Si Apwesa 30 - Buki Tabu Lowaenei 1919

‘UPWA 30.

¹ Ta ‘ebetaria ‘u da bubuna be mu‘ana ‘ena ‘u da gabu: kaiwe akesiega ‘u da bubuna.

² Kiubita ‘e bweu ‘ana dudura, ta kiubita ‘e bweu ‘ana bababa; esenanao ‘e ata si da erererea: ta kiubita ‘e rua ‘ana gitu‘etu‘e: kunanao si da e ‘e bweuna ma‘ieana.

³ Ta gola esasenega ‘u da bodena, debana ta seraserabena ‘i sakowasi, ta kunanao; ta tupitupinao gola ‘u da bubu sakowasie.

⁴ Ta giimweiina gola ‘e rua ‘u da bubudi manuna tupitupina ‘agaraunaia, lesulesuna ‘e rua ‘edia, ‘e rua dei ‘edia ‘u da bubudi; ta si da e ‘ewa‘ewa ‘adi ‘ebesa‘u manuna be ‘adi ‘ebe‘a‘ara.

⁵ Ta ‘ewa‘ewa nidi ‘u da bubudi kaiwe akesiega, ta golega ‘u da bodedi.

⁶ Ta ‘aubodakaleko, tauna ‘ebee‘ita ‘ana dedewaga deinaia ‘i miami, matanaia ‘u da sa‘u, ‘ebemia‐nua‘ole‘ole tauna ‘ebee‘ita debanaia ‘i miami matanaia, ‘ena ma‘ieaio ta da elobaloba.

⁷ Ta Aarona mu‘ana dibidibi ‘ena ‘i da gabu: gonagona iauna, ‘ena maieare ‘i guinuedi, ‘i da gabuna.

⁸ Ta ‘ena Aarona maieare ‘i loe‘abi asunuanuaia, ‘i da gabuna, mu‘ana ataia Ieoba matanaia ‘ina epata‐tomota ‘edia.

⁹ Gea‘abo ‘e bweu mu‘ana dumadumana ‘ena ‘u da ‘ebwaea, nai ‘ebwaeadaita gabugabuna, nai ‘ebwaeadaita palaua; ta gea‘abo ‘e bweu ‘ebwaeadaita numanuma ‘ena ‘u da siwa.

¹⁰ Ta Aarona kunanao ‘edia ‘i da ginua‘ebweu ma‘ebweunamo iakwara ‘e bweuna ‘enega: ginua‘ebweu ‘ana loegesi ‘ana ‘ebwaeadaita raranega ma‘ebweuna iakwara ‘e bweuna ‘enaia ‘i da ginua‘ebweu manuna ‘imu epata‐tomota ‘edia: tauna ‘i tabu wawasae Ieoba ‘enaia.

¹¹ Ta Ieoba ‘i ona Mose ‘enaia, ‘i gwae.

¹² ‘Ena Iseraela tubunao ‘adi pwaru ‘u sawa, nadigega taudi ‘ediega si sawa, ga si da ‘ebwaea ‘e bweuna ‘e bweuna e‘isa ‘e bweu iaruiaruana manuna Ieoba ‘enaia, ‘ena ‘u sawedi; be ‘enega gea‘abo ‘e bweu le‘oasa ‘edia, ‘ena ‘u sawedi.

¹³ Gete si da ‘ebwaea, ‘e bweuna ‘e bweuna ‘i taona taudi ni‘atu si sawedi ‘edia, sekeli ‘ana upwaruena nadigega anua tabu ‘ina sekeli: (sekeli ‘i gera ‘e tweniti:) sekeli ‘ana upwaruena ‘ebwaeadaita Ieoba ‘ena manuna.

¹⁴ ‘E bweuna ‘e bweuna ‘i taona taudi ni‘atu si sawedi ‘edia, ‘adi iakwara ‘e tweniti ta wate, Ieoba ‘ana ‘ebwaeadaita si da ‘ebwaea.

¹⁵ To esaesa gea‘abo sinabwana si da ‘ebwaea, ta gomabeso gea‘abo gidarina si da ‘ebwaea, sekeli ‘ana upwa‐ruena tugai, ‘ena Ieoba ‘ana ‘ebwaeadaita si ‘ebwaea, si ginua‘ebweu iaruiaruami manudi.

¹⁶ Ta ginua‘ebweu ‘ina mani ‘u da ‘ewa Iseraela tubunao ‘ediega, ta ‘u da sa‘una anua egogona ‘ana guinua manuna; be ‘enega ‘i da ‘ebenua‘i‘isi Iseraela tubunao manudi Ieoba matanaia, sabi ginua‘ebweu iaruiaruami manudi.

¹⁷ Ta Ieoba ‘i ona Mose ‘enaia, ‘i gwae,

¹⁸ ‘Ebe‘utu wate barasega ‘u da bubu, ta ‘aena barasega, ‘ebe‘utu ‘enega: ta anua egogona be ‘ebetaria ta gamwagamwanaia ‘u da sa‘una, ta boasi ‘ena ‘u da sa‘ui.

¹⁹ Ta Aarona ta natunao me‘olotodi nimadi ta ‘aedi ‘ena si da ‘utudi:

²⁰ ‘Ena anua egogona si rurugu, boasiega si da ‘utu, be gea‘abo si da mwawasa; nai ‘ena si mai ‘ebetaria serabenaia be si guinua, ‘ebwaeadaita si gabuna ‘aweiega si bubuna Ieoba ‘enaia:

²¹ Nadigega nimadi ta ‘aedi si da ‘utudi, be gea‘abo si da mwawasa: ta ‘i da loina ataia ‘edia, tauna ‘enaia ta tubunao ‘edia ga ‘idi epata‐tomotaiao.

²² Wate Ieoba ‘i ona Mose ‘enaia, ‘i gwae,

²³ Wate ‘u da ‘ewa ‘emuia mu‘ana sinabwadi, muro ‘i daudau sekeli ‘e paibe anaredi, ta sinamoni dibidibi iage nina ‘ana ‘upwa‐ruena, tauna tu anaredi ta pipiti, ta kigweruru dibidibi e tu anaredi ta pipiti,

²⁴ ta kasia ‘e paibe anaredi, anua tabu ‘ana sekeli ‘atua, ta bunama olibe iina ‘e bweuna:

²⁵ Ta ‘u da bubuna bunama oroa tabu, ‘ane si guinua to guinua ‘ane ‘ina bubuna ‘atua: tauna ‘i da bunama oroa tabu.

²⁶ Ta ‘enega anua egogona ‘u da oroa, ‘ebee‘ita ‘ana dedewaga be.

²⁷ Tebeli ta ‘ana gaebao iauiaudi be, maieare ‘ina ‘ebesa‘u ta, ‘ana gaeba be, mu‘ana ‘ana ‘ebetaria be.

²⁸ ‘Ebwaeadaita gabugabuna ‘ana ‘ebetaria ma‘ana gaeba iauiaudi be, ‘ebe‘utu ta ‘aena be.

²⁹ Ta ‘u da etabudi, be ‘enega si da tabu wawasae: to‘ase nai ‘i gitoodi ‘i da tabu.

³⁰ Ta Aarona ta natunao me‘olotodi ‘u da eorodi, ta ‘u da etabudi, be ‘enega ‘eguia si da guinua to taria ‘ina guinua ‘enaia.

³¹ Ta Iseraela tubunao ‘edia ‘u da ona, ‘u da gwae, Gete ‘i da bunama oroa tabu ‘eguia ‘imi epata‐tomota ‘edia.

³² Tomota esiona gea‘abo ‘ena si da siwa, nai ‘e bweu wa da bubuna nadigega, na‘ieana ‘ina iageiao: tauna ‘i tabu, ta ‘i da tabu ‘emia.

³³ Tauna ‘e bweu nadigega ‘i iagena, nai tauna ‘enega ‘e bweuna ‘i sa‘u to‘u‘umara ‘enaia, ‘ina tomota ‘ediega si da ‘upwaiaulena.

³⁴ Ta Ieoba Mose ‘ena ‘i gwae, Mu‘ana dibidibidi ‘emuia ‘u da ‘ewa, sitakite, onuka ta, galabanuma ta; mu‘ana dibidibidi maina esasena ma‘ieana: ‘e bweuna ‘e bweuna ‘ana mwau ‘i da nadigega;

³⁵ Ta mu‘ana ‘u da bubuna ‘enega, ‘ane toguinua ‘ane ‘ina bubuna ‘atua, orega ‘u da loora, esasena ta tabu:

³⁶ Ta aina ‘u da tutu be matagidarina, ta ‘ebee‘ita matanaia ‘enega ‘u da sa‘u anua ‘ebeeloba ‘enaia, ‘ena ia da lobemu: ‘i da tabu wawasae ‘emia.

³⁷ Ta mu‘ana ‘u da bubuna, ‘ana iageiao nadigega gea‘abo ‘u da bubuna manumi: ‘emuia ‘i da tabu Ieoba manuna.

³⁸ Tauna ‘i bubuna gote nadigega, be ‘i muina, ‘ina tomota ‘ediega si da ‘upwa‐iaulena.