1 Samuel 14 - DIOSPA QHELQACHISQAN DEUTEROCANONICAL

Jonatán filisteokunawan maqanakun

¹ Uj kuti Saulpa churin Jonatán armanta apaykachapoj kamachinta nerqa: Jaku, jaqay chimpapi filisteo soldadokuna kashanku, chayman rinachej, nispa. Jonatanrí mana imatapis tatanman willarqachu.

² Tatanrí Gabaa qaylla Migronpi uj orqo k'uchupi, granada sach'a urapi, jarasqa kasharqa, maynejpichus trigota trillaj kanku, chaypi. Payqa 600 soldadokunawan khuska kasharqa.

³ Unkuta apaykachaj Ajiaspis chaypi kashallarqataj. Payqa Ajitobpa churin karqa, Icabodpa wawqentaj. Ajitobqa Finespa churin karqa, chantá Elíj allchhintaj. Eliqa Silopi Tata Diospa sacerdoten unayña kasqa. Chaypacha runakunaqa Jonatán llojsisqanta mana yacharqankuchu.

⁴ Chaykama Jonatanqa chimpapi filisteokuna kasharqanku, chayman chayasharqaña. Chimpana q'asaqa iskay jatuchaj qaqa chawpipi kasharqa, chay qaqakunaj sutinkutaj ujninpata Boses karqa, ujninpatataj Sene.

⁵ Ujnenqa wichaynejpi Micmas chimpaman qhawarisqa karqa, ujnintaj uranejpi Gabaa chimpanejman qhawarisqa.

⁶ Chantá Jonatanqa armanta apaykachapoj kamachinta nerqa: Jaku, Diosta mana manchachikoj runakunaman rinachej. Ichapis Tata Diosqa noqanchejnejta imatapis ruwanman. Paypajqa ashkha runawanpis, chayrí pisiwanpis atipaykuyta yanapanawanchej atikullan, nispa.

⁷ Armanta apaykachapoj kamachintaj nerqa: Imatachus yuyasqaykita ruway, noqataj imatachus ruwayta munasqaykipi yanapasqayki, nispa.

⁸ Jonatantaj kuticherqa: Jaku rina, jaqay runakuna kashanku chayman, paykuna rikunawanchejpaj.

⁹ Paykunachus niwasunchej: Chayllapi sayaychej qankunaman jamunaykukama, nispa chayqa, noqanchej kayllapi suyasunchej, manataj chimpasunchejchu.

¹⁰ Sitajchus niwasun: Jamuychej, nispa chayqa, risunchej. Ajinapi yachasun Tata Dios paykunata atipaykunanchejpaj jaywaykuwasqanchejta, nispa.

¹¹ Ajinaqa iskayninku filisteo soldadokunawan rikuchikorqanku. Filisteokuna soldadokunataj paykunata rikuytawankama, nerqanku: Qhawaychej má, israelitakuna pakakushasqankumanta llojsiramushanku, nispa.

¹² Filisteokunarí Jonatanta, kamachintawan rikuytawankama, qhaparimorqanku: Kayman wicharimuychej. Imatachá qankunaman willarisqayku, nispa. Chantá Jonatanqa kamachinta nerqa: Qhepayta wicharimuy, imaraykuchus Tata Diosqa filisteokunata atipaykuyta yanapawasunchej, nispa.

¹³ Chantá Jonatanqa ch'ipakuspa wicharerqa, qhepantataj kamachin wicharillarqataj. Chantá Jonatán soldadokunawan maqanakuspa, parti wañusqata paykunata saqerqa, kamachintaj paykunata wañucherqa.

¹⁴ Maqanakoj yaykusqankupi Jonatanwan, kamachinwan ima uj katupi jina iskay chunka soldadokunata wañucherqanku.

¹⁵ Chayrayku filisteokuna ukhupi jarapi kashajkuna, jinataj jawapi kashajkunapis mayta mancharikorqanku. Ajinallatataj jatun tropamanta kaj soldadokunapis wateqaj llojsisqanku, chaykunapis mancharillarqankutaj. Chantá chaypachapuni jallp'apis ikhakorqa, chayraykutaj filisteokunaqa manchay mancharisqa kasharqanku.

¹⁶ Benjamín jap'iypi Gabaa llajtapi Saulpa qhawaj soldadonkuna rikorqanku filisteokunaqa qhollpilla kayman jaqayman ayqeykachashasqankuta.

¹⁷ Chaypacha Saulqa paywan kashaj soldadonkunata nerqa: Watuychej, noqanchej ukhumanta pichus mana kaypichu kasqanta yachanapaj, nispa. Chantá watuspa yacharqanku Jonatán, chantá armanta apaykachapoj kamachin ima mana chaypichu kasqankuta.

¹⁸ Chaypacha Diospa arcanqa israelitakuna ukhupi kasharqa. Chayrayku Saulqa Ajiasta nerqa: Diospa arcanta kayman apamuy, nispa.

¹⁹ Sacerdotewan Saúl parlanankamaqa, filisteokunaj jarankupi astawan qhollpikusharqanku. Chayrayku Saulqa sacerdoteta nerqa: Amaña apamuychu, nispa.

²⁰ Chantá Saulqa usqhayllata soldadonkunata tantaspa, maqanakoj kachaykukorqa. Chaykama filisteokuna ukhupeqa sinch'i musphaypuni karqa. Paykunapura wañuchinakuspa, tukuchinakusharqanku.

²¹ Chay jawa filisteokunawan unayña tiyakoj israelitakuna, filisteokunawan khuska maqanakuman jamojkunaqa Saulwan, jinataj Jonatanwan kashaj israelitakunaman k'askaporqanku.

²² Jinallataj Efraín jatun aylloj orqorara cheqanejpi pakakushaj israelitakunaqa filisteokuna ayqeshasqankuta yachaspa, maqanakoj llojsimullarqankutaj.

²³ Maqanakoqa Bet Avén llajtakama chayarqa. Ajinata Tata Diosqa israelitakunata filisteokunaj makinkumanta kacharicherqa.

Saulpa tilusqan

²⁴ Chay p'unchaypi israelitakunaqa allin sayk'usqa kasharqanku. Mana pipis mikhunata llamillarqapischu, Saúl paykunata tiluchisqanrayku: Manaraj ch'isiyashajtin, manaraj awqaykunawan pagachikushajtiy, pillapis imata mikhojqa maldicisqa kachun, nispa.

²⁵ Chantá soldadokuna monteman chayaspa, ashkha abeja misk'ita rikorqanku.

²⁶ Soldadokuna monteman yaykuspa, abeja misk'ita pampaman sut'ushajta rikorqanku. Chaywanpis tilusqankuta manchachikusqankurayku manapuni pipis llamirerqachu.

²⁷ Jonatantajrí tatan soldadokunata tiluchisqanta mana yachaspa, makinpi jap'isharqa, chay k'aspita abeja misk'iman sat'ispa llajwarqa, chantá askamalla kutiriyta qallarerqa.

²⁸ Chantá ujnin soldado nerqa: Tatayki tukuynin soldadota tiluchispa, nerqa: Pillapis kunan p'unchay imallatapis mikhojqa maldicisqa kanqa, nispa. Chayrayku soldadokunaqa may sayk'usqa llawch'ipachalla kashanku mana mikhusqankurayku, nispa.

²⁹ Jonatantajrí kuticherqa: Tatayqa tiluchispa runakunata mana allinman churan. Qhawaychej má, uj chhikan abeja misk'ita llamirisqaywan yuyayniyman kutirini.

³⁰ Sichus awqanchejmanta qhechusqankumanta imatapis mikhunkuman karqa chayqa, astawanraj kallpachakunkuman karqa. Jina kanman karqa chayqa, filisteokunata may jinatarajchus t'ustiykusunman karqa, nispa.

³¹ Chay p'unchay israelitakunaqa filisteokunata Micmas llajtamanta Ayalón llajtakama qhatiykorqanku. Ajinata chay p'unchay israelitakunaqa filisteokunata atipaykorqanku. Jinapis israelitakunaqa sinch'i sayk'usqaña kasharqanku.

³² Chantá israelitakunaqa awqankumanta qhechusqanku uywakunata jap'ispa, ovejata, wakata, waka uñakunata ima ñak'arqanku, chantá aychata yawarnintillanta mikhuyta qallarerqanku.

³³ Wakinkunataj Saulman willamorqanku: Soldadokunaqa aychata yawarnintillanta mikhuspa, Tata Diospa contranpi juchallishanku, nispa. Chaypacha Saulqa nerqa: Qankunaqa sajra sonqo runakuna kankichej. Uj jatun rumita tanqaspa, kayman apamuwaychej.

³⁴ Chay jawaqa rispa, nimuychej tukuy runaman kayman apamunawankuta toronkuta, chayrí ovejankutapis, kaypi ñak'aspa mikhunaykichejpaj, yawarnintillanta aychata mikhuspa Tata Diospa contranpi ama juchallinaykichejpaj, nispa. Chay ch'isipachataj sapa ujninku toronkuta aparqanku, chaypitaj ñak'arqanku.

³⁵ Saultaj Tata Diospaj uj altarta ruwaporqa. Chayqa ñawpaj kaj ruwasqan altar karqa.

³⁶ Chaymantataj Saulqa nerqa: Kunan ch'isi urayk'uspa, filisteokunata tukuyninkuta wañurachispa tukuy imankuta qhechuykamunachej, nispa. Chantá tukuy kuticherqanku: Ruwallay imatachus munasqaykita, nispa. Sacerdotetajrí nerqa: Manaraj imata ruwashaspa, Tata Diostaraj tapurinachej, nispa.

³⁷ Chaypacha Saulqa Diosta tapurerqa: Filisteokunata qhatiykuymanchu? Ujtawan atipaykunaykupaj yanapawasqaykuchu? nispa. Chay p'unchaypirí Dios mana imatapis kuticherqachu.

³⁸ Chantá Saúl nerqa: Kayman soldadokunata tukuy kamachejkuna qayllamuychej, waturiychejtaj pichus kunan juchallisqanta.

³⁹ Israelitakunata qhespichej Tata Dios yachan: Juchallejqa waway Jonatanpis kachun wañuchisqapuni kanqa, nispa. Soldadokunamantarí ni pi imatapis kuticherqachu.

⁴⁰ Chayrayku Saulqa tukuy israelitakunata nerqa: Kay ladoman qankuna sayaychej, kay ladomantaj waway Jonatanwan, noqawan ima sayasqayku, nispa. Chantá soldadokuna kuticherqanku: Ruwallay imatachus munasqaykita, nispa.

⁴¹ Chaypacha Saulqa Tata Diosta nerqa: Israelpa Tata Diosnin, imaraykutaj tapusojtiy mana imatapis kutichiwarqankichuri? Suertepi llojsichun, pichus cheqamanta juchayoj kanman, chay, nispa. Suerteta choqajtinkutaj Saulpaj, chantá Jonatanpaj ima llojserqa. Israelitakunataj mana juchayoj rikhurerqanku.

⁴² Saultaj nerqa: Suerteta choqaychej waway Jonatanpaj, chantá noqapajwan, nispa. Chantá suerteqa Jonatanpaj llojserqa.

⁴³ Chayrayku Saulqa Jonatanta nerqa: Imatachus ruwasqaykita willaway, nispa. Chantá Jonatán kuticherqa: Arí, jap'isharqani chay k'aspiwan uj chhikan abeja misk'ita llamirerqani. Chayraykuchu wañunay kanqa? nispa.

⁴⁴ Saultaj kuticherqa: Manachus qan wañunki chayqa, Tata Dios sinch'ita ñak'arichiwachun, nispa.

⁴⁵ Israelitakunatajrí Saulman kuticherqanku: Imaraykutaj Jonatán wañunman kasqari? Paynejta noqanchej filisteokunata mayta atipaykorqanchej. Mana wañunmanchu. Tata Diosrayku tiluyku: Mana uj chujchallanpis pampaman urmanqachu, imaraykuchus chay ruwasqanpi Dios payta yanaparqa, nispa. Ajinata israelitakunaqa Jonatán wañuchisqa kananmanta jark'akorqanku.

⁴⁶ Saultajrí filisteokunata qhatiykuyta saqerpayarqa, filisteokunataj wasinkuman kutiraporqanku.

⁴⁷ Israel suyuta kamachiyta qallarisqanmantapacha Saulqa muyuyninpi kaj tukuy awqakunawan maqanakorqa: Moabwan, Amonwan, Edomwan, Sobaj kuraj kamachejninwan, chantá filisteokunawan ima. Mayllamanpis maqanakoj risqanpi atipallarqapuni.

⁴⁸ Ashkha soldadota tantaykuspa, amalecitakunatapis atipaykullarqataj. Ajinamanta israelitakunata suwajkunamanta kacharicherqa.

⁴⁹ Saulpa churinkuna kaykuna karqanku: Jonatán, Isúi, Malquisúa ima. Ususinkunataj iskay karqanku: Kuraj kajpa sutin Merab karqa, sullk'ajtataj Mical.

⁵⁰ Saulpa warmenqa Ajimazpa ususin Ajinoán karqa. Soldadonkunata kamachejtaj Nerpa churin Abner karqa. Nertaj Saulpa tion karqa.

⁵¹ Saulpa tatan Cis, chantá Abnerpa tatan Nerpis, iskayninku Abielpata churinkuna karqanku.

⁵² Saúl kuraj kamachej jina kanankamaqa filisteokunawan maqanaku manchay sinch'i karqa. Saultaj sumaj wapu qharita rikuspa, soldadon kananpaj churajpacha.