1 Samuel 15 - DIOSPA QHELQACHISQAN DEUTEROCANONICAL

Saúl amalecitakunawan maqanakun

¹ Uj kuti Samuelqa Saulta nerqa: Tata Diosqa kachamuwarqa Israel suyupi kuraj kamachej kanaykipaj qanta churanaypaj. Chayrayku kunan uyariy Tata Dios imatachus kamachisusqanta.

² Tukuy Atiyniyoj Tata Dios ajinata nin: Israelitakuna Egiptomanta llojsimushajtinku, amalecitakunaqa ñanta mana pasajta saqesqankurayku, paykunata jasut'isaj.

³ Chayrayku amalecitakunawan maqanakoj riy. Tukuy paykunata wañuchimuy, jinataj tukuy kapuyninkutapis phiriy, ama ni uj chhikanta paykunamanta khuyarikuspa. Wañurachiy qharikunata, warmikunata, wawakunata, ñuñoj wawakunatapis. Ajinallatataj wañuchiy tukuy wakankuta, ovejankuta, camellonkuta, burronkuta ima, nispa.

⁴ Chantá Saulqa tukuy soldadonkunata wajyachispa, Telayinpi paykunata yuparqa. Tukuyninkupi karqanku 200.000 soldadokuna, Judá jatun ayllumantataj 10.000 soldadokuna.

⁵ Chantá Saulqa soldadonkunawan Amalec suyoj jatun llajtanman kachaykukorqa, chayaspataj mayu chaynejpi soldadonkunata pakaykurarqa.

⁶ Chaynejmantapacha Saulqa quenitakunaman willachimorqa: Chay llajtamanta llojsiychej, ama qankunatapis paykunawan khuskata wañuchinaypaj. Israelitakuna Egiptomanta llojsimushajtinku, qankunaqa allinta paykunapaj ruwarqankichej, nispa. Quenitakunataj amalecitakunaj llajtankumanta riporqanku.

⁷ Chantá Saulqa maqanakuspa amalecitakunata atipaykorqa, Javilá llajtamantapacha Shur nisqa ch'in pampakama. Chayqa Egiptowan tinkuypiña kashan.

⁸ Amalecitakunaj kuraj kamachejninku Agagta jap'erqa, tukuy runatataj wañucherqa.

⁹ Chaywanpis Saúl, jinataj soldadonkuna ima kuraj kamachej Agagta mana wañucherqankuchu, nillataj sumachaj ovejakunata, torokunata, wira torillokunata, nitaj corderokunatapis wañucherqankuchu. Nillataj sumachaj kaj imakunatapis phirerqankuchu. Imatachus phirirarqanku, chaykunaqa mana walej, mana valorniyoj karqa.

Tata Dios Saulta qhesachan

¹⁰ Chantá Tata Diosqa Samuelta nerqa:

¹¹ Saulta kuraj kamachej kananpaj churasqaymanta sonqoy ukhupi sinch'ita llakikuni, imaraykuchus payqa noqamanta karunchakun, manataj nisqayta junt'anchu, nispa. Chantá Samuelqa sinch'i llakisqa qhepakorqa, tukuy tutantintaj Tata Diosmanta mañakorqa.

¹² Q'ayantintaj payqa chhapu chhaputa Saulwan tinkukoj rerqa. Runakunataj payman willarqanku Saulqa Carmelman rispa, chaypi yuyarikuna rumi qotuta sutinpi sayarichisqanta, chaymanta kutirispataj Gilgalman ripusqanta.

¹³ Chantá Samuelqa maypichus Saúl kasharqa, chayman rerqa. Saultaj payta nerqa: Tata Dios qanta saminchasuchun. Noqaqa Tata Diospa kamachiwasqanta junt'aniña, nispa.

¹⁴ Samueltajrí taporqa: Chantá ima niytataj munan ovejakunaj, chantá torokunaj waqashasqankuri? nispa.

¹⁵ Saultaj kuticherqa: Soldadokuna Amalecmanta apamunku sumachaj ovejakunata, jinataj sumachaj torokunata Tata Diosniykiman q'olachispa jaywanapaj. Wakintatajrí wañucherqayku, nispa.

¹⁶ Samueltaj kuticherqa: Ch'in kay, noqataj willasqayki ch'isi imatachus Tata Dios niwasqanta, nispa. Saultaj kuticherqa: Parlallay, nispa.

¹⁷ Chantá Samuel nerqa: Qan kikiyki pisipaj qhawarikorqanki. Chaywanpis Tata Diosqa Israel suyuta kamachinaykipaj churasorqa.

¹⁸ Tata Diostaj sut'ita kamachisorqa juchasapa amalecitakunata chinkachinaykita, mana uj puchuyojtataj wañuchinaykita.

¹⁹ Chantá imaraykutaj Tata Diospa kamachisusqanta mana kasorqankichuri? Imaraykutaj amalecitakunaj sumachaj uywankukunata apakamporqankiri? Ajinata ruwaspa, Tata Diospa ñawpaqenpi nipuni allintachu ruwarqanki, nispa.

²⁰ Saultajrí kuticherqa: Noqaqa Tata Diospa kamachisqanta kasorqani, paypa niwasqantataj junt'arqani. Amalec suyoj kuraj kamachejnin Agagta presota apamorqani, amalecitakunatatajrí tukuyninkuta wañucherqani.

²¹ Soldadokunatajrí, wañuchisqa kananku karqa, chaymanta aswan sumachajnin ovejakunata, torokunata apamorqanku, Gilgalpi Tata Diosniykiman q'olachispa jaywanapaj, nispa.

²² Chantá Samuel kuticherqa: Imataj astawan Tata Diospa sonqonta kusichinri? Uywata ñak'aspa q'olachinachu, chayrí kamachisqanta kasunachu? Cheqamanta aswan allin payta kasuna, uywata ñak'aspa q'olachinamanta nisqaqa. Jinataj nisqanta uyarina aswan allin, corderoj wiranta jaywanamanta nisqaqa.

²³ Tata Diospa contranpi oqharikoyqa layqeriyo juchawan ninakun, Tata Diosta mana kasuytaj lanti yupaychana juchawan ninakullantaj. Imaynatachus qan Tata Diospa kamachisqanta qhesacharqanki, ajinallatataj paypis qanta amaña kuraj kamachej kanaykipaj qhesachasunki, nispa.

²⁴ Chantá Saulqa Samuelta nerqa: Arí, juchallini, Tata Diospa kamachisqanta, niwasqaykitawan mana kasuta ruwaspa. Chaytaqa ruwarqani runata manchachikuspa, imatachus mañawasqankuta uyarisqayrayku.

²⁵ Chaywanpis, ama jina kaspa juchallisqayta qhespichiway ari, noqawantaj Tata Diosta yupaychaj kutiriy, nispa.

²⁶ Samueltajrí Saulman kuticherqa: Mana qanwanqa risajchu. Tata Diospa kamachisqanta qhesachasqaykirayku kunanqa pay qhesachasunkiña, amaña Israelpa kuraj kamachejnin kanaykipaj, nispa.

²⁷ Jinapi Samuel ripunayashajtinña, Saulqa Samuelpa ponchonpa kantunmanta ch'ipakorqa, ponchontaj llik'irparikorqa.

²⁸ Chantá Samuel Saulta nerqa: Ajinallatataj Tata Diospis qanmanta Israel suyupi kuraj kamachej kanaykita qhechusonqa, qanmanta aswan allin llajta masiykiman qopunanpaj.

²⁹ Israelpa Tukuy Atiyniyoj Diosnenqa mana llullakunchu, nitaj sonqonta nanachikunchu. Payqa mana runachu imatachus nisqanmanta kutirinanpaj, nispa.

³⁰ Chantá Saúl ujtawan nerqa: Noqa juchallini. Chaywanpis, ama jina kaspa, tukuy israelitakunaj ñawpaqenkupi, jinataj kurajkunaj ñawpaqenkupipis kuraj kamachejta jinallapuni qhawariway ari. Kutinalla, Tata Diosniykita noqawan yupaychamuna, nispa.

³¹ Chantá Samuelqa Saulwan rerqa. Saultaj Tata Diosta yupaycharqa.

³² Chaymanta Samuel kamacherqa: Amalec suyoj kuraj kamachejnin Agagta kayman pusamuway, nispa. Agagtaj may kusisqa Samuelpa ñawpaqenman jamorqa, manaña wañuchisqa kananta yuyaspa.

³³ Samueltajrí Agagta nerqa: Qanqa ashkha warmita mana wawayojta saqerqanki. Kunanqa ajinallataj mamaykipis qhepakonqa, nispa. Chayta niytawantaj, Samuelqa Tata Diospa ñawpaqenpi kuraj kamachej Agagta wañuchispa, Gilgal llajtapi chhikan chhikanta khuchurarqa.

³⁴ Chaymanta Samuelqa Ramá llajtaman riporqa. Saultaj Gabaa llajtapi wasinman kutiporqa.

³⁵ Chantá Samuelqa manaña ujtawan Saulta rikorqachu. Mayta llakikuspa, Saulmanta waqarqa. Tata Diospis Israel suyupi kuraj kamachej kananpaj Saulta churasqanmanta sinch'ita llakikorqa.