1 Samuel 18 - DIOSPA QHELQACHISQAN DEUTEROCANONICAL

Jonatanwan, Davidwan ima uj tratota ruwanku

¹ David Saulwan parlayta tukusqantawan, Jonatanqa Davidta mayta q'ayachakuyta qallarerqa. Chayrayku Davidta pay kikinta jinapuni munakorqa.

² Saultaj, chay kikin p'unchaypacha Davidta payta yanapananpaj qhepacherqa, manañataj tatanpa wasinman kutipunanta munarqachu.

³ Chantá Jonatanwan, Davidwan ima uj tratota ruwarqanku, Jonatán Davidta may jinata munakusqanrayku.

⁴ Chay jawa Jonatanqa ponchonta, ujnin p'achantawan ima Davidman qorqa. Jinallataj espadanta, flechana arconta, qaramanta chumpintawan ima qollarqataj.

⁵ Davidqa, Saúl maymanchá kachaj, chayman rej, tukuy imatataj allintapuni ruwaj. Chayrayku Saulqa Davidta soldadonkunata kamachinanpaj churarqa. Davidtaj tukuy runapaj, jinallataj Saulpata soldadonkunata kamachejkunapajpis manchay munasqa karqa.

Saulqa Davidta chejnikun

⁶ David jatunkaray filisteota wañuchisqanmanta qhepata soldadokuna kutimpushajtinku, tukuy llajtamanta warmikuna kuraj kamachej Saulta taripaj llojserqanku, kusiymanta takispa, tususpa, tukuy imaymana tocanakunata tocarispa ima.

⁷ Warmikunataj tusoj jina ajinata takerqanku: Saulqa waranqa runakunata wañucherqa, Davidtaj chunka waranqata, nispa.

⁸ Saulrí ajinata takejta uyarispa, sinch'ita phiñakuspa, nerqa: Davidta ninku chunka waranqa runakunata wañuchisqanta. Noqatarí niwanku waranqallata wañuchisqayta. Kuraj kamachejninkuta jina churaykukunallankuña kashan, nispa.

⁹ Chaymantapacha Saulqa Davidta sajra ñawiwan qhawayta qallarerqa.

¹⁰ Q'ayantin Diospa kachamusqan millay espiritoqa Saulman yaykorqa, paytaj kamachinan wasi ukhupi pawisqa jina purerqa. David ñawpaj kutipi jina arpata tocasharqa, Saultaj uj lanzata makinpi jap'isharqa.

¹¹ Jinallaman Saulqa lanzata ujllata choqarqa, Davidta jap'ichispa perqaman sat'iykuyta yuyaspa. Davidtajrí iskay kutikama Saulpa choqasqan lanzamanta llusp'erqa.

¹² Saultajrí, Dios payta saqerpayasqanta yachakuspa, Davidmanta manchachikorqa, imajtinchus Tata Diosqa Davidta yanapasqanta repararqa.

¹³ Chayrayku mana paywan khuska kananta munaspa, Davidta 1.000 soldadokunata kamachinanpaj churarqa. Davidtaj soldadonkunawan maqanakuman rejtaj, kutimojtaj.

¹⁴ Chaywanpis Tata Dios Davidta yanapasqanrayku, tukuy ima ruwasqanpi allillanpuni rerqa.

¹⁵ Chayrayku Saulqa Davidta astawan manchachikorqa, tukuy imapi allin risqanrayku.

¹⁶ Chaywanpis israelitakuna, jinataj Judamanta kajkuna Davidta munakorqanku, pay kamachejninku jina maqanakuman llojsishajtinku chayrí kutimpushajtinku pusasqanrayku.

David Saulpa ususinwan casaran

¹⁷ Uj kuti Saulqa Davidta nerqa: Kuraj kaj ususiy Merabwan casarachisqayki. Chaypajqa qan maqanakupaj wapu kanayki tiyan, Tata Diospa sutinpi maqanakupipis sumajta maqanakoj kanayki tiyan, nispa. Ajinata nispa, Saulqa yuyasharqa filisteokuna maqanakupi Davidta wañuchinankuta, manataj paychu.

¹⁸ Davidtajrí Saulman kuticherqa: Kuraj kamachejpa tolqan kanaypaj, noqaqa mana imachu kani, nitaj tataypa ayllunpis Israel suyupi ancha rejsisqachu, nispa.

¹⁹ Chaywanpis mayk'ajchus Merabta Davidwan casarachinan p'unchay chayamojtin, Saulqa ususinta Mejolá llajtamanta Adrielwan casaracherqa.

²⁰ Saulpa ujnin kaj ususin Micaltajrí Davidta munakorqa. Chayta Saulman willajtinkutaj, payqa mayta kusikorqa.

²¹ Saúl yuyasharqa Davidta ususinwan casarachejtin, Davidqa filisteokunawan maqanakushajtin wañuchisqa kananta. Chayrayku Saulqa ujtawan Davidta nerqa: Kunanqa tolqaypuni kanki, nispa.

²² Chantá Saulqa kamachinkunata nerqa: Qankuna sapallanpi Davidta niychej: Kuraj kamachejqa maytapuni munakusunki, jinallataj tukuy kamachinkunapis. Kuraj kamachejpa tolqan kayta munallayña, nispa.

²³ Saulpa kamachinkuna Davidman chay tukuyta willajtinku, David kuticherqa: Yuyankichejchu kuraj kamachejpa tolqan kayqa pujllakunalla kasqanta? Noqaqa pisi tiyapuyniyoj mana kasu ruwana kani, nispa.

²⁴ Chantá Saulpa kamachinkunaqa David imatachus nisqanta Saulman willamorqanku.

²⁵ Saulrí munasharqa filisteokuna Davidta wañuchinankuta, chayrayku nerqa: Willaychej ususiymanta mañaqata apamunawantaqa, pachaj filisteokunata wañuchispa, apamuwachun phichilunkumanta qaritanta khuchusqata, chaywan awqaykunamanta pagachikunaypaj, nispa.

²⁶ Saulpa yanapajninkuna imatachus Saúl nisqanta Davidman willamorqanku. Davidtaj umachakorqa, ajinamanta kuraj kamachejpa tolqan kanaqa walej kasqanta. Chantá manaraj kuraj kamachej nisqan p'unchay chayamushajtin,

²⁷ Davidqa soldadonkunata pusariykukuspa, iskay pachaj filisteokunata wañuchimorqa. Jinaspataj, phichilunkumanta llint'akoj qaranta khuchuspa, kuraj kamachejman aparqa, jaywarqataj tolqan kananpaj. Chantá Saulqa ususin Micalta Davidwan casaracherqa.

²⁸ Saulqa repararqa Davidwan Tata Dios kasqanta, ususin Micaltaj sinch'ita munakusqanta ima.

²⁹ Chayrayku Davidta astawan manchachikorqa. Saulqa wañunankama wiñaypaj Davidta awqanpaj qhawarqa.

³⁰ Filisteokunaj kurajninkukuna sapa kuti maqanakoj llojsimojtinku, Saulpa waj kamachinkunamanta nisqaqa Davidpuni astawan paykunata atipaj. Chayrayku Davidqa tukuypaj manchay respetowan qhawasqapuni karqa.