1 Samuel 13 - DIOSPA QHELQACHISQAN DEUTEROCANONICAL

Israelitakuna filisteokunata atipanku

¹ Saulqa Israel suyuta iskay watataña kamachishaspa,

² israelitakunamanta 3.000 soldadonkuna kanankupaj ajllakorqa. Iskay waranqa soldadokuna Micmaspi, chantá Betel orqo cheqapi paywan qhepakorqanku, Benjamín jap'iypi Gabaa llajtapitaj 1.000 soldadokuna churin Jonatanwan qhepakorqanku. Puchoj runakunatataj wasinkuman kutipunankuta kamacherqa.

³ Chantá Jonatanqa Gabaapi qhawasharqanku chay tukuy filisteo soldadokunata wañuracherqa, chaytataj filisteokuna uyarerqanku. Chaypacha Saúl kamacherqa tukuynin Israel suyupi putututa waqachinankuta: Tukuy israelitakuna uyarichunku, nispa.

⁴ Tukuy israelitakuna yacharqanku Saulqa filisteokunaj qhawaj soldadonkunawan maqanakuspa wañuchisqanta, chayraykutaj filisteokunaqa israelitakunata manchayta chejnikusqankuta. Chayrayku israelitakunaqa Gilgalpi Saulwan tantakorqanku.

⁵ Jinallataj filisteokunapis israelitakunawan maqanakunankupaj tantaykukorqanku. Filisteokunajpata 30.000 carretakuna karqa, 6.000 caballopi maqanakojkuna. Soldadokunataj mama qochaj t'iyun jina may chhikapuni karqanku. Chantá Micmas llajtaman kachaykukorqanku, chaypitaj Bet Avenmanta inti llojsimuynejpi jarakorqanku.

⁶ Filisteokuna tukuynejmanta maqanakoj sayaykusqankurayku, israelitakuna imatachus ruwanankuta mana yachashaj rikhurerqanku. Chayraykutaj chhanka jusk'uman, t'oqoman, qaqa k'ajllukunaman, allasqa jusk'ukunaman chantá ch'aki pujyukunaman ima pakakamorqanku.

⁷ Paykunamanta wakinkunataj Jordán mayuta chimpaspa, Gadman jinataj Galaad chaynejman ayqerqanku. Saulrí Gilgal llajtapi kasharqa, paywan kashaj soldadokunataj sinch'i mancharisqa kasharqanku.

⁸ Chaypi Saulqa qanchis p'unchayta suyarqaraj, imaynatachus Samuel nisqanman jina. Samueltajrí Gilgalman mana chayamorqachu, soldadokunataj ripuytaña qallarisharqanku.

⁹ Chantá Saúl kamacherqa: Uywakunata apamuychej wañuchispa q'olachinapaj, k'achata kawsakuy jaywanatawan Diosman jaywanaypaj, nispa. Chantá pay kikin uywa ñak'asqata q'olachispa jaywarqa.

¹⁰ Saúl Diosman jaywanata q'olachiyta tukusqantawankama, Samuel chayamorqa. Chantá Saulqa napaykunanpaj taripamorqa.

¹¹ Samueltajrí Saulta nerqa: Imaraykutaj kayta ruwarqankiri? nispa. Saultaj kuticherqa: Soldadokuna ripurashasqankuta rikorqani, jinallataj qanpis señalasqa p'unchaypaj mana chayamusqaykita rikorqani. Filisteokunapis Micmaspi tantasqa kashasqankuta yacharqani.

¹² Noqa yuyarqani Tata Dios yanapanawanta manaraj mañakushajtiy, filisteokuna Gilgalman maqanakoj jamunawankuta. Chayrayku mana munashaspapis Tata Diosman imatachus jaywanata noqa kikiy usqhayllata jaywarqani, nispa.

¹³ Chantá Samuel Saulman kuticherqa: Chaytaqa wampu jina ruwanki. Sichus Tata Diospa kamachisqanta kasuwaj karqa chayqa, payqa qanman, jinataj mirayniykiman ima Israel suyuta kamachinaykichejpaj wiñaypaj qosunkichejman karqa.

¹⁴ Kunanrí Tata Diospa kamachisusqanta mana kasusqaykirayku, kuraj kamachej jina kanaykeqa mana unaypajchu kanqa. Tata Diosqa paypa munasqanman ruwananpaj mask'anña. Ayllunta kamachinanpaj payta churanqa, nispa.

¹⁵ Chaypacha Samuelqa Gilgalmanta riporqa, Saultaj puchoj soldadokunawan Benjamín jatun aylloj jap'iyninpi Gabaa llajtaman riporqa. Chaypitaj Saulqa paywan kashaj soldadokunata yuparqa. Tukuyninpi 600 karqanku.

¹⁶ Saulwan, churin Jonatanwan, chantá paykunawan kashaj soldadokunapiwan Benjamín jap'iypi, Gabaa llajtapi qhepakorqanku. Filisteokunatajrí Micmaspi jarakorqanku.

¹⁷ Chantá kinsa tropa soldadokuna filisteokunaj jarankumanta maqanakoj llojsimorqanku. Ujnin tropaqa Sual nisqa chaynejpi Ofrá llajtaman rerqa.

¹⁸ Ujnin tropataj Bet Jorón chaynejman rerqa, kinsa kaj tropataj Zeboyin valle qhawarisqa orqoman rerqa. Chayqa ch'in pampa qayllapi kashan.

¹⁹ Chaypacha Israel suyupi fierro takajkuna mana ujllapis karqachu. Filisteokuna mana munarqankuchu israelitakuna fierro takayta yachanankuta, ama espadakunata, lanzakunatapis ruwakunankupaj.

²⁰ Chayrayku israelitakunaqa llank'ana rejankuta, azadonninkuta, jachankuta, chayrí chujchukankutapis awsachinankupajqa filisteokunamanpuni rinanku karqa.

²¹ Rejakunata, chujchukakunata, azadonkunatawan awsasqankumanta pusaj gramo qolqeta pagananku karqa. Jachakunata, ayjonkunata awsasqankumantataj tawa gramo qolqeta pagananku karqa.

²² Chayrayku pikunachus Saulwan rerqanku chaykunamantaqa ni mayqenpis espadayojchu, nitaj lanzayojchu karqanku. Saulpata, Jonatanpata imalla kaporqa.

²³ Chaykamataj filisteokunamanta uj tropa soldadokuna Micmas q'asaman chayamorqankuña.