1 Samuel 12 - DIOSPA QHELQACHISQAN DEUTEROCANONICAL

Samuel juez jina ruwananta tukun

¹ Chaymanta Samuelqa tukuy israelitakunata nerqa: Noqaqa qankuna mañawasqaykichejta uyarerqaykichej, kunantaj kuraj kamachejta churapuykichej.

² Kayqa kuraj kamachejniykichej, pichus qankunaj ñawpaqeykichejta purenqa, chay. Noqarí unayniyojña kani, chujchaypis yurajllaña, churiykunataj qankunawan kashanku. Noqaqa wayna kasqaymantapacha kunankama qankunata pusaykacharqaykichej.

³ Kunanqa kaypi qankunawan kashani. Sichus pejpa bueyninta, burrontapis jap'ikaporqani chayqa, chayrí pitapis tumparqani, llakicherqani, pimantapis lluk'ita jap'ikorqani chayqa, kunanpacha Tata Diospa ñawpaqenpi, ajllasqan kuraj kamachejpa ñawpaqenpipis uyaypi nipuwachun, noqataj kutichipusaj, nispa.

⁴ Chantá israelitakunaqa kuticherqanku: Mana jayk'ajpis q'otiyawarqaykuchu, nitaj waqachiwarqaykuchu, nillataj lluk'ita jap'ikorqankichu, nispa.

⁵ Chantá Samuelqa nillarqataj: Tata Dios yachan, jinallataj ajllakusqan kuraj kamachejpis yachallantaj, qankuna noqapi ni ima mana allintapis tarisqaykichejmanta, nispa. Israelitakunataj kuticherqanku: Ajinapuni, nispa.

⁶ Chay jawa Samuelqa israelitakunata nillarqataj: Tata Diosmin Moisestawan, Aarontawan ajllakorqa, paykunanejtataj ñawpa tataykichejkunata Egiptomanta orqhomorqa. Paymin yachan.

⁷ Chayrayku kunanqa uyariwaychej: Tata Diospa ñawpaqenpi uyanchasqaykichej. Tata Diosqa sumaj imakunata qankunapaj, jinataj ñawpa tataykichejkunapajpis ruwasqanmanta yuyarichisqaykichej.

⁸ Maypachachus Jacob aylluntin Egiptoman rerqanku chaypacha, Egipto llajtayojkuna paykunata ñak'aricherqanku, ñawpa tataykichejkunataj llakiyninkupi Tata Diosman qhaparikorqanku. Chantá Tata Dios Moisesta, Aarontawan kacharqa, paykunataj ñawpa tataykichejkunata Egipto suyumanta orqhomuspa, kay jallp'aman pusamorqanku.

⁹ Ñawpa tataykichejkunatajrí Tata Diosninkumanta qonqaporqanku, Tata Diostaj Jazor llajtamanta soldadokunata kamachej Sísaraj makinman paykunata jaywaykorqa. Chantá filisteokunaman, jinataj Moab suyoj kuraj kamachejninmanpis paykunata jaywaykullarqataj. Paykunaqa ñawpa tataykichejkunawan maqanakorqanku.

¹⁰ Chaypacha paykunaqa Tata Diosman qhaparikorqanku: Juchalliyku, imajtinchus qanta saqerparispa, Baal lantikunata, Astarot lantikunatawan yupaycharqayku. Awqaykukunaj makinkumanta kacharichiwayku, noqaykutaj qanllata yupaychasqayku, nispa.

¹¹ Chayrayku Tata Diosqa Yerubaalta, Baracta, Jefteta, Samueltapis kachamorqa, awqaykichejkunaj makinkumanta kacharichinasuykichejpaj. Chayrayku qankunaqa mana imamanta manchachikuspa kawsakorqankichej.

¹² Chaywanpis amonitakunaj kuraj kamachejninku Najás qankunawan maqanakoj jamushasqanta rikuspa, qankunaqa uj runata kuraj kamachejniykichejpaj churapunayta mañakuwarqankichej, Diosniykichej Tata Dios kuraj kamachejninchej kashajtinpis.

¹³ Kayqa, ajllakusqaykichej kuraj kamachejqa kaypi kashan. Mañakusqaykichejman jina Tata Diosmin payta qosunkichej.

¹⁴ Sichus Tata Diosta manchachikuspa, payllata yupaychankichej, sitajchus nisusqaykichejta uyarispa, kamachisqanta kasunkichej, chantá qankuna, jinataj kuraj kamachejniykichej ima Diosniykichej Tata Diospa munayninman jina kawsankichej chayqa, tukuy imapis allillanmin kanqa.

¹⁵ Sichus qankuna Tata Diosta mana uyarinkichejchu, kamachisqantataj mana kasunkichejchu chayqa, payqa ñawpa tataykichejkunata jina qankunata ñak'arichisonqachej.

¹⁶ Sumajta uyariwaychej: Kunan Tata Diospa t'ukuna ruwasqanta kikin ñawiykichejwan rikunkichej.

¹⁷ Kunan trigo oqharina tiempo kashan, manataj paray tiempochu, icharí? Chaywanpis noqa Tata Diosmanta mañasaj, paytaj kachaykamonqa qhon qhonkunata. Paratapis parachimonqa, qankuna yachanaykichejpaj, reparanaykichejpajtaj kuraj kamachejta mañakuspa, Tata Diospa contranpi juchallisqaykichejta, nispa. Ajinata Samuel israelitakunata k'amerqa.

¹⁸ Chantá Samuelqa chaypachapacha Tata Diosmanta mañakorqa, Tata Diostaj qhon qhonkunata, paratawan kachaykamorqa. Tukuy runataj Tata Diosta, jinataj Samuelta manchachikorqanku.

¹⁹ Chayrayku tukuyninku Samuelta nerqanku: Tata Diosniykimanta noqaykurayku mañaripuwayku ari, ama wañunaykupaj. Kuraj kamachejta mañakuspa, juchaykuman astawan yapaykukuyku, nispa.

²⁰ Samueltaj kuticherqa: Ama manchachikuychejchu. Cheqamanta qankunaqa jatunta juchallerqankichej. Chaywanpis Tata Diosmanta ama t'aqakuychejchu, manachayqa tukuy sonqowan Tata Diosta yupaychaychej.

²¹ Ama qhasi manakaj dioskunata yupaychaychejchu. Chaykunaqa mana pitapis yanapayta atinkuchu, nitaj qhespichiytapis qhasi manakajlla kasqankurayku.

²² Tata Diosqa sutin yupaychasqa kananrayku mana saqerpasonqachejchu, imaraykuchus payqa ayllunpuni kanaykichejta munan.

²³ Noqarí Tata Diosmanta mañapullasqaykichejpuni. Mana mañapuykichejmanchu chayqa, juchalliyman. Jinallataj qankunata yachachisqaykichej imaynatachus sumajta, cheqantataj purinaykichejta.

²⁴ Qankunaqa Tata Diosta yupaychakuychej. Tukuy sonqowantaj payllata yupaychaychej, Tata Dios qankunarayku sumaj imakunata ruwapususqaykichejta yuyarikuspa.

²⁵ Sichus mana allinta purispallapuni kawsankichej chayrí, qankuna, chantá kuraj kamachejniykichejpis chinkachisqa kankichej, nispa.