1 Samuel 6 - DIOSPA QHELQACHISQAN DEUTEROCANONICAL

Filisteokunaqa Diospa arcanta kutichipunku

¹ Tata Diospa arcanqa qanchis killata Filisteokunaj suyunpi karqa.

² Chantá filisteokunaqa sacerdotenkukunata, chantá yatirinkukunatawan tapunankupaj wajyacherqanku: Imatataj ruwasunman Tata Diospa arcanwanri? Niwayku imaynatachus llajtanman kutichipunata, nispa.

³ Sacerdotekunataj kuticherqanku: Israelpa Diosninpa arcanta kutichipuspaqa, ama jinallataqa kutichinkichejchu. Israelitakunamanta qhechuspa apamusqaykichejmanta Tata Diosman imallatapis qoychej. Chaypacha qankunaqa chay onqoymanta qhaliyankichej, yachankichejtaj imaraykuchus Diosqa sinch'ita ñak'arichisusqaykichejta, nispa.

⁴ Chantá filisteokuna tapurikorqanku: Juchallisqaykuta pampachananpaj imatataj qoykumanri? nispa. Sacerdotekunataj kuticherqanku: Ruwaychej qorimanta phishqa ch'uputa, jinataj phishqa juk'uchatawan, sapa kurajninchejkunapaj ujtakama, imaraykuchus kurajniykichejkuna, jinataj qankunapis kikin onqoyllawantaj ñak'arerqankichej.

⁵ Chayrayku llajtaykichejta tukuchishanku, chay ch'upuman rijch'akojta, chantá juk'uchaman rijch'akojkunata ruwaychej. Ajinata Israelpa Diosninta jatunchankichej. Ichapis payqa qankunata, diosniykichejkunata, jinataj jallp'aykichejtapis manaña jasut'inmanchu.

⁶ Imaraykutaj qankuna, Egipto llajtayojkuna jina chantá kuraj kamachej faraón jina mana uyarikuyta munaj kankichejri? Israelitakunaj Diosnin Egipto llajtayojkunata sinch'ita ñak'arichejtinraj, paykunata ripojta saqerqanku.

⁷ Chayrayku kunanqa mosoj carretata ruwaychej, chaymantaj uñayoj, mana jayk'aj yugo watana iskay wakaman wataykuychej. Amataj saqeychejchu uñanku paykunata qhatinankuta, manachayqa uñankuta kanchaman wisq'amunkichej.

⁸ Chantá Tata Diospa arcanta carretaman churaykuychej, ladonmantaj uj cajonpi, imakunatachus qorimanta ruwasqata juchaykichejmanta qonkichej, chaykunata churaykuychej. Chantá wakakunaj aysasqanku carreta payllamanta puririnanta saqenkichej.

⁹ Chantá sumajta qhawankichej: Sichus carreta Bet Semes llajtaman rej ñanta riponqa chayqa, yachasun Israelpa Tata Diosnin kay jina llakiyman churawasqanchejta. Mana jina kajtinrí, yachasun mana paychu ñak'arichiwasqanchejta, manachayqa kay ch'upu onqoy kaymanta jinalla rikhurisqanta, nispa.

¹⁰ Filisteokunaqa kikinta ruwarqanku. Uñayoj iskay wakata carretaman yugoykorqanku, uñankutataj kanchaman wisq'aykorqanku.

¹¹ Chaymanta Tata Diospa arcanta carretaman churaykorqanku, jinallataj qorimanta ruwasqa juk'uchakunayoj, qorimanta ruwasqa ch'upukunayoj cajontapis churaykullarqankutaj.

¹² Chantá wakakunaqa Bet Semes llajtaman rej ñanninta paykunallamanta thaskiyta qallarerqanku, waqaspa, ni mayman link'urispataj, cheqanta rerqanku. Filisteokunaj kurajninkukunataj Bet Semes tinkuykama carretaj qhepanta rerqanku.

¹³ Chaypacha Bet Semespi tiyakojkunaqa vallepi trigota oqharisharqanku, qhawarispataj Diospa arcanta jamushajta rikorqanku. Chantá mayta kusikorqanku.

¹⁴ Wakakunaj qhatatisqan carretaqa Bet Semespi Josuéj jallp'ankama chayarqa, uj jatun rumi qayllapitaj sayarqa. Chantá Bet Semespi tiyakojkuna carretata llant'aspa, chay wakakunata ñak'arqanku Tata Diosman jaywaspa q'olachinankupaj.

¹⁵ Chantá levitakunaqa Diospa arcanta, jinataj qori imakunayoj cajontawan urayk'uchispa, chay jatun rumi pataman churaykorqanku. Bet Semes llajtayojkunataj chay p'unchaypi uywa ñak'asqata q'olachispa Tata Diosman jaywarqanku, chantá waj jaywanatawan jaywallarqankutaj.

¹⁶ Chay imakunata ruwajta rikuspataj, filisteokunaj phishqa kurajninkukuna chay kikin p'unchaypacha Ecronman kutiporqanku.

¹⁷ Filisteokuna juchallisqankumanta qori ch'upukunata Tata Diosman qosqankoqa kay llajtakunaj cuentanmanta karqa: Asdodmanta, Gazamanta, Ascalonmanta, Gatmanta, Ecronmanta ima.

¹⁸ Qorimanta ruwasqanku juk'uchakunapis phishqa kurajkuna kamachisqanku chay llajtakuna chhikallataj karqa, perqawan muyuchisqa llajtakunata yupaspa, jinataj mana perqawan muyuykusqa llajtakunatawan. Maypichus Tata Diospa arcanta churarqanku, chay jatun rumeqa Bet Semespi Josuéj jallp'anpi kunankama kashanraj.

¹⁹ Chaywanpis Bet Semes llajtapi tiyakojkunamanta wakinta Tata Dios wañucherqa, paypa arcan ukhupi imachus kasqanta rikuyta munaspa qhawaykusqankurayku. Chaypacha qanchis chunka runakunata wañucherqa. Chayrayku Bet Semespi tiyakojkunaqa Tata Dios chay chhikatapuni wañuchisqanmanta waqarqanku.

²⁰ Chantá Bet Semes llajtayojkuna nerqanku: Pitaj llimphu llimphu kaj Tata Diospa ñawpaqenpi sayayta atinmanri? Ama noqanchej ukhupi qhepakunanpaj, arcanta maymantaj apachisunmanri? nispa.

²¹ Chantá usqhayllata Quiriat Yearinpi tiyakojkunaman kay jinata willacherqanku: Filisteokunaqa Tata Diospa arcanta kutichimpunku. Chayrayku jamuspa, apakapuychej, nispa.