1 Samuel 23 - DIOSPA QHELQACHISQAN DEUTEROCANONICAL

Davidqa Keila llajtata filisteokunamanta kacharichin

¹ Uj kuti filisteokunaqa Keila llajtaman yaykuykuspa, eramanta trigota suwakaporqanku. Chaytataj Davidman willarqanku.

² Davidtaj Tata Diosta tapurerqa: Filisteokunawan maqanakoj riymanchu? nispa. Tata Diostaj kuticherqa: Arí, rispa maqanakamuy, Keila llajtatataj kacharichimuy, nispa.

³ Davidpa soldadonkunatajrí nerqanku: Sichus kay Judá jap'iyllapiraj manchachikushanchej chayqa, astawanrajchari Keilaman rispa filisteokunaj contrankupi maqanakuspa manchachikusunman ari, nispa.

⁴ Chantá Davidqa ujtawan Tata Diosta tapullarqataj, Tata Diostaj kay jinata nerqa: Rillayña Keilaman, imaraykuchus noqaqa filisteokunata atipaykuyta yanapasqayki, nispa.

⁵ Davidtaj, soldadonkuna ima Keilaman purirerqanku. Chantá filisteokunaj contrankuta maqanakuspa, paykunata atipaykorqanku, tukuy uywankukunatataj qhechorqanku. Ajinata Davidqa Keilapi tiyakojkunata filisteokunaj makinkumanta kacharicherqa.

⁶ Chaykamarí Keila llajtapi Davidwan ujchakuyta munaspa, Ajimelecpa churin Abiatar Diospa munayninta watuna unkuta apariykukuspa rerqa.

⁷ Chaypachallataj Saulman willasqanku Davidqa Keilapi kashasqanta. Chayta uyarispa, Saulqa sonqonpi nerqa: Davidta jap'inaypaj Dios yanapashawan, imaraykuchus sumaj jatun punkuyoj llajtaman yaykun, manataj chaymanta ayqeyta atenqachu, nispa.

⁸ Chayrayku Saulqa tukuy soldadonkunata wajyacherqa, Keila llajtaman rispa, chaypi Davidta, soldadonkunata ima jap'inankupaj.

⁹ Davidtajrí Saúl payta jap'ej jamunayashasqanta yachaspa, sacerdote Abiatarta kamacherqa Tata Diosta tapuna unkuta apamunanta.

¹⁰ Davidtaj Tata Diosta nerqa: Tata Dios, Israelpa Diosnin, noqa yachani Saulqa Keila llajtaman jamunayashasqanta, noqarayku kay llajtapi tukuy tiyakojkunata wañuchinanpaj.

¹¹ Saulqa mask'awaj jamonqapunichu? Chantá Keila llajtayojkuna payman jaywaykuwanqankuchu? Tata Dios, Israelpa Diosnin, mañakuyki willarinawaykita, nispa. Tata Diostaj kuticherqa: Saulqa jamonqapuni, nispa.

¹² Chantá Davidqa Tata Diosta ujtawan tapullarqataj: Keila llajtayojkunaqa noqata, soldadoykunata ima Saulman jaywaykuwasqaykuchu? nispa. Tata Diostaj kuticherqa: Arí, jaywaykusonqachej, nispa.

David ch'innejpi pakakun

¹³ Chaypacha Davidqa, tukuy soldadonkunawan ima Keila llajtamanta riporqanku chantá kaynejpi jaqaynejpi pakakuspa purerqanku. Tukuyninku 600 jina karqanku. David Keila llajtamanta ayqesqanta Saulman willajtinku, manaña Keilaman rerqachu.

¹⁴ Chaymantapacha Davidqa Zif nisqa ch'innejpi, pakakunapaj jina orqorara cheqanejpi tiyakorqa. Saultaj sapa p'unchay payta mask'allarqapuni. Chaywanpis Diosqa tarinanta mana munarqachu.

¹⁵ Davidtajrí Zif nisqa ch'innejpi Horespi kashajtin, Saúl payta wañuchiyta munaspa jamushasqanta payman willarqanku.

¹⁶ Chaypacha Saulpa churin Jonatán Davidta watukoj Horesman rerqa, Diosllamanta jap'ikuspa kananta yuyaychananpaj.

¹⁷ Nerqataj: David, ama manchachikuychu. Tatayqa mana tariyta atisonqachu. Qanqa Israel suyupi kuraj kamachej kanayki tiyan, noqataj qanpa qhepaykipi kasaj. Chaytaqa tatay Saulpis yachan, nispa.

¹⁸ Chaypacha iskayninku Tata Diospa uyarinanta ujtawan tratota ruwarqanku. Chantá Jonatanqa wasinman kutiporqa, Davidtaj Horespi qhepakorqa.

¹⁹ Zif llajtayojkunarí Gabaa llajtaman rerqanku Saulwan parlanankupaj, chantá nerqanku: Davidqa noqaykoj jap'iyniyku ukhupi kashan. Jaquilá orqopi, Horeb chhankapi, ch'innejmanta uranejpi pakakushan.

²⁰ Chayrayku kuraj kamachejniyku, sichus qan jamuyta munanki chayqa, jamullay, noqaykutaj Davidta jap'iysiyta yanapasqayku, nispa.

²¹ Saultaj kuticherqa: Tata Diosmin saminchasonqachej, noqata khuyakuwasqaykichejmanta.

²² Kunanqa riychej, allinta yachamuychej maynejpipunichus David pakakushasqanta, pichus payta rikusqantawan ima, imaraykuchus niwanku payqa manchay yuyayniyoj runa kasqanta.

²³ Tukuy pakakunan jusk'uta allinta qhawankichej, walejta yachaspa willanawaykichejpaj. Chaymantaraj noqa qankunawan risaj. Chaynejpipunichus kashanman chayqa, jap'inaykama noqaqa tukuy Judá aylloj jap'iyninpi mask'asaj, nispa.

²⁴ Chantá Zif llajtayojkunaqa Saulwan parlaytawan, llajtankuman kutiporqanku. Davidtajrí runankunawan ima Maón ch'innejpiña kasharqanku, uranejpi ch'in tiyan, chaypi.

²⁵ Saulwan, soldadonkunawan ima payta mask'amoj rerqanku. Chayta Davidman willajtinkutaj, payqa Maón ch'in pampapi chhanka kashan, chayman urayk'orqa. Chayta yachaspataj, Saulqa Maón ch'in pampaman Davidta mask'aj rerqa.

²⁶ Saulwan, soldadonkunapiwan ima orqoj uj lado kinrayninta risharqanku, chay orqoj wasantataj Davidwan, runankunapiwan, usqhay usqhayta rishallarqankutaj Saulmanta karunchakunankupaj. Chaywanpis Saulwan, soldadonkunawan ima Davidta, jinataj runankunatawan jap'inankupaj muyuykorqankuña.

²⁷ Jinallapi uj runa Saulman willaj jamorqa: Kuraj kamachejníy, kunanpacha jamunayki tiyan, imaraykuchus filisteokunaqa Israel suyuman yaykuykamushanku, nispa.

²⁸ Chantá Saulqa Davidta qhatiykachayta saqerparispa, filisteokunawan maqanakunanpaj kutiporqa. Chayrayku chay chhankaj sutenqa, Pakakuna chhanka, nisqa.

²⁹ 29 (24.1) Chaymanta Davidqa Engadipi chhankarara cheqaman tiyakoj rerqa.