इफिसियों 1 - डोगरी नवां नियमनमश्कार 1 मैं पौलुस जेड़ा परमेसर दी मर्जी कन्ने यीशु मसीह दा प्रेरित ऐ, उनै पवित्र ते यीशु मसीह च विश्वासी लोकें दे नां जेड़े इफिसुस शैर च न, 2 ए मेरी प्रार्थना ए के साड़े पिता परमेसर ते प्रभु यीशु मसीह थमां तुसेंगी क्रपा ते शान्ति मिलदी रवै। मसीह च छटकारा 3 साड़े परमेसर ते प्रभु यीशु मसीह दे पिता दा शुक्र उवै, के परमेसर असेंगी मसीह च सोर्ग दी जगै च, सारी चाली दी आत्मिक आशीष दिती ऐ। 4 जियां ओसने असेंगी दुनिया गी बनानें थमां पैलैं मसीह च चुनी लेता के अस ओसदी नजर च पवित्र ते बेकसुर ओचै। 5 ते अपने प्रेम च परमेसर अपनी मर्जी दी पली नीत दे मताबक असेंगी अपने आसतै पैलैं दा चुनी लेता के यीशु मसीह थमां अस ओदे गोद लेते दे पुत्तर ओचै। 6 के परमेसर दे ओस क्रपा दी मैमा दी स्तुति उवै, जेड़ी ओसने असेंगी अपने प्यारे पुत्तर थमां मोफत च दिती। 7 असेंगी मसीह च ओदे खून थमां छुटकारा, मतलब पापें दी माफी, परमेसर दी ओस क्रपा दे तन दे मताबक मिली ऐ, 8 परमेसर ने सारे ज्ञान ते अपनी समझ कन्ने मती सारी साड़े उपर वरकतें दी बरखा ब्राई दी ऐ। 9 परमेसर ने अपनी मर्जी दा पेद, अपनी पले मकसद दे मताबक असेंगी ए दसया, जिसी मसीह ने अपने आप च पैलैं गै करी लेता हा, 10 के परमेसर अपनी योजना दे मताबक, ओदा बेला पूरा ओनें उपर, जेड़ा केछ सोर्ग च ते तरती उपर ऐ, सब केछ ओ मसीह च एक करै। 11 मसीह च अस बी ओदी योजना कन्ने जेड़ा अपनी इच्छा दे मताबक सारा केछ करदा ऐ, पैलैं दे चुने दे ओदी बरास्त बनें। 12 के असैं यहूदी गीं, जिनैं पैलैं दी गै मसीह उपर आस रखी दी ही, ओदी मैमा दी स्तुति दा कारन ओचै। 13 ते उसै च तोस बी, जेसलै तुसें सचाई दा वचन सुनया, जेड़ा थुआड़े उद्धार दा शोभ समाचार ऐ, ते जेस उपर तुसें विश्वास कित्ता, बायदा कित्ते दे पवित्र आत्मा दी मोर लगी। 14 परमेसर ने अपनी पवित्र आत्मा असेंगी देने दे कारन, ओदे मुलैं लिते दे लोकें दे छुटकारे आसतै साड़ी जायदाद दा बयाना ऐ, के ओसदी मैमा दी स्तुति उवै। आत्मिक ज्ञान लेई प्रार्थना 15 एस आसतै, आऊँ बी ओ विश्वास जेड़ा तोसें लोकें दा प्रभु यीशु उपर ऐ ते सारें पवित्र लोकें लेई प्रेम दा समाचार सुनीयें, 16 थुआड़े आसतै परमेसर दी मेशा शुक्रगुजारी करना नेई छुड़दा, ते अपनी प्रार्थना च तुसेंगी याद करदा रौना ऐं 17 ए मेरी प्रार्थना ऐ, के साड़े प्रभु यीशु मसीह दा परमेसर जेड़ा मैमा दा पिता ऐ, तुसेंगी अपनी समझ दी आत्मा ते ज्ञान दी लो दियै, 18 आऊँ एबी प्रार्थना करना ऐं, के थुआड़े मन दी अखीयाँ जगमग ओंन के तोस सच गी जानी लियो के साड़े बलाए जानें दी आस के ऐ, ते पवित्र लोकें च ओसदी जायदाद दी मैमा दा तन कनया ऐ, 19 ते ओसदी शक्ति साड़े लेई जेड़े विश्वासी न, किन्नी बड़ी ऐ, ओसदी शक्ति दे असर दे ओस कम दे मताबक। 20 जेड़ा ओसने मसीह दे बारै कित्ता, के उसी मरें बिचा जिंदा करियै सोर्ग दी जगें च अपनी सज्जी बखी बठाया; 21 ओस जगै च सब चाली दी प्रधानता ते अख्त्यार, ते शक्ति, ते राज दे, ते अर एक नां दे उपर, जेड़ा नां सेर्फ एस लोक च, लेकन औने आले लोक च बी लीता जाग, 22 ते परमेसर ने सब अख्त्यार ओदे पैरें थलै करी दिता; ते उसी सारीयें चीजें उपर उच्चा बनाईयै कलीसिया गी देई दिता। 23 कलीसिया ओसदी जेंद ऐ, ते मसीह उसै दी परपुरी ऐ, जेड़ा सारें च सारा केछ पूरा करदा ऐ। |
This work is licensed under Creative Commons Attribution-ShareAlike 4.0 License.