1 Samuel 17 - DIOSPA QHELQACHISQAN DEUTEROCANONICAL

Davidqa Goliatta wañuchin

¹ Chaypacha filisteokunaqa israelitakunawan maqanakunankupaj soldadonkukunata tantarqanku. Soco llajta chaynejpi tantakuspa, Judá jatun aylloj jap'iyninpi, Efesdamín cheqanejpi jarakorqanku. Chayqa Socowan, Azecawan tinkuypi kashan.

² Jinallataj Saulwan, israelitakunawan ima tantakullarqankutaj, Elá nisqa vallepitaj jarakorqanku. Chaypi filisteokunaj contrankupi maqanakunankupaj wakichikorqanku.

³ Filisteokunaqa uj orqopi kasharqanku, israelitakunataj chimpan orqopi, chawpinkupitaj uj valle karqa.

⁴ Jinallaman filisteokuna ukhumanta uj jatunkaray runa, Goliat sutiyoj, maqanakoj llojsimorqa. Chay runaqa kinsa metro jina sayayniyoj karqa. Payqa Gat llajtamanta karqa.

⁵ Umanpi monteraqa broncemanta ruwasqa karqa, pecheranpis broncellamantataj karqa. Chayqa phishqa chunka phishqayoj kilo jina pesarqa.

⁶ Chaki t'usunta jark'ananpis broncellamantataj karqa, jinallataj lijranpi apaj chay lanzanpis.

⁷ Lanzanpa k'aspintaj awana k'aspi jinapuni karqa, puntantaj fierromanta karqa. Chay puntataj sojta kilomanta astawanraj pesarqa. Paypa ñawpaqentataj jark'akunan escudota apaykachapojnin rej.

⁸ Goliattaj sayaykuspa, israelitakunata qhaparerqa: Imapajtaj maqanakoj sayaykamunkichejri? Noqaqa filisteo kani, qankunataj Saulpa kamachinkuna kankichej. Qankuna ukhumanta ujta ajllaychej noqawan maqanakoj jamunanpaj.

⁹ Sichus noqawan maqanakuspa atipawanqa chayqa, noqayku qankunaj wata runaykichej kasqayku. Noqachus payta atipaykusaj chayrí, qankuna noqaykoj wata runayku kankichej, nispa.

¹⁰ Chantá filisteoqa nillarqataj: Israelita soldadokuna, kunan niykichej: Noqawan maqanakunanpaj uj qharita kachamuwaychej, nispa.

¹¹ Filisteo Goliatpa nisqanta uyarispa, Saulwan chantá tukuy israelitakunawan q'ewayarparerqanku, sinch'itataj mancharikorqanku.

¹² Chaypacha Judamanta Belenpi Yesé sutiyoj runa tiyakusharqa. Payqa Saúl kawsashajtin unayniyojña karqa. Chay runajta pusaj churinkuna tiyaporqa, ujnin kaj churintaj David karqa.

¹³ Yeséj kinsa churinkunaqa Saulwan maqanakuman risqanku. Kuraj kajpata sutin Eliab karqa, sullk'anpatataj Abinadab, kinsa kajpatataj Samá sutin karqa.

¹⁴ Davidtaj aswan sullk'a kaj karqa. Ajinaqa kinsantin kurajkunaqa Saulwan risqanku.

¹⁵ Davidtajrí Saúl kasharqa, chayman sapa kuti rej, kutimojtaj Belenman tatanpa ovejankunata michej.

¹⁶ Jatunkaray filisteo soldadorí tutamanta, ch'isiyaytataj llojsimoj israelita soldadokunata maqanakuman wajyaspa. Tawa chunka p'unchay junt'ata ajinallatapuni ruwarqa.

¹⁷ Uj kuti Yeseqa churin Davidta nerqa: Uj arroba trigo jank'ata, chunka t'antawan apariykukuspa, jarapi kashaj wawqeykikunaman usqhayllata aparqoy.

¹⁸ Kay chunka quesotapis kamachejninkuman apallaytaj. Yachamuytaj wawqeykikuna imaynachus kashasqankuta. Chantá imallankutapis apamuwanki, allillan kashasqankuta yachanaypaj.

¹⁹ Kuraj kamachej Saulwan, wawqeykikunawan, chantá tukuy soldadonwan ima Elá nisqa vallepi filisteokunawan maqanakuspa kashanku, nispa.

²⁰ Chay q'ayantintaj Davidqa tutamanta jatarikorqa, ovejankunata wajman mink'arikuspataj rerqa, tatan Yesé mikhunata wakichisqanta apaspa. Maqanaku jaraman chayashajtintaj, soldadokuna manchayta qhaparispa maqanakunankupaj wakichikusharqanku.

²¹ Israelitakunawan, filisteokunawanqa chimpan, chimpanpi maqanakunankupaj sayaykusharqanku.

²² David chayaspataj, q'epinta q'epita qhawaj soldadoman saqerikuspa, usqhayta soldadokuna ukhuman yaykuykorqa, wawqenkuna imaynachus kashasqankuta tapunanpaj.

²³ Paykunawan parlashajtintaj, Gat llajtamanta Goliat filisteokunaj chawpinkumanta llojsimorqa. Ñawpajta jina, wapulla sayaspa, israelitakunata paywan maqanakunankupaj wajyarqa. Davidtaj chayta uyarerqa.

²⁴ Chay runata rikuspa, israelitakunaqa manchayta mancharikorqanku, ayqerqankutaj.

²⁵ Chantá israelitakuna nerqanku: Rikunkichejchu chay llojsimoj runata? Payqa wapulla sayaspa, israelitakunaj contranpi sayaykun. Kuraj kamachejninchejrí, pichus jaqay runata atipajman ashkha qolqeta qonqa, ususintawan casarachenqa. Chantá tukuy ayllunpis impuestota mana paganqankuchu, nispa.

²⁶ Chaypacha David qayllanpi kajkunata tapurerqa: Jaqay filisteo runata wañuchejman imatataj qonqankuri? Imatataj qonqanku Israelta k'umuykachachejta chinkachejmanri? Pitaj kasqa chay mana diosniyoj runa, kawsaj Diospa soldadonkunaj contrankupi sayaykunanpajri? nispa.

²⁷ Paykunataj, ñawpajta imatachus nisqankuta kikillantataj Davidman willarqanku, pichus Goliatta wañuchejman, kuraj kamachej imatachus qonanta nisqanta.

²⁸ Davidpa kuraj kaj wawqen Eliabtajrí soldadokunawan parlasqanta uyarispa, Davidpaj phiñarikorqa, nerqataj: Imamantaj kayman jamorqankiri? Pimantaj pisi ovejakunata ch'in pampapi saqerqankiri? Noqa rejsiyki machu machu kasqaykita, sajra sonqo kasqaykitapis. Qanqa maqanakuta qhawanaykiraykulla jamunki, nispa.

²⁹ Davidtaj kuticherqa: Kunan imatataj noqa ruwasqaniri? Manañachu parlarikullaytapis atiyman? nispa.

³⁰ Chantá kuraj kaj wawqenmanta ithirispa, David wajtañataj tapurerqa. Chay soldadopis, ujkuna imatachus nisqankuta, kikillantataj nerqa.

³¹ Davidpa parlasqanta uyarejkunarí Saulman rispa willamorqanku, Saultaj payta wajyacherqa.

³² Chantá Davidqa Saulta nerqa: Ama jaqay filisteoraykoqa pipis manchachikuchunchu. Noqa jaqay runawan maqanakoj risaj, nispa.

³³ Saultajrí Davidta nerqa: Jaqay filisteowan maqanakoj mana riyta atiwajchu. Qanqa majt'illullaraj kanki, payrí wayna kasqanmantapacha maqanakuyman yachasqa kashan, nispa.

³⁴ Chantá David Saulman kuticherqa: Noqaqa tataypa ovejankunata michishajtiy, sichus león, chayrí jukumaripis ovejata jap'ispa apashaj chayqa,

³⁵ qhepanta rispa, siminmanta ovejata qhechoj kani. Noqaman phinkiykamuwajtintaj, k'akinmanta jap'ispa, wañuchinaykama wajtaj kani.

³⁶ Ajinata noqaqa leontapis, jinallataj jukumaritapis wañuchej kani. Kay mana diosniyoj filisteotapis kikillantataj ruwasaj, Tata Diospa soldadonkunaj contrankupi sayaykusqanrayku.

³⁷ Davidqa nillarqataj: Tata Diosqa leonpa siminmanta, jinataj jukumarej siminmantapis qhespichiwarqa. Jinallatataj kay filisteoj makinmantapis qhespichiwanqa, nispa. Chantá Saúl nerqa: Riy ari, Tata Diostaj yanapasuchun, nispa.

³⁸ Chantá Saulqa paypa maqanakunan p'achata Davidman p'achallichinankuta kamacherqa. Davidpa umanman broncemanta ruwasqa monterata churarqanku, uj unkutawan ima.

³⁹ Chantá Davidqa chumpinman uj espadata wataykukorqa. Ajina p'achallisqa kaspataj, thaskiyta munarqa. Chaywanpis mana chayman yachasqa kasqanrayku, Saulta nerqa: Kay jina p'achawan mana puriyta atinichu, mana chayman yachasqa kasqayrayku, nispa. Chantá Davidqa churasqanku p'achata lluch'ukaporqa.

⁴⁰ Chantá varanta oqhariykukuspa, wayq'omanta llosq'o rumita phishqata ajllakorqa, wayaqanmantaj churaykorqa. Chantá makinpi warak'an jap'irisqa jatunkaray filisteowan maqanakoj rerqa.

⁴¹ Jinallataj filisteo Goliatpis pisimanta pisi Davidwan maqanakoj qayllaykamullarqataj, jark'akuna escudonta apaykachapojnintaj ñawpaqenta risharqa.

⁴² Filisteo Goliattajrí, David waynallaraj chantá alajitu kasqanta rikuspa, manakajpaj qhawarqa.

⁴³ Chantá Davidta nerqa: Noqaqa alqochu kani k'aspiwan maqanakoj jamunawaykipaj? nispa. Jinata niytawantaj, filisteoqa diosninpa sutinpi Davidta maldicerqa.

⁴⁴ Filisteoqa nillarqataj: Jamuy kayman. Noqaqa aychaykita suwintukunaman, jinataj aychata mikhoj animalkunaman qaraykusaj, nispa.

⁴⁵ Davidtajrí Goliatman kuticherqa: Qanqa espadawan, lanzawan, juch'uy lanzawan ima jamushawanki. Noqatajrí Tukuy Atiyniyoj Tata Diospa sutinpi jamushayki. Payqa Israelpa soldadonkunaj Diosnin. Paypaj má qanqa ajina millayta rimarqanki.

⁴⁶ Kunanpacha Tata Diosqa qanta atipayta yanapawanqa, noqataj wañuchisqayki, umaykitataj qholurparisqayki. Jinataj tukuy filisteokunaj ayankuta suwintukunaman, aycha mikhoj animalkunamanwan qarasaj. Jinamanta tukuy yachanqanku Israel ukhupi Dios kasqanta.

⁴⁷ Kaypi tukuy tantasqa runakunapis yachallanqankutaj Tata Diosqa mana espadawanchu, nitaj lanzawanchu atipachisqanta. Kay maqanakoyqa Tata Diospatamin, paytaj qankunata atipaykuyta yanapawasqayku, nispa.

⁴⁸ Chantá filisteoqa Davidwan maqanakoj qayllaykorqa. Davidpis usqhayllata filisteowan maqanakoj phawarerqa.

⁴⁹ Chantá Davidqa wayaqanmanta uj rumita orqhorqa, chay rumiwan warak'aspataj, filisteoj frentenpi jap'irparicherqa. Chay rumi frentenpi sat'ikojtintaj, filisteoqa uyamanta pampaman choqakorqa.

⁵⁰ Ajinata Davidqa Goliatta atiparqa. Uj warak'allawan, uj rumillawan Davidqa payta wañurparicherqa. Mana espadayoj kasparí,

⁵¹ Davidqa filisteoj patanman phinkiykorqa. Chantá Goliatpa espadanta orqhoytawan, ujkama wañurparichispa, umanta qholurparerqa. Filisteokunaqa sumaj maqanakoj runankuta wañusqata rikuspa, ayqerikaporqanku.

⁵² Chantá Judá jatun ayllumanta, jinataj Israel suyumanta kajkunapis qhaparispa, Gat llajtaman yaykunakama chantá Ecronman yaykuna chaynejkama filisteokunata qhatiykorqanku. Sagarayinmantapacha Gatman, chantá Ecronman rina ñan patapi filisteokunaj ayanku wijch'u wijch'ulla kasharqanku.

⁵³ Chantá israelitakunaqa filisteokunata qhatiykusqankumanta kutirimuspa, filisteokunaj jarankupi tukuy imankuta apakaporqanku.

⁵⁴ Aswan qhepaman Davidqa Goliatpa umanta Jerusalenman aparqa, armankunatataj David jap'ikaporqa.

⁵⁵ David chay filisteowan maqanakoj rishajtin, Saulqa soldadokunata kamachej Abnerta tapusqa: Abner, pitaj jaqay waynaj tatanri? nispa.

⁵⁶ Abnertaj kutichisqa: Tiluyki kuraj kamachejníy, mana yachanichu, nispa. Kuraj kamachejtaj nisqa: Mana yachaspaqa, tapurakamuy pejpa churinchus kasqanta yachanaykipaj, nispa.

⁵⁷ David filisteota wañuchiytawankama, chay runaj uman aysarisqa kutimushajtin, Abnerqa Davidta Saulman pusarqa.

⁵⁸ Saultaj taporqa: Waynuchitu, pejpa churintaj kankiri? nispa. Davidtaj kuticherqa: Belenpi tiyakoj kamachiyki Yeséj churin kani, nispa.