1 Samuel 25 - DIOSPA QHELQACHISQAN DEUTEROCANONICAL

Samuel wañupun

¹ Samuel wañuporqa, chayraykutaj tukuy israelitakuna wañupusqanmanta waqanankupaj tantakorqanku. Ayantataj Ramá llajtapi kikin wasillanpitaj p'amparqanku. Chaymantataj Davidqa Parán nisqa ch'innejman riporqa.

Nabal Davidta phiñachin

² Maón llajtapi uj manchay qhapaj runa tiyakorqa, 3.000 ovejayoj, 1.000 cabrayoj. Jallp'antaj Carmel llajta qayllapi karqa. Chaypachataj Carmelpi ovejankunaj millmanta ruthuchisharqa.

³ Kay runaqa Calebpa ayllunmanta karqa, sutintaj Nabal. Payqa mana sonqoyoj runa, sajrataj karqa. Warmin Abigailtajrí allin yuyayniyoj, k'achita warmi karqa.

⁴ David ch'in pampapi kashaspa, uyarerqa Nabalqa Carmel llajtapi ovejankunata ruthuchishasqanta.

⁵ Chantá Davidqa kamachinkunamanta Carmelman chunkata kacharqa paypa sutinpi Nabalta napaykamunankupaj.

⁶ Kay jinatataj nicherqa: Kawsaqéy, allillan risuchun. Jinallataj qan, aylluyki, wasiykipi tukuy kaj chhikapis allillanta kawsakuychej.

⁷ Yachani millma ruthuypi kashasqaykita. Qanrí yachankiñachá michejniykikuna Carmelpi noqaykuwan kashajtinkoqa, mana imapi paykunata llakichisqaykuta, nitaj imatapis qhechusqaykuta.

⁸ Munaspaqa, michejniykikunata tapuriy. Paykuna astawan sut'inta willasonqanku. Chayrayku kunanqa kay waynakunamanta khuyarikunaykita mañarikuyki, imajtinchus raymi ruwanayki p'unchaypi chayamushasunku. Ama jina kaspa, kay waynakunaman, jinataj noqa wawayki jina Davidmanpis sonqoykej munasqanman jina imatapis qoriwayku, nispa.

⁹ Davidpa kamachinkunaqa Nabalman chayaspa, willarqanku Davidpa nisqanta, suyarqankutaj imatachus kutichinanta.

¹⁰ Nabaltajrí kuticherqa: Pitaj kasqa Davidri? Pitaj kasqa Yeséj churinri? Kunan tiempoqa ashkha wata runa patronninkumanta ayqerashanku.

¹¹ Imaynatataj qoyman ruthojniykunapaj wakichisqay mikhunata, yakuta, aychata ima, maymantachus kasqankuta mana yachasqay runakunamanri? nispa.

¹² Davidpa kamachinkunaqa ch'usaj makilla kutiporqanku. Davidman chayaspataj, Nabal imatachus nisqanta willarqanku.

¹³ Chantá Davidqa tukuynin runankunata kamacherqa: Tukuyniykichej armaykichejta oqharikuychej, nispa. Chay runakunataj David jina espadankuta chumpinkuman churakorqanku. Ajinamanta tawa pachaj runakuna Davidwan rerqanku, iskay pachajtaj tukuy imata qhawanankupaj qhepakorqanku.

¹⁴ Nabalpa ujnin kaj kamachintajrí rispa, Nabalpa warmin Abigailman willamorqa: Ch'in pampamantapacha Davidqa patronniyta napaykunankupaj kachakunata kachamorqa, paytaj manchay phiña simiwan paykunata kuticherqa.

¹⁵ Chay runakunaqa noqaykuwan manchay k'acha karqanku. Ch'in pampapi kashajtiyku, mana jayk'ajpis ima llakiyta qowarqaykuchu, nitaj imatapis qhechuwarqaykuchu.

¹⁶ Paykunaqa tutapis p'unchaypis noqaykuta, jinataj ovejaykukunatapis waqaychawaj kayku.

¹⁷ Qosaykirí ancha millay runa, mana ima nirina. Chayta qan umacharikuy, qhawaytaj imatachus ruwanaykita, manachayqa cheqamanta mana allin kaj payta, jinataj aylluntapis qhatirenqa, nispa.

¹⁸ Chantá usqhayllata Abigailqa 200 t'antata, iskay bota vinota, phishqa oveja aycha kankata, phishqa arroba trigo jank'ata, pachaj chhullchu uva k'isata, higo k'isamanta 200 tortillata ima q'epichakorqa. Chaykunatataj burrokunaman chajnaykucherqa.

¹⁹ Chantá kamachinkunata nerqa: Qankunaqa ñawpaykushaychej, noqataj aswan qhepata jamullasaj, nispa. Imatachus ruwashasqantarí qosan Nabalman mana willarqachu.

²⁰ Chantá Abigailqa burroman lloq'aykuspa, orqoj wasallanta pakaymanta urayk'orqa. Chantá Davidta, runankunatawan ima jamushajta rikorqa, Abigailtaj paykunata tariparqa.

²¹ David jamushaspa, sonqonpi nisharqa: Qhasita Nabalpa tukuy kapuyninta ch'in pampapi waqaycharqayku, tiyapusqanmanta mana ni imata qhechuspa. Payqa allinta ruwasqayman sajrata kutichiwan.

²² Chayrayku tiluspa: Tata Dios sinch'ita ñak'arichiwachun, sichus q'aya sut'iyanankama Nabalta chantá ayllunmanta tukuy qharita mana wañuchisaj chayqa, nispa.

²³ Abigailqa Davidta rikuytawankama, burronmanta urayk'uspa, pampakama k'umuykorqa.

²⁴ Chantá Davidpa chakinnejman qonqoriykukuspa, nerqa: Qosaypa juchallisqanqa noqaj pataypi kachun, wiraqochíy. Ama jina kaspa, imatachus noqa kamachiyki parlasqasuyta uyaririway ari.

²⁵ Nabalta ama kasuta ruwaychu. Payqa ancha sajra runa, sutinman jinataj ancha wampu runapuni. Imatapis wampu jinapuni ruwan. Noqarí kachamusqayki kamachiykikunata mana rikorqanichu.

²⁶ Chaywanpis Tata Dios mana munarqachu qan makiykiwan justiciata ruwayta munaspa wañuchej jamunaykita. Tata Dios munachun tukuy qanpa awqaykikuna, mana allinta ruwayta munasojkunapis, Nabal jina ñak'arichisqa kanankuta.

²⁷ Ama jina kaspa, kay apamususqay mikhunata jap'ikunawaykita, runaykikunamantaj rak'iykunaykita nirikuyki.

²⁸ Noqa kamachiyki pantaykusqayta qhespirichiway ari. Tata Diosqa kuraj kamachej jina kanaykita sinch'ita sayachichun, Tata Diospa sutinpi maqanakushasqaykirayku. Mayk'ajkamachus kawsanki, chaykama ama ima sajrapis qhatirisuchunchu.

²⁹ Pillapis qanta qhatiykachasojtin, chayrí wañuchiyta munasojtenqa, Tata Dios qanta waqaychasuchun. Awqaykikunatarí imaynatachus warak'awan rumita karuman wijch'unku, ajinata Tata Diosqa wijch'onqa.

³⁰ Ajinaqa, Tata Dios qanman tukuy nisusqanta junt'anqa chayqa, Israel suyuta kamachinaykipaj churasonqa.

³¹ Ajina kajtenqa, qan mana llakikunkichu, nitaj sonqoykitapis nanachikunkichu mana juchayojkunata wañuchisqaykimanta, nitaj sajramanta sajrallatataj kutichisqaykimanta. Tata Diospa tukuy nisqan junt'akojtintaj, noqa kamachiykimanta ama qonqakuwankichu, nispa.

³² Chantá Davidqa Abigailman kuticherqa: Israelpa Tata Diosnin yupaychasqa kachun, pay noqata taripanawaykipaj kachamususqanmanta.

³³ Dios qanta saminchasuchun, ajina allin yuyayniyoj kasqaykimanta. Qanmin jark'awarqanki mana juchayojkunata wañuchinaymanta, noqa kikin sajramanta sajrallawantaj kutichispa pagachikunaymanta ima.

³⁴ Israelitakunaj Tata Diosninrayku tiluyki, pichus mana munarqachu ni ima sajratapis ruwasunayta, chayrayku: Manachus qan noqata taripawaj usqhayta jamuwaj karqa chayqa, q'ayakama mana uj qharillapis Nabalpa runankunamanta kawsashaj kanmanchu karqa, nispa.

³⁵ Chantá Davidqa Abigailpa apamusqanta jap'ispa, nerqa: Kunanqa wasiykiman allillanta ripuy. Noqaqa niwasqaykita, mañarikuwasqaykitapis uyariykiña, nispa.

³⁶ Chantá Abigaíl kutiporqa, maypichus Nabal kasharqa, chayman. Rikorqataj wasinpi sumaj raymita kuraj kamachejpaj jinapuni ruwashasqanta. Nabalqa may kusisqa phiri machasqataj kasharqa. Chayrayku Abigailqa q'ayantinkama mana imatapis nerqachu.

³⁷ Q'ayantin paqarintaj Nabal machasqa kasqanmanta yuyayninman kutirejtinña, Abigailqa qosanman tukuy imachus kasqanta sut'inta willarqa. Nabaltaj uyarispa, wayraj jap'isqan jina mana kuyurej rikhurerqa.

³⁸ Chunka p'unchayninmantaj Tata Diosqa Nabalta wañucherqa.

David Abigailwan casaran

³⁹ Davidqa Nabal wañusqanta yachaspa, nerqa: Tata Dios yupaychasqa kachun, imaraykuchus payqa Nabalta sonqoyta nanaykuchiwasqanmanta jasut'in. Diosqa sajrata ruwanaymanta jark'awarqa. Nabal mana allinta ruwawasqantaqa payllamantaj kuticherqa, nispa. Chantá Davidqa yanapajninkunamanta wakinta Abigailman kacharqa, paywan casarakuyta munasqanta willachispa.

⁴⁰ Davidpa kachasqankuna Carmelman Abigailta parlapayaj chayaspa, nerqanku: David qanta pusajta kachamuwayku, qanwan casarayta munan, nispa.

⁴¹ Abigailtaj pampakama k'umuykukuspa, nerqa: Noqaqa paypa kamachinpis kasaj. Sichus kamachinkunaj chakinkuta mayllanayta niwanqa chayqa, noqa mayllasaj, nispa.

⁴² Chayta niytawan, Abigailqa usqhayta oqharikorqa. Phishqa warmi kamachinkunata pusariykukuspataj, uj burropi Davidpa kachasqankunaj qhepankuta rerqa. Chantá Davidwan casarakaporqa.

⁴³ Davidqa casarakullarqataj Jezrel llajtamanta Ajinoán sutiyoj warmiwanpis, iskayninkutaj Davidpa warminkuna karqanku.

⁴⁴ Saultajrí ususin Micalta, pichus Davidpa warmin karqa chayta, Galín llajtayoj Laispa churin Paltiwan casaracherqa.