1 Samuel 29 - DIOSPA QHELQACHISQAN DEUTEROCANONICAL

Filisteokunaqa Davidpi mana atinikunkuchu

¹ Filisteokunaqa tukuy soldadonkuta Afecpi tantaykorqanku, chaykamataj israelitakunaqa Jezrelpi kaj yaku juturi chaynejpi tantakullarqankutaj.

² Filisteo soldadokunaqa pachajmanta pachaj, waranqamanta waranqa kamachejninkuwan khuska risharqanku. Davidwan, soldadonkunawantaj Aquiswan khuska qhepallata risharqanku.

³ Jinallapi filisteokunamanta kurajkuna Aquista taporqanku: Kay israelitakuna imatataj kaypi ruwashankuri? nispa. Aquistaj kuticherqa: Kay runajtaqa David sutin. Payqa Israel suyoj kuraj kamachejnin Saulpa yanapajnin ñawpajta karqa. Kunantajrí wata kurajtaña noqawan kashan. Noqawan kasqanmantapacha paypi mana ni ima mana allinta tarinichu, nispa.

⁴ Chantá filisteokunaj kamachejninkukuna Aquispaj phiñakuspa, nerqanku: Kachapuy kay runata, maypichus jallp'ata qorqanki, chayman, amataj maqanakuman noqanchejwan richunchu. Pajtataj maqanakupi kashaspa, Davidqa awqanchejman kutiykukunman. Chantá kuraj kamachejninwan allinyakapuyta munaspa, soldadonchejkunaj umankuta qholuspa payman apanman.

⁵ Manachu warmikuna tususpa kay Davidmanta takej kanku: Saulqa waranqa runata wañucherqa, Davidtajrí chunka waranqata, nispa?

⁶ Chantá Aquisqa Davidta wajyaspa, nerqa: Tata Diospa sutinrayku tiluyki: Qanqa cheqan sonqoyoj runa kanki, jarapi imaynatachus purisqaykitaj mayta kusichiwan. Noqawan tiyakusqaykimantapachaqa mana ima mana allintapis qanpi tarinichu. Chaywanpis filisteokunaj kamachejninku mana allin ñawiwanchu qhawasunku.

⁷ Chayrayku kunanqa ch'inmanta kutipullay, filisteokunaj kamachejninkukunata ama phiñachinapaj, nispa.

⁸ Chantá Davidqa kuraj kamachej Aquisman kuticherqa: Noqa imatataj ruwasqaniri? Wiraqochi kamachejníy, imatataj qanwan kasqaymantapacha ruwasqani awqaykichejkunaj contrankuta ama maqanakuman rinaypaj jinari? nispa.

⁹ Aquistajrí kuticherqa: Noqa yachani qanqa Diospa angelnin jina allin runa kasqaykita. Chaywanpis filisteokunaj kamachejninkukunaqa mana munankuchu noqaykuwan khuska maqanakoj rinaykita.

¹⁰ Chayrayku, qan, chantá kuraj kamachej Saulpa kamachinkuna qanwan jamorqanku, chaykunantin q'aya paqarin sut'iyajtinkama kutipunkichej, nispa.

¹¹ Ajinaqa Davidwan, soldadonkunawan ima q'ayantin paqarin Filistea suyuman kutiporqanku. Chaykamataj filisteokunaqa israelitakunawan maqanakunankupaj Jezrelman rishallarqankupuni.