1 Samuel 20 - DIOSPA QHELQACHISQAN DEUTEROCANONICAL

Jonatán Davidta yanapan

¹ Chantá Davidqa Ramá llajtapi kaj Nayotmanta ayqespa, Jonatán kasharqa, chayman chayarqa. Chantá payta nerqa: Imatataj noqa ruwasqaniri? Imataj juchay kasqari? Imapitaj tataykej contranta juchallisqani wañuchiwayta munaspa mask'anawanpajri? nispa.

² Chantá Jonatán kuticherqa: Chayqa mana jinachu kanqa. Mana wañuchisonqachu. Yachanayki tiyan, tatayqa mana imatapis ruwanchu mana willawaspaqa, juch'uypis kachun, chayrí jatunpis kachun. Imaraykutaj tatayqa kayta pakawanmanri? Chayqa mana jinachu kanqa, nispa.

³ Davidtajrí nillarqapuni: Tataykeqa yachan qanwan noqawan sumajta kawsakusqanchejta. Chayrayku mana willasunkichu ama qan llakikunaykipaj. Tata Diospa sutinrayku, qanpa sutiykiraykupis tiluni wañuy patapi kashasqayta, nispa.

⁴ Chantá Jonatán taporqa: Imatataj munanki qanpaj ruwapusunaytari? nispa.

⁵ Davidtaj Jonatanman kuticherqa: Q'aya p'unchayqa mosoj killa raymi kanqa, noqataj kuraj kamachejwan khuska mikhunay kashan. Ama jinachu kay, saqeriway ch'inman rispa, minchha tardekama pakakamunayta.

⁶ Tatayki noqata watukuwajtenqa, ninki: Nirikuwarqa saqenayta Belén llajtanman usqhayllata rinanpaj, chaypi tukuy ayllun sapa wata jaywanata Diosman jaywananku kasqanrayku, nispa.

⁷ Sichus walej, nisonqa chayqa, niyta munan walejlla kanayta. Phiñarikonqa chayrí, qan yachanki wañuchiwaytapuni munashasqanta.

⁸ Ajinaqa khuyaspa yanapaway kamachiyki kasqayrayku, Tata Diospa ñawpaqenpi noqawan qanwan tratota ruwasqanchejrayku. Noqajtapunichus juchay kashan chayrí, qan kikiyki wañuchiway. Ama tataykimanrajchu apaway, nispa.

⁹ Jonatantaj Davidman kuticherqa: Ama chaytaqa yuyallaypischu. Sichus tatay wañuchisuytapuni munashasqanta yachasaj chayqa, willasqayki, nispa.

¹⁰ Chantá David taporqa Jonatanta: Pitaj willawanqa, tatayki phiñasqa parlasojtinri? nispa.

¹¹ Jonatantaj kuticherqa: Jaku, ch'innejman llojsina, nispa. Iskayninkutaj ch'innejman llojserqanku.

¹² Chaypitaj Jonatanqa Davidta nerqa: Israelpa Tata Diosninpa uyarinanta tiluspa, niyki: Q'aya minchha kunanta jina willasqayki. Tatayta tapuspa, yachasajña imatachus ruwayta yuyashasqanta. Sichus qanpaj walejllata parlanqa chayqa, willachisqayki.

¹³ Sitajchus tatay wañuchisuytapuni munasqanta yachaspa, mana willaykimanchu, nitaj ayqeyta yanapaykimanchu chayqa, Tata Diosqa mana khuyarikuwaspa ñak'arichiwachun. Tata Diostaj yanapasuchun, imaynatachus tatayta yanaparqa, ajinata.

¹⁴ Chaykama kawsasajraj chayqa, imaynatachus qanta Tata Dios khuyasunki, ajinallatataj qanpis khuyarikuwanki. Wañupusaj chayrí,

¹⁵ wawaykunata khuyallankipuni. Tata Dios tukuynin awqaykikunata kay pachamanta chinkachinman chaypis, aylluyta ama qhawarparinkichu, nispa.

¹⁶ Chaypacha Jonatanqa Davidwan tratota ruwarqa: Tata Diosqa Davidpa tukuy awqankunamanta cuentata mañachun, nispa.

¹⁷ Chantá Jonatanwan, Davidwan ima ujtawan tilorqanku, imaraykuchus Jonatanqa Davidta pay kikinta jina munakorqa.

¹⁸ Jonatán nillarqataj: Q'ayaqa mosoj killa raymi kanqa, qanpa tiyanaykitaj ch'usajlla kajtin, watukusonqanku.

¹⁹ Kinsa kaj p'unchaypiraj astawan watukusonqanku. Chayrayku ripuy, qayna maypichus pakakorqanki, chayman. Q'aya minchhataj Ezel rumi qayllapi suyawanki.

²⁰ Noqataj chaynejman rispa, arcowan kinsa flechakunata kacharisaj, imatapis jap'ichiyta munashayman jina.

²¹ Chantá uywaqeyta nisaj: Riy, flechakunata mask'amuy, nispa. Sitajchus noqa niyman: Qanmanta aswan kaynejllapi kashan. Oqharispa, apamuway, nispa chayqa, ama manchachikuspa jamunki, imaraykuchus mana ni imata manchachikunayki kanqachu. Kaytaqa Tata Diospa sutinrayku tiluyki.

²² Sitajchus uywaqeyta nisaj: Flechakunaqa aswan jaqaypi kashanku, nispa chayqa, chaypacha sayarispa ripunki, imaraykuchus Tata Diospuni ripunaykita munan.

²³ Kay tratota ruwasqanchejmantaqa wiñaypaj Tata Diospuni testigonchej kachun, nispa.

²⁴ Chantá Davidqa ch'inman pakakoj rerqa. Mosoj killa raymi chayamojtintaj, kuraj kamachej Saulqa mikhunanpaj tiyaykorqa.

²⁵ Kuraj kamachejqa perqa qayllanejpi, maypichus tiyayta yachaj chaypi tiyaykukorqa. Jonatanrí kuraj kamachejpa chimpannejpi tiyaykorqa. Abnertaj Saulpa ladonpi tiyarikorqa. Davidpa tiyanantajrí ch'usajpacha karqa.

²⁶ Chay p'unchaypi Saulqa mana imatapis nerqachu. Jinapis sonqonpi nisharqa: Ichapis juchallin, manataj llimphupajchu qhawasqa kaspa mana jamunchu, nispa.

²⁷ Killa qallariymanta q'ayantinpis, Davidpa tiyananqa ch'usajllapuni kasharqa. Chaypacha Saulqa churin Jonatanta taporqa: Imaraykutaj Yeséj churin David mana qayna mikhoj jamunchu, nitaj kunanpisri? nispa.

²⁸ Jonatantaj payman kuticherqa: Davidqa Belenman rejta saqerinayta maytapuni nirikuwarqa.

²⁹ Pay niwarqa: Ama jinachu kay, Belenman rejta saqeriway, imaraykuchus llajtaypi aylloyqa uywa ñak'asqata q'olachispa jaywayta yachanku, wawqeytaj kamachiwarqa rinayta. Chayrayku aylluyta waturikoj rinaypaj kacharinawaykita nirikuyta munayki, nispa. Chayrayku kuraj kamachejníy, Davidqa qanwan mikhoj mana jamunchu, nispa.

³⁰ Chantá Saulqa sinch'ita Jonatanpaj phiñarikuspa, nerqa: Qanqa qhencha warmej wawan kanki. Manachu noqa yachani Yeséj churin Davidwan manchayta kawsakusqaykichejta? Chayqa qanpaj p'enqay, jinataj mamaykipajpis.

³¹ Yeséj churin kay pachapi kawsanankamaqa, kawsanayki, jinataj kuraj kamachej kanaykipis mana yachakonqachu. Ajinaqa Davidta mask'amojta kachaspa kayman pusachimuy, imaraykuchus wañunanpuni tiyan, nispa.

³² Jonatantajrí tatan Saulman kuticherqa: Imaraykutaj pay wañonqari? Imatapunitaj ruwasqari? nispa.

³³ Chantá Saulqa lanzanta oqharispa, Jonatanman choqaykorqa. Chayta rikuspa, Jonatanqa repararqa tatanqa Davidta wañuchiytapuni munashasqanta.

³⁴ Chantá Jonatanqa manchay phiñasqa sayarerqa, manataj qhepan kaj raymi p'unchaypi imatapis mikhorqachu. Payqa Davidmanta sinch'ita llakikusharqa, tatan Saúl Davidpaj millayta rimasqanrayku.

³⁵ Q'ayantin paqarintaj Jonatanqa uj majt'illo pusarisqa ch'innejman llojserqa, ima phanitachus Davidwan tinkunanku karqa, chayta jina.

³⁶ Chantá majt'illota kamacherqa: Arcowan kay flechakunata kacharisqayta usqhayta t'ijuspa, mask'amunki, nispa. Chantá majt'illo phawarispa rishajtintaj, Jonatán sinch'itapuni arcowan flechata kacharerqa paymanta astawan karuman rinanpaj jina.

³⁷ Chantá majt'illo, maypichus flecha kasharqa chayman chayashajtin, Jonatán jatunmanta qhaparerqa: Flechaqa qanmanta aswan jaqaypiraj kashan, nispa.

³⁸ Uj kutitawan Jonatanqa majt'illota qhaparillarqataj: Aswan usqhayta riy, ama sayaychu, nispa. Jonatanpa uywasqantaj flechakunata oqharispa, patronnin Jonatanman apamorqa.

³⁹ Majt'illoqa mana imatapis repararqachu. Jonatanwan, Davidllawan imachus kashasqanta yacharqanku.

⁴⁰ Chantá Jonatanqa majt'illoman arconta, flechakunatawan jaywaspa, nerqa chaykunata apaspa, llajtaman kutipunanta.

⁴¹ Majt'illo ripojtinkama, Davidqa pakakusharqa, chaymanta llojsimuspa, Jonatanpa ñawpaqenpi kinsa kutita pampakama k'umuykukorqa. Chaymantataj ojllanaykukuspa, iskayninku waqanakorqanku, Davidpa sonqon tiyaykunankama.

⁴² Chaymanta Jonatanqa Davidta nerqa: Ama llakikuspalla ripuy. Tilusqanchejqa Tata Diospa ñawpaqenpimin karqa. Tata Dios chaymanta yachan qanwan noqawan wiñaypaj kawsakunanchejpaj, jinallataj qanpa mirayniykiwan, noqaj mirayniywanpis kawsakunankupaj, nispa.

^42b (21.1) Chantá Davidqa riporqa, Jonatantaj llajtaman kutiporqa.