynejpi yachayninta noqaykunejta rejsichin, sumaj q'aparishaj incienso jina.

¹⁵ Noqaykoj kawsayniykoqa inciensoj q'apaynin jina, mayqentachus Cristoqa Tata Diosman jaywan, chay jina. Chay q'apaytaj junt'arin qhespichisqa kajkuna ukhupi, chinkayman rejkuna ukhupipis.

¹⁶ Chinkayman rejkunapajqa chay q'apayqa wañuypa q'apaynin jina. Jesucristopi atinikojkunapajrí chay q'apayqa kawsaypa ima munay q'apaynin jina. Jina kajtenqa, pitaj chay ruwanata junt'ananpaj jina kanmanri?

¹⁷ Mana noqaykoqa wakinkuna jinachu kayku, pikunachus Diospa simi nisqanta q'ewispa parlanku, chaykuna jina. Aswanpis noqayku Diospa kachasqankuna jina, ch'uwa sonqowan Diospa ñawpaqenpi cheqan kajta parlayku, Cristowan ujchasqa kasqaykurayku.