1 Samuel 11 - DIOSPA QHELQACHISQAN DEUTEROCANONICAL

Saulqa amonitakunata atipan

¹ Amón suyoj kuraj kamachejnin Najasqa soldadonkunawan ima Galaadpi Jabés llajtaman rerqa, jap'inanpajtaj chay llajtata muyuykorqa. Jabés llajtayojkunarí nerqanku: Noqaykuwan uj tratota ruwana, noqaykutaj kamachiyniykipi kasqayku, nispa.

² Chantá Amón suyumanta Najás kuticherqa: Ya, qankunawan uj tratota ruwasaj. Chaywanpis tratota ruwanaypajqa sapa ujmanta paña kaj ñawiykichejtaraj orqhosaj, jinamanta Israel suyuta p'enqaypi rikhurichinaypaj, nispa.

³ Chantá Jabés llajtamanta kurajkunaqa kay jinata kuticherqanku: Qanchis p'unchayta suyariwayku tukuy Israel jap'iyman willajkunata kachanaykupaj. Manachus pipis yanapayta munawasqayku chayqa, qanman k'umuykusqayku, nispa.

⁴ Jabés llajtamanta kachasqakuna Saulpa llajtan Gabaaman chayaspa, imachus kashasqanta tukuyman willarqanku. Chayrayku llajtayojkunaqa llakikuymanta sinch'ita qhaparispa, waqarqanku.

⁵ Chaypacha Saulqa bueyninkuna qhatirisqa llank'asqanmanta chayamusharqa. Chantá taporqa: Imataj tiyan, runa kay jinata waqanankupajri? nispa. Chantá Jabesmanta jamojkuna imatachus nisqankuta payman willarqanku.

⁶ Chayta Saúl uyarejtinkama, Diospa Espiritonqa Saulman jamorqa, Saultaj may sinch'itapuni phiñarikorqa.

⁷ Chantaqa iskay bueyta ñak'aspa, chhikan chhikanta khuchurarqa. Chaytataj tukuynin Israel jap'iyman kachakunawan apacherqa. Kachakunataj kay jinata nerqanku: Pikunachus Saulwan, Samuelwan ima mana rejkunaj bueyninkoqa ajina khuchurasqa kanqanku, nispa. Ajinata nejta uyarispa, Tata Diosmanta uj sinch'i manchachikuy israelitakunaman junt'aykorqa, chantá uj runa jinalla Saulwan ujchakoj rerqanku.

⁸ Chantá Saulqa Bezecpi tantakoj runakunata yuparqa: Israel jap'iymanta 300.000 karqanku, Judá jap'iymantataj 30.000 karqanku.

⁹ Chaymanta Saulqa Jabesmanta jamoj kachasqakunata nerqa: Nimuychej Jabespi tiyakojkunaman q'aya chawpi p'unchayta jina kacharichiwasunchej, nispa. Kachasqakunataj kutispa, Jabespi tiyakojkunaman willamorqanku, paykunataj mayta kusikorqanku.

¹⁰ Paykunataj Najasman nerqanku: Q'aya qanman k'umuykoj jamusqayku, noqaykuwan munasqaykita ruwanaykipaj, nispa.

¹¹ Chay q'ayantenqa Saúl soldadonkunata kinsaman t'aqarqa. Manaraj sut'iyamushajtintaj, amonitakunaj jarankuman yaykuykorqanku. Chawpi p'unchaykama amonitakunawan maqanakuspa, ashkhatapuni wañuracherqanku. Mana wañorqankuchu chaykunarí, tukuynejman ch'eqerarqanku, manataj iskayllapis khuskaqa qhepakorqachu.

¹² Chantá israelitakunamanta wakinkuna Samuelta nerqanku: Pikunachus Saúl kuraj kamachejninchej kananta mana munaspa alqochakojkunata, kayman apamuwayku wañuchinaykupaj, nispa.

¹³ Saultajrí nerqa: Kunan mana pipis wañuchisqa kanqachu, Israel suyuta Tata Dios kacharichisqanrayku, nispa.

¹⁴ Chantá Samuel tukuyninkuta nerqa: Gilgalman rinachej. Chaypi kuraj kamachejniyoj kasqanchejmanta raymicharikamusunchej, nispa.

¹⁵ Chayrayku tukuynin israelitakuna Gilgal llajtaman kachaykukorqanku, chaypitaj Tata Diospa ñawpaqenpi Saulta kuraj kamachejninkuta jina tiyaykucherqanku. Chantá Tata Diosman allinyakuy jaywanata jaywarqanku. Saulwan, israelitakunawantaj mayta kusikorqanku.