1 Samuel 31 - DIOSPA QHELQACHISQAN DEUTEROCANONICAL

Saulwan, churinkunawan ima maqanakupi wañunku

¹ Filisteokunaqa israelitakunawan maqanakorqanku, israelitakunatajrí ayqerikaporqanku. Gilboa orqopitaj ashkhatapuni wañuykucherqanku.

² Filisteokunaqa Saulta, churinkunatawan qhatiykuspa, wañucherqanku Jonatanta, Abinadabta, chantá Malquisuata ima.

³ Chaymantaqa Saúl kasharqa, chaynejman tukuynin filisteokuna maqanakoj qolluykukorqanku. Arcowan flechajkuna Saulta jap'irparichispataj, parti wañusqata saqerparerqanku.

⁴ Chayrayku Saulqa armanta apaykachapoj soldadota nerqa: Espadaykita orqhokuspa, wañuchiway, Diosta mana manchachikoj runakuna wañuchiwaspa ama alqochakunawankupaj, nispa. Armanta apaykachapojrí mana Saulpa nisqanta ruwarqachu, sinch'ita manchachikusqanrayku. Chayrayku Saulqa espadanta sayaykuchispa, patanman urmaykurparerqa.

⁵ Armanta apaykachapojtaj Saulta wañusqata rikuspa, paypis kikillantataj ruwarqa. Jinamanta Saulwan khuska wañorqa.

⁶ Ajinata chay p'unchay Saúl, jinataj kinsantin churinkuna, armanta apaykachapojnin, chantá tukuy soldadonkuna ima wañorqanku.

⁷ Chantá vallemanta chimpanpi tiyakoj israelitakuna, jinataj Jordán mayumanta inti llojsimuynejpi jina tiyakojkunapis yacharqanku israelita soldadokuna ayqesqankuta, Saulpis, churinkunapis wañusqankuta ima. Chayrayku llajtankuta saqerpaspa, paykunapis ayqellarqankutaj. Chantá filisteokuna chayamuspa, chay llajtakunapi tiyakorqanku.

⁸ Q'ayantenqa, filisteokuna wañojkunaj valorniyoj imankuta orqhoraj rerqanku. Gilboa orqopitaj Saulta, kinsantin churinkunatawan wañusqata tarerqanku.

⁹ Chantá Saulpa umanta qholorqanku, armantataj jap'ikaporqanku. Jinaspataj, tukuy Filistea jap'iyman willajkunata kacharqanku, lantikunata yupaychana wasikunapi tukuy runaman chayta willanankupaj.

¹⁰ Saulpa armankunata Astarot sutiyoj diosta yupaychananku wasiman churarqanku, ayantataj Betsán llajtaj perqaman warkhorqanku.

¹¹ Chantá Galaadpi, Jabés llajtapi tiyakoj israelitakunaqa filisteokuna Saulpa ayanwan imatachus ruwasqankuta yacharqanku.

¹² Chaypacha tukuy wapu runakuna parlanakuspa, tukuy tutantin purerqanku. Chantá Betsán llajtaman chayaspa, perqamanta Saulpa ayanta, chantá churinkunaj ayankuta ima orqhorqanku. Jabés llajtaman apamuspataj, chaypi ruphacherqanku.

¹³ Chantá tullunkuta Jabés llajtapi uj tamarindo sach'a uraman p'ampaykorqanku. Chantá qanchis p'unchay junt'ata mana mikhuspa, ayunarqanku, llakikusqankuta yachayta qospa.