1 Reyes 3 - DIOSPA QHELQACHISQAN DEUTEROCANONICAL

Salomonqa faraonpa ususinwan casarakun

¹ Salomonqa Egiptomanta kuraj kamachej faraonwan aylluchakorqa, ususinwan casarakuspa. Chantá payta pusamorqa Davidpa llajtan nisqaman, kamachinan wasi ruwayta tukuchinankama, Tata Diospa Templonta, jinataj Jerusalenta tukuyninta perqawan muyuykuchinankama.

² Chaykama israelitakunaqa loma pata chay altarkunallapiraj uywa ñak'asqata jaywaj kanku, imaraykuchus chaykama Tata Diospa sutinpi Templo manaraj ruwasqachu karqa.

Salomón yuyayniyoj kayta yachayniyoj kayta ima Diosmanta mañakun

³ Salomonqa Tata Diosta munakoj, tatan Davidpa kamachisqanman jina purispa. Chaywanpis payqa loma pata altarkunapi uywa ñak'asqata jaywajraj, inciensotapis q'oshñichejraj.

⁴ Salomontaj Gabaón lomaman rerqa, imaraykuchus chaypi jatun kaj altar kasharqa, chaypitaj uywakunata ñak'aspa Tata Diosman jaywarqa. Salomonqa 1.000 uywakunata ñak'aspa, chay altar patapi q'olacherqa.

⁵ Uj ch'isi Tata Diosqa Gabaonpi Salomonman mosqoypi rikhurispa, payta nerqa: Mañakuway imatachus munasqaykita, noqataj qosqayki, nispa.

⁶ Chantá Salomón nerqa: Qanqa tatay David kamachiykita mayta munakorqanki, imaraykuchus payqa cheqanta purerqa qanpa ñawpaqeykipi, cheqantapuni ruwaspa, cheqan sonqowantaj. Qantaj mayta khuyaspa, uj wawanta qorqanki kamachinan tiyanapi tiyananpaj, imaynachus kunan p'unchay kashan jina.

⁷ Kunantaj, Tata Diosníy, tatay Davidpa cuentanpi churawanki noqa kamachiykita kuraj kamachej jina kamachinaypaj. Noqarí waynallaraj kani, manataj yachanirajchu imaynatachus kamachinayta.

⁸ Ajllakusqayki aylluykita kamachinay kashan, paykunaqa may chhika mana yupay atina, nitaj mashkhachus kasqankupis yachana jinachu kanku, ashkha kasqankurayku.

⁹ Chayrayku jatun sonqota qoway, jatun yachaytawan, aylluykita allinta kamachinaypaj jina, sajra kajta, allin kajtapis reparanaypaj. Manachayqa, pitaj kay chhikan aylluykita kamachiyta atinmanri? nispa.

¹⁰ Salomonpa mañakusqanqa Tata Diospaj may allinpuni karqa.

¹¹ Tata Diostaj nerqa: Qanqa mana mañakuwankichu unayta kawsayta, nitaj qhapaj kaytachu, nillataj awqaykikuna wañuchisqa kanankutachu. Manachayrí sumaj yachayniyoj kayta mañakuwanki, kay aylluyta sumajta kamachinaykipaj.

¹² Chayrayku imatachus mañakuwasqaykita ruwasajpuni. Qosqayki sumaj yachayta, jatun sonqotawan, yuyayniyoj kaytapis. Ajinaqa mana ujpis karqachu qan jinaqa, nitaj qanmanta qhepamanpis kanqachu.

¹³ Chaywanpis mana mañakuwasqaykitapis qollasqaykitaj qhapajyayta, atiytawan. Ajinamanta mana uj kuraj kamachejpis qan jinaqa kanqachu kawsanaykikama.

¹⁴ Sitajchus munayniyta ruwaspa kawsanki, yachachisqaykunata, kamachisqaykunatapis kasuspa, imaynatachus tatayki David purerqa, ajinata chayqa, unayta kawsachisqayki, nispa. Ajinata Tata Diosqa Salomonta nerqa.

¹⁵ Chantá Salomonqa puñushasqanmanta rijch'arispa, repararqa mosqoylla kasqanta. Jerusalenman kutimuspataj, Diospa trato ruwasqan arca kasharqa, chayman rerqa, chaypitaj uywakunata ñak'aspa, Tata Diosman q'olacherqa. Jaywallarqataj allinyakuna jaywanakunatapis. Jinaspataj, tukuynin kamachinkunaman uj sumaj mikhuyta mikhuracherqa.

Salomonpa yachaynin

¹⁶ Chaymanta mana unayninmanchu, iskay sajra purikoj warmikuna kuraj kamachejman rerqanku.

¹⁷ Ujnin kaj warmeqa nerqa: Uyariway, wiraqochíy. Noqawan, kay warmiwan ima uj wasillapi tiyakuyku. Chantá noqaqa wawayta paqarichikorqani, pay noqawan wasipi kashajtin.

¹⁸ Paqarichikusqaymanta kinsa p'unchayninman, kay warmipis uj wawitata paqarichikullarqataj. Iskaynillayku kasharqayku, manataj pipis chay wasipeqa karqachu.

¹⁹ Uj ch'isitaj kay warmej wawan wañusqa, imaraykuchus wawanpa patanman puñuykusqa.

²⁰ Chantá payqa chawpi tutata jatarispa, noqa puñunaykama, noqaj wawayta puñunanman apakapusqa, chay wañusqa wawantataj puñunayman churaykamusqa.

²¹ Jinapi noqa tutamanta rijch'ariytawan, wawayta ñuñuchej churakuspa, wañusqallataña tarerqani. Allin sut'iyamojtintaj qhawaykorqani, manataj paqarichikorqani, chay wawachu kasqa, nispa.

²² Chay ujnin kaj warmitajrí nerqa: Mana, noqaj wawayqa kawsashaj, qanpata wañusqa kaj wawaqa, nispa. Chantá ujnin kaj warmitaj kuticherqa: Mana, wañusqa wawa qanpata, noqajtataj chay kawsashaj wawa, nispa.

²³ Chantá kuraj kamachejqa nerqa: Kay warmeqa nin: Noqajta kawsashaj wawaqa, qanpatataj wañusqa wawaqa, nispa. Chay ujninpis kikillantataj nin: Mana, qanpata wañusqa wawaqa, noqajtataj kawsashaj wawaqa, nispa.

²⁴ Chantá kuraj kamachejqa nerqa: Apamuychej uj espadata, nispa. Kuraj kamachejmantaj uj espadata apamorqanku.

²⁵ Espadata apamojtinkutaj, kuraj kamachejqa nerqa: Chay kawsashaj wawata iskayman khuchuychej, sapa ujninmantaj khuskantakama qopuychej, nispa.

²⁶ Chantá chay kawsashaj wawaj mamanqa wawanrayku maytapuni llakikuspa, kuraj kamachejta nerqa: Wiraqochi kuraj kamachejníy, ama wañuchiychejchu chay kawsashaj wawata. Kay warmiman qopuychej, nispa. Chay uj warmitajrí nerqa: Wañuchiychej, ni paypaj ni noqapaj kachunchu. Iskayman khuchurpariychej, nispa.

²⁷ Chantá kuraj kamachejqa kuticherqa: Jaqay ujnin warmiman chay kawsashaj wawata qopuychej, imaraykuchus paypuni mamanqa, nispa.

²⁸ Israelmanta tukuy runakunaqa chay jina cheqan justiciata ruwasqanta uyarispa, kuraj kamachej Salomonta may jatunpaj qhawarqanku, imaraykuchus paykuna repararqanku Diosmanta yachayniyoj kayqa paypi kasqanta, cheqanta ruwananpaj.