1 Samuel 27 - DIOSPA QHELQACHISQAN DEUTEROCANONICAL

Davidqa filisteokunawan tiyakun

¹ Chaywanpis David sonqonpi nerqa: Saulqa mayk'ajllapis wañuchiwanman. Chayrayku, amaña tukuy Israel jap'iypi mask'anawanpaj, aswan allin kanman Filistea suyuman ayqekunay. Ajinata Saulmanta ayqekusaj, nispa.

² Chantá Davidqa 600 runankunawan ima kuraj kamachej Aquispaman riporqanku. Aquisqa Maocpa churin karqa, Gat llajtaj kuraj kamachejnintaj.

³ David, chantá runankunantin ima Gat llajtapi Aquiswan tiyakorqanku, sapa ujpis ayllunkuwan ima. Davidwan khuska iskaynin warminkuna rillarqankutaj: Jezrel llajtamanta Ajinoán, chantá Carmelmanta wañoj Nabalpa warmin Abigailwan ima.

⁴ Maypachachus Saúl yacharqa David Gat llajtaman ayqesqanta chaypacha, manaña payta qhatiykacharqachu.

⁵ Chantá Davidqa Aquista nerqa: Kuraj kamachejníy, ama jina kaychu. Suyuykipi tiyakunaypaj mayqen llajtallapipis uj cheqata qoriwayku. Mana walejchu kanman noqayku kay kikin llajtaykipi qanwan khuska tiyakunaykoqa, nispa.

⁶ Chantá Aquisqa chay p'unchaypacha Siclag llajtata Davidman qorqa. Chayrayku kunankama Siclag llajtaqa Judá suyojta kashan.

⁷ Davidtaj uj wata tawa killayojta filisteokunawan tiyakorqa.

⁸ Davidqa soldadonkunawan ima Gesur llajtaman, Guezerman, chantá amalecitakunaman ima suwaj yaykorqanku. Chay llajtayojkunaqa Telayinmantapacha, Shur nisqa ch'innejpi, Egipto suyukama unaymantaña tiyakusqanku.

⁹ Davidqa chay cheqapi tiyakojkunawan maqanakuspa, qharikunata, warmikunata, tukuyninta wañuchej kanku. Chay jawa ovejakunata, wakakunata, burrokunata, camellokunata chantá p'achata ima apakampullajtaj kanku. Chantá Aquis maypichus tiyakorqa, chayman kutimoj kanku.

¹⁰ Chantá kuraj kamachej Aquisqa Davidta tapoj: May llajtamantataj kunan qhechuramorqankichejri? nispa. Davidtaj kutichej: Judapi kaj Néguev uraynejpi, chayrí Yeramelmanta uraynejpi, chayrí quenitakunaj jap'iynin uranejmanta qhechumorqayku, nispa.

¹¹ Davidqa qharikunata, warmikunata, tukuyninta wañuchej, ama pipis Gatman rispa imatachus ruwasqanta willamunankupaj. Davidqa Filistea suyupi tiyakusqanmantapacha ajinallatapuni ruwaj.

¹² Aquistaj Davidpi atinikuspa, sonqonpi nej: Davidqa israelitakunawan astawan chejnichikushan. Jina chayqa, tukuy tiempo kamachillaypuni kanqa, nispa.