1 Samuel 30 - DIOSPA QHELQACHISQAN DEUTEROCANONICAL

Davidqa Amalec llajtayojkunata atipaykun

¹ Minchhantenqa Davidwan, chantá soldadonkunawan ima Siclag llajtaman chayarqanku. Chantá rikorqanku amalecitakuna Neguevman, jinataj Siclag llajtaman yaykuykamusqankuta, tukuyta phirispataj, ninawan jap'iykuchisqankuta.

² Jinataj warmikunata, wawakunata chantá machu runakunata, wata runata jina apasqankuta rikullarqankutaj. Chaywanpis manataj pitapis wañuchisqankuchu.

³ Davidwan runankunapiwan chayaspa, amalecitakuna llajtata ninawan ruphaykuchisqankuta rikorqanku, jinallataj warminkunata, churinkunata, jinataj ususinkunatapis apakapusqankuta rikullarqankutaj.

⁴ Chantá Davidwan, runankunapiwan jatunmanta qhaparispa, manaña atinankukama waqarqanku.

⁵ Davidpa iskaynin warminkunatapis apallasqankutaj, Jezrelmanta Ajinoán sutiyoj warminta, jinataj Carmelmanta wañoj Nabalpa warmin Abigaíl warmintapis.

⁶ Davidqa sinch'i phutisqa kasharqa, imaraykuchus soldadonkunaqa payta rumiwan ch'anqaykuyta munarqanku. Tukuyninku wawankukunamanta manchay llakisqa kasharqanku. Chaywanpis Davidqa Tata Diosninmanta jap'ikuspa, kallpachakorqa.

⁷ Chantá Davidqa Ajimelecpa churin sacerdote Abiatarta nerqa: Ama jinachu kay, Diospa munayninta tapuna unkuta aparimuway, nispa. Abiatartaj unkuta Davidman jaywarqa.

⁸ Davidtaj Tata Diosta taporqa: Chay suwa runakunata qhatiykuymanchu? Taripayta atiymanchu? nispa. Tata Diostaj kuticherqa: Qhatiykullay, taripankiraj, apasqanku runakunatapis qhechukampunki, nispa.

⁹ Chaypachapacha Davidqa 600 runankunawan khuska kachaykukorqa, Besor wayq'omantaj chayarqanku. Chaypitaj wakin qhepakorqanku.

¹⁰ Chay wayq'opi 200 soldadokuna qhepakorqanku, sinch'i sayk'usqa kaspa wayq'ota mana chimpayta atisqankurayku. Tawa pachaj runakunawantaj Davidqa amalecitakunata qhatiykuspa rillarqapuni.

¹¹ Pampanejman chayaspataj, Egipto llajtayoj uj runata tarerqanku. Chantá Davidman pusarqanku, chaypitaj payman mikhunata, yakutawan jaywarqanku.

¹² Qollarqankutaj higo k'isamanta tortata, jinataj uva k'isamanta iskay tortatawan. Chayta mikhuykuytawan, Egipto llajtayojqa kutirerqa. Payqa kinsa p'unchayta, kinsa ch'isitawan mana imatapis mikhusqachu, nitaj ujyasqachu.

¹³ Chantá Davidqa payta taporqa: Pitaj patronniykiri? Maymantataj kankiri? nispa. Waynuchutaj kuticherqa: Egiptomanta kani, uj amalecitaj uywasqan. Patronneyqa onqoykusqayrayku kinsa p'unchayta jinaña ñanpi saqerpariwan.

¹⁴ Noqaykoqa cereteokunaj jap'iyninkumanta Neguevman, Judaman chantá Calebpa jap'iyninman ima qhechuramoj rerqayku. Siclag llajtamanpis ninata jap'iykuchillarqaykutaj, nispa.

¹⁵ Davidtaj taporqa: Pusarqowankimanchu, chay suwakuna maypichus kashanku, chayman? nispa. Egipto llajtayojtaj kuticherqa: Sichus Diosniykej sutinrayku tiluwanki mana wañuchinawaykita, nitaj patronniymanpis jaywaykunawaykita chayqa, paykunakama pusasqayki, nispa.

¹⁶ Chantá Egipto llajtayoj paykunata, maypichus suwakuna kasharqanku, chaykama pusarqa. Suwakunaqa tukuy pampapi ch'eqerasqa kusirikuspa kasharqanku. Mikhusharqanku, ujyasharqankutaj filisteokunamanta, jinataj Judamanta tukuy imata suwasqankumanta.

¹⁷ Chantá Davidqa tutamantapacha inti yaykunankama paykunawan maqanakorqa, tukuyninkutataj wañuracherqa. Amalecitakunamantaqa 400 waynakunalla camellokunaman lloq'aykuspa, ayqerikaporqanku.

¹⁸ Davidqa amalecitakunaj tukuy suwasqankuta qhechukamporqa, iskaynin warminkunatapis pusakampullarqataj.

¹⁹ Amalecitakuna qhechuspa apakapusqankumantaqa mana imapis qhepakorqachu, ni juch'uy kajmanta, ni qhari wawakunamanta, nitaj warmi wawakunamantapis, ni kuraj runakunamantapis. Davidqa tukuyninta apakamporqa.

²⁰ Chantá Davidqa ovejakunata, wakakunatapis jap'ikapullarqataj. Jap'isqanku uywakunata qhatejkunataj nisharqanku: Kayqa Davidpa qhechusqanmin, nispa.

²¹ Davidwan, runankunawan Besor wayq'opi chay 200 runakuna qhepakorqanku, chaykunaman chayarqanku. Paykunaqa ancha sayk'usqa kasqankurayku Davidwan khuska riyta mana atisqankuchu. Paykunataj Davidta, runankunatawan ima taripaj llojsimorqanku. Davidtaj paykunaman chayaspa, sumajta napaykorqa.

²² Wakinkunatajrí sajra sonqoyoj kasqankurayku, qhepakojkunapaj rimarqanku: Paykunaqa mana noqaykuwan rerqankuchu. Chayrayku qhechusqaykumanta paykunaman mana imatapis qoykumanchu. Manachayqa warminkuta, wawankutawan jap'ikapuchunku, chantá ripuchunku, nispa.

²³ Davidtajrí nerqa: Munasqa wawqeykuna ama chayta ruwaychejchu. Tata Diosmin kay tukuy imata qowarqanchej. Paymin waqaychawarqanchej. Suwaspa qhechuwarqanchej, chaykunatapis atipaykuyta yanapawarqanchej.

²⁴ Jinaqa, pitaj imatachus nisqaykichejta allillan kasqanta ninmanri? Jap'ispa apamusqanchejta rak'inakupeqa, maqanakuman rejkuna, q'epita qhawaspa qhepakojkunapis kikillantataj jap'enqanku, nispa.

²⁵ Chaymantapacha kunankama Israel suyupi ajinata ruwanku.

²⁶ Chantá David Siclag llajtaman chayaytawan, Judá jap'iypi kurajkunaman imatachus awqakunamanta qhechusqanmanta wakinta apacherqa: Kay t'inkata qankunaman apachimuykichej, Tata Diospa awqankunamanta qhechusqaykumanta uj chhikanta, nispa.

²⁷ Ajinallatataj Betel llajtayojkunaman, Neguevpi Ramot llajtayojkunaman, Jatir llajtayojkunaman ima t'inkata apacherqa.

²⁸ Apachillarqataj Aroerpi kajkunaman, Sifmotpi kajkunaman, Estemoapi kajkunaman,

²⁹ Racalpi kajkunamanpis. Yeramelpi kajkunaman, chantá quenitakunaman ima apachillarqataj,

³⁰ Jormapi kajkunaman, Corasanpi kajkunaman, Atacpi kajkunaman,

³¹ Hebronpi kajkunaman, chay tukuy maykunapichus paywan runankunapiwan ima purisqanku, chaykunaman t'inkata apacherqa.