1 Samuel 9 - DIOSPA QHELQACHISQAN DEUTEROCANONICAL

Samuelqa Saulwan tinkun

¹ Benjamín jatun ayllupi uj runa karqa Cis sutiyoj. Pay Abielpa churin karqa, Abielpa tatantaj Seror karqa, Serorpa tatantaj Becorat karqa, Becoratpa tatantaj Afía. Cis sutiyoj runaqa tukuypaj manchay respetasqa karqa.

² Paypata uj churin tiyaporqa, manchay alajitu waynuchu, sutintaj Saúl karqa. Israelitakuna ukhupi manapuni pipis Saúl jina alajitu karqachu. Payqa jatunkaray runa karqa, tukuypis lijrankamalla chayarqanku.

³ Ujpacha Cispa china burronkuna chinkasqanku, paytaj churin Saulta nisqa: Ujnin kamachita pusariykukuspa, burrokunata mask'amoj riy, nispa.

⁴ Saultaj Efraín jatun aylloj jap'iynin orqorara cheqanejman rispa, chayarqa Salisa chaynejkama, manataj burrokunata tarerqachu. Chaymanta Sagalinkama rillarqataj, chantá Benjamín jatun aylloj jap'iyninkama, nillataj chaypipis tarerqachu.

⁵ Suf chaynejman chayaspaña, Saulqa kamachinta nerqa: Jaku ripunachej, ichapis tatayqa burrokunamanta nisqaqa, noqanchejmanta astawan llakikushan, nispa.

⁶ Kamachitajrí kuticherqa: Kay llajtapi Diosmanta sut'inchaj tiyan. Payqa tukuypaj manchay respetasqa, imajtinchus tukuy imatapis nisqanqa junt'akunpuni. Jaku payman rina. Ichapis pay mayman mask'aj rinanchejta niwasunman, nispa.

⁷ Saultaj kuticherqa: Jaku ari. Chantá imatataj chay Diospa runanman apasunmanri? Manaña t'antapis wayaqanchejpi kanchu, nitaj jaywarinapaj imanchejpis kanñachu, nispa.

⁸ Chantá kamachin Saulman kuticherqa: Noqajta uj chhika qolqey tiyapuwan. Chayta Diosmanta sut'inchajman jaywasun, maymanchus mask'aj rinanchejta willanawanchejpaj, nispa.

⁹ Unaypachapi sichus mayqen israelita Diosta tapurikuyta munaj chayqa, kay jinata nej: Jaku rina yachaj runaman, nispa. Unay sut'inchajkunata: “Yachaj runa”, nispa nej kanku. Chaymantaqa: “Diosmanta sut'inchajkuna”, nispa rejserqanku.

¹⁰ Chantá Saulqa kamachinta nerqa: Allinta ninki, jaku rina, nispa. Iskayninkutaj, maypichus Diosmanta sut'inchaj tiyakorqa, chay llajtaman rerqanku.

¹¹ Chay llajtaman rina wichayta rishaspa, yakuman rejkuna sipaskunawan tinkukorqanku, paykunatataj tapukorqanku: Kaypichu chay yachaj runaqa kashan? nispa.

¹² Paykunataj kuticherqanku: Arí, payqa aswan jaqaypiraj kashan. Usqhayllata riychej. Kunallan kay llajtaman chayamun, imaraykuchus paykunaqa kunan p'unchay orqo patapi Tata Diosman uywa ñak'aspa q'olachinata jaywanqanku, nispa.

¹³ Jaqayman chayaytawankama, payta mask'aychej, amaraj orqo pataman mikhoj rishajtin. Runakuna mikhunankupaj paytaraj suyanqanku, imaraykuchus jaywanataqa paypuni saminchanqa. Chaymantaraj wajyasqa kajkuna mikhonqanku. Chayrayku usqhayllata riychej, chaypi payta taripankichej, nispa.

¹⁴ Chantá Saulwan, kamachinwan ima chay llajtaman rej ñanta risharqanku. Llajtaman chayashaspañarí, Samuelta paykuna cheqanejman jamushajta rikorqanku, imaraykuchus Samuelqa orqo patapi Diosta yupaychana cheqaman risharqa.

¹⁵ Saúl manaraj chayman chayashajtin, Tata Diosqa Samuelta mosqoypi jina kay jinata nisqaña:

¹⁶ Q'aya kunanta jina Benjamín jatun ayllumanta uj runata kachamusqayki, paytataj aceitewan jawinki, Israel aylluypa kuraj kamachejnin kananpaj. Payqa Israel aylluyta filisteokunaj makinkumanta kacharichenqa, imaraykuchus noqa aylluymanta khuyakuni, ñak'arisqankuta rikuspa, nispa.

¹⁷ Chantá Samuelqa Saulta rikojtinkama, Tata Diosqa payta nerqa: Kaymin chay runaqa, pimantachus parlarqayki, chay. Paymin aylluyta kamachenqa, nispa.

¹⁸ Ñapis llajtaman yaykuna punkuta yaykuykushajtinña, Saulqa Samuelman qayllaykuspa, tapurikorqa: Ama jinachu kay, willariway ari, maypichus yachajpa wasin kasqanta, nispa.

¹⁹ Samueltaj Saulman kuticherqa: Noqaqa chay runa kani. Jaku wicharina jaqay orqo patapi Diosta yupaychana cheqaman. Noqawan khuska chaypi mikhunki. Q'ayataj tutamanta willasqayki imatachus yachayta munasqaykita, chaymantataj ripullanki.

²⁰ Kinsa p'unchaytaña chinkaj burrokunamanta ama llakikuychu, imaraykuchus tarinkuña. Chaywanpis, pipajtaj kanqa Israelmanta aswan sumaj kajrí? Manachu qanpaj, chantá aylluykipajpis? nispa.

²¹ Saultajrí kuticherqa: Noqaqa Benjamín jatun ayllumanta kani, Israel ukhupi aswan juch'uy kaj ayllumanta. Benjamín jatun ayllu ukhupitaj noqaj aylloyqa mana kasu ruwana. Imaraykutaj chayta niwankiri? nispa.

²² Chantá Samuelqa Saulta, kamachintawan jatun wasiman pusaykorqa, chaypitaj aswan ñawpajpi tiyacherqa. Wajyarisqa runakunaqa uj kinsa chunka jina karqanku.

²³ Samueltaj wayk'oj runata nerqa: Waqaychanaykipaj jaywarqayki, chay aychata kayman apamuy, nispa.

²⁴ Chantá wayk'ojqa usqhay usqhayta chakan aychata orqhomuspa, Saulman jaywarqa. Chantá Samuel nerqa: Chayqa qanpaj t'aqasqa karqa. Mikhurikuy, chaytaqa qanpajpuni t'aqacherqani, wajyarisqa runakunawan khuska mikhunaykipaj, nispa. Saultaj chay p'unchay Samuelwan khuska mikhorqa.

²⁵ Chantá orqo patapi Diosta yupaychana cheqamanta llajtaman urayk'uspa, Samuelwan, Saulwan wasi patapi parlarikorqanku.

²⁶ Saultaj chaypi puñorqa. Q'ayantin chhapu chhapullataraj, Saúl wasi patallapiraj kashajtin, Samuelqa payta wajyaspa, nerqa: Sayarikuy wasiykiman ripunaykipaj, nispa. Saultaj sayarikorqa. Chantá iskayninku jawaman llojserqanku.

²⁷ Paykuna llajtamanta llojsejtinkuña, Samuelqa Saulta nerqa: Kamachiykita ñawparinanta niy, qantaj uj chhikatawan qheparikuy, Dios imatachus qanta ninasuyta niwarqa, chayta willasunaypaj, nispa.